DIˈIB MIIMP MÄ NYIˈAK
¿Pënën yajtijtëp Jyobaa tyestiigëty?
“Tamë tiempë nyëjkxnë mäjëts nˈixyˈatyë Mike. Yëˈë tuˈugë Jyobaa tyestiigë, ets kyajts njaygyukë wiˈixën yˈixëtyë ryelijyonk. ¿Pënën Jyobaa? ¿Tiko Jyobaa tyestiigëty kyaj xyëdundë? Nmëjotmaybyatëtsë Mike ko tyëjkë mä tadë sektë.” (Becky diˈib California, Estados Unidos)
“Ja nmëdëjkpäˈäjëts ojts tˈëxpëjktsondaˈagyë Biiblyë mëdë Jyobaa tyestiigëty, tajëts nwinmääy: ¡Tim tëgatsy yajmëdoyë tadë xëë Jyobaa tyestiigëty! ¿Tidaa yˈandijpy?” (Zenon diˈib Ontario, Canadá)
“Duˈunëtsë nety nwinmay mëdëtsë ngudëjk ko Jyobaa tyëstiigëty, jeˈeyë myindë parëts axëëk xyajnayjawëyäˈändë kojëts nganëjkxtë tsäjptëgoty. Nanduˈuntsë nety nwinmaytyë ko pën kyajts nbäättë diˈibëts njanijawëyandëp mä relijyongë mëjatypyë, wiˈixëts nbäättët mä tuˈugë sektë extëmë Jyobaa tyestiigëty.” (Kent diˈib Washington, Estados Unidos)
“Tëyˈäjtënëts njënäˈäny, kyajtsë nety ndimnijawë pënën yëˈëjëty ets ti myëbëjktëp.” (Cecilie diˈib Esbjerg, Dinamarca)
Waˈan të xyˈixy kyäjpxwäˈkxtë tëjkmdëjkm ets nëˈääy tuˈääy, tkëyaktë ëxpëjkpajn diˈib nyimaytyakypyë Biiblyë ets yaˈëxpëktë namayˈäjtën. Ets waˈan yëˈë niduˈuk të mmoˈoyëtyë tyäˈädë rebistë diˈib yam mgajpxypy. Per waˈan nanduˈun të mwinmay pënën Jyobaa tyestiigëty extëmë tyäˈädë jäˈäy diˈib të yajnimaytyäˈäktë.
¿Ti mbäät xytyuny pën mnijawëyaampy o mjotmaytyuunëp pënën Jyobaa tyestiigëty? ¿Mä mbäät xynyijawë ti myëbëjktëp, mä tpëktë meeny sentääbë parë Dios mëdundë ets diˈib yajtuundëp mä tyuˈukmuktë? ¿Ets tiko mninëjkxëdë mä mjëën mdëjk o mëtmaytyäˈägëdë nëˈääy tuˈääy?
Cecilie diˈib të yˈokˈyajmaytyakpë, jyënaˈany: “Ojtsëts ngajpxy mä Internet wiˈix yajnimaytyaˈagyë Jyobaa tyestiigëty. Nan nmëdoowëts wiˈix yajniwäämbattë ets yajnimaytyäˈäktë, tyäˈädë yëˈëts diˈib tëgatsy xyajwinmääy”. Per ko Cecilie këˈëm tmëtmaytyakyë Jyobaa tyestiigëty, ta tnijäˈäwë wiˈixën tyëyˈäjtënëty.
Pën mnijawëyaampy niˈigyë pënën Jyobaa tyestiigëty, ¿tiko yëˈëjëty xykyayajtëwdë? Yëˈë diˈib yajpëtsëëmdëbë tyäˈädë rebistë ets yˈatsoowëmbitandëp tijaty mnayajtëëwëp (Proverbios 14:15). Nˈawijxtëbëts etsë artikulo diˈib akmiimp, mbudëkëdët parë niˈigyë xynyijawët pënën Jyobaa tyestiigëty, ti myëbëjktëp ets ti tyuundëp.
