Waˈanëts yëˈë nyajtukˈijxwëˈëmdë kojëts nˈëwäˈkx ngäjpxwäˈkxtë. Nëjkxtëts tëjkmdëjkm, mä mayjyaˈay yajpääty ets oytyim määjëty mäjëtsë jäˈäy nbäättë. ¿Tikots duˈun ndundë?

Ngäjpxwäˈkxtëts parëts nmëjkumaytyë Dios ets parëtsë jäˈäy nduknijawëdë xyëë (Ebreeʉsʉty 13:15). Nan yëˈëjëts nmëmëdoowdëp extëmë Jesus ojts tniˈanaˈamë: “Nëjx yaˈëxpëktë jäˈäyëty mä tëgekyë naxwinyëdë es tukniˈixëdë es tkuytyunët tëgekyë diˈibëts ëj miits të ndukˈanaˈamdë” (Matewʉ 28:19, 20).

Ngäjpxwäˈkxtëts nanduˈun mët kojëtsë jäˈäy ntsoktë (Matewʉ 22:39). Nnijäˈäwëdëbëts ko mayë jäˈäy wiˈixëm ja mëbëjkën tmëdattë ets ko kyaj niˈamukë tˈoymyëdowäˈändë ja oybyë ayuk. Per ijttëbëts seguurë ko tijatyë Biiblyë tukniˈˈijxëp, mbäädë jäˈäy myoˈoyëtyë jukyˈäjtën. Yëˈëtsë tyäˈädë xypyudëjkëdëp parëts duˈunyëmë jäˈäy nyaˈëxpëktët etsëts ngäjpxwäˈkxtët ja oybyë ayuk diˈib mä Kristë, duˈun extëm ttuundë pënaty tim jawyiin pyanëjkxtë Jesus (Apostʉlʉty 5:41, 42).

Mayë jäˈäy diˈib kyäjpxtëbëtsë nˈëxpëjkpajn kyaj Tyestiigëty. Ets miyonkˈamëts nyaˈëxpëktë mëdë Biiblyë diˈib tyukˈijtëdëbë wiink relijyonk, ets diˈib kyukäjpxëdëp ko Testiigë nyinëjkxëdë.

Per waˈan mˈaknayajtëyëty pënën Jyobaa tyestiigëty. Kanäk pëky jyaˈˈaty wiˈix mbäät xynyijawë:

• Yajtëw tuˈugë Jyobaa tyestiigë.

• Tëkë mä Internet jw.org.

• Nëjkx mäjëts nduˈukmuktë. Namayˈäjtën ets mbäät oypyënëty nyijkxy.