DIˈIB MIIMP MÄ NYIˈAK: ¿PËNËN YAJTIJTËP JYOBAA TYESTIIGËTY?
¿Mä tpëktë meeny sentääbë?
Jëmëjt jëmëjt, miyonkˈamëts nyajkojtë ets nyajwäˈkxtëtsë Biiblyë etsë ëxpëjkpajn. Ngojtëtsë jëën tëjk ets nmëdattëts kanäägë sukursal ets mä kyojˈyë ëxpëjkpajn abëtsemy nyaxwinyëdë. Milˈam nanduˈun jyaˈˈatyë tuˈukmujkën diˈib ijtp tukniwits tukniwääbë ets japëts nˈëxpëktë mä lugäärë adëyëbë diˈib xyëˈäjtypy Tëjk mä yˈËxpëktë Jyobaa tyestiigëty. ¿Mä tsyoonyë meeny sentääbë parë yajtuny tukëˈëyë tyäˈädë?
Tukëˈëyë tyäˈädë yajtuny mëdë meeny sentääbë diˈib yajˈyäjkp tsojkëngyëjxm (2 Korintʉ 9:7). Mä jëmëjt 1879, mä myëmajtskpë numero mä tyäˈädë rebistë diˈib ijty xyëˈäjtypy Zion’s Watch Tower, jyënany: “Extëmëts ëëtsëty nmëbëktë, [tyäˈädë rebistë] pyëtsëmy mët kojëtsë JYOBAA xypyudëkëdë, ets mientrësëts yëˈë xypyudëkëdë, ninäˈä naxwinyëdë jäˈäy kyayaˈˈamdowëdë naybyudëkë etsë limosnë”. Axtë tyambäät, duˈunyëmëts nmëbëktë.
Yëˈë meeny sentääbë diˈib yajˈyäjkp tsojkëngyëjxm, mbäät yajkexy nidëyë mäjëts nmëdattë sukursal o nbëjtäˈäktëts mä käjë diˈib japˈäjtp mäjëts nˈëxpëktë. Kyajts nyajmuktë diesmë ets ni ngaˈˈamdowdëtsë meeny sentääbë, namayˈäjtënëtsë jäˈäy nyaˈëxpëktë ets nan kyajts ndooktë ëxpëjkpajn. Kyajts nyajmëjuytyë kojëts ngäjpxwäˈkxtë, kojëts nyaˈëxpëktë mäjëts nduˈukmuktë ets kojëts ngojtë jëën tëjk mäjëts nˈëxpëktë. Pesë Jesus jyënany: “Miits mˈaxäjëdë [...] nadëˈënyë, nan katë myajmëjuytyë ko dëˈën xytyundët” (Matewʉ 10:8). Kyaj pën yajmëjuy diˈib tuump mäjatyëts nmëdattë sukursal ets ni mäjëts nmëdattë kyopk ets ni yëˈë Diˈib wyooyoˈoytyëbë Jyobaa tyestiigëty.
“Tukëˈëyë tijaty tyuundëbë Jyobaa tyestiigëty, yëˈë yajtuundëbë meeny sentääbë diˈib yajˈyäjkp tsojkëngyëjxm, niduˈuk niduˈuk tˈixtë nuˈun ets näˈäjaty dyakäˈändë mä ryelijyonk.” (Tribunal Europeo de Derechos Humanos, 2011)
Ja meeny sentääbë diˈib yajnayäjkp, nan yëˈë tuump ko tijaty yˈayoˈonbëjtaˈaky. Pënaty pyanëjkxtë Jesus mä primer siiglë, pyudëjkëdë xondaˈakyˈää xondaˈakyjyot ja myëguˈuktëjk diˈib yajtëgoyˈäjttë naybyudëkë (Romanʉs 15:26). Tyam, nanduˈunëts nbudëkëdë nmëguˈuktëjk ko yˈayoˈonbäättë, ngojëdëtsë jyëën tyëjk diˈib të wyindëgoy, nmoˈoytyëtsë kyaˈay yˈukën etsë ääy tsooy. Ets nan nˈagojëdëbëtsë Tëjk mäjëts nˈëxpëktë ko wyindëgoy.