¿Tiko jäˈäy nyuˈkxtäˈäktë?
“Yëˈëtsë nety ntsojkënyëˈajtypyë ëyëˈk kuyäjtk. Nnuˈkxtakpëtsë nety yëˈko njantsy myëdataambyëtsë meeny sentääbë. Per ninäˈäts ojts ngapääty.” (Samuel, * Kenia)
“Mä eskuelë jeˈeyëtsë nety nyaˈˈanëëmëdë etsëts njattët ngäjpxtäˈäktët agëbajky.” (Teresa, Filipinas)
“Kojëts nmëdatyë amay jotmay, tajëts nnuˈkxtaˈaky. Nanduˈun parëts nˈamdoyë maˈkxën mët kojëts nbokytyuny ets parëts oy njäˈäyˈatët.” (Magdalene, Ghana)
Extëm jyënaˈanyë Samuel, Teresa etsë Magdalene yëˈë xytyukˈijxëm ko tiiyëmë jäˈäy nyinuˈkxtakëdëp, tamë oybyë ets tam diˈib kyaj. Nääk nyuˈkxtäˈäktë amumduˈukjot etsë wiinkpë jeˈeyë wingëˈëy agëˈëy. Per miyonkˈamë jäˈäy nuˈkxtäˈägandëp, tiiyëm nyinuˈkxtakëdëp, extëm ttuknaxtëdë yˈeksamen, myadäˈäktëdë yˈekipë o parë oyë fyamilyë jyukyˈattët. Nan të yajwijtspëtsëmy ko mayë jäˈäy nuˈkxtaktëp oy tkatukˈitëdë tuˈugë relijyonk.
Ets mijts, ¿mnuˈkxtakpë? Pën duˈun, ¿ti mˈamdoopy? Oy xëmë mnuˈkxtaˈaky o kyaj, waˈan mnayajtëyëty: ¿Jantsy tuumbën ko nuˈkxtakëm? ¿Jam pën diˈib myëdoowˈijtypy? Tuˈugë jäˈäy diˈib jyaabyë liibrë, jyënany ko nuˈkxtakëm, yëˈë parë oy xyajnayjäˈäwëm. Ets näägë doktoortëjk wyinmaytyë ko nuˈkxtakën, nan tuump extëmë ääy tsooy. Mijts, ¿wiˈix mˈokwinmay? ¿Jeˈeyëdaa jäˈäy nyuˈkxtäˈäktë mët ko duˈun të tˈijxwëˈëmdë o parë oy nyayjawëyäˈänëdë?
Biiblyë kyaj duˈun tyukniˈˈixë. Jyënaˈany ko nuˈkxtakën kyaj jeˈeyë tyuny parë oy nnayjäˈäwëm. Ets ko tam diˈib jyantsy myëdoowˈijtypyë nuˈkxtakën, per net pën oy nduˈunëm ets pën nan oy diˈib ninuˈkxtakëm. ¿Waˈandaa tyëyˈäjtënëty? Min nˈokˈijxëm.
^ parr. 2 Të näägë xyëë tyëgatstë.
