Mä yäˈädë artikulo ojts yajnimaytyaˈaky ko niˈamukë naxwinyëdë jäˈäy etsë anklëstëjk, tsojkëp dyajwäˈätstët ja Diosë xyëëw. Tuk pëky, yëˈë ko yajnibëdëˈëgyë ja Jyobaa kyutujkën ko kyaj oy yˈaneˈemy. Ets ja tuk pëky, tsojkëbë naxwinyëdë jäˈäy dyajnigëxëˈëktët pën myëmëdowandëbë Jyobaa o kyaj.

Min nˈokˈijxëm tëgëk pëky tiko jyëjpˈamëty ets nnijäˈäwëm wiˈix yajnibëdëˈkyë Jyobaa xyëëw ets tiko tsyokyëty wyäˈätsët.

Jam Edén mä tim jawyiinë Satanás ojts tnibëdëˈëgyë Jyobaa xyëëw. Extëm dyajtëëyë Eva, duˈun dyajjaygyukëyany ko Jyobaa kyaj yˈoyjyaˈayëty ets ko mëkë yˈanaˈamën. Ta net tˈanmääyë Eva ko kyaj tyëyˈäjtënëty extëmë Jyobaa të yˈanëˈëmxëdë ets ko winˈëˈën winxäjëdëp, duˈun ojts dyajwëˈëmy axëëgë Jyobaa xyëëw. Desde jaa, ta yajxëëwmooy “Mëjkuˈu” mëdiˈibë yˈandijpy “niwäämbajtpë” (Fwank 8:44). Ko Eva kyaj tmëmëdooyë Jyobaa, duˈun dyajnigëxëˈky ko kyaj nety ttsoky etsë Jyobaa yˈanaˈamëdët (Gén. 3:1-6). Satanás duˈunyëm tyam dyajnibaxëtëkë Diosë xyëëw, pes wyinˈëˈëmpy wyinxajpyë jäˈäy, ets pënaty myëbëjktëp kyaj tmëmëdowdë Jyobaa. Niˈamukë Diosmëduumbëty axëëk jyantsy nyayjyawëdë ko duˈun yajnibëdëˈëgyë Diosë xyëëw. Päätyë net yä naxwiiny niˈigyë jyaˈˈatyë amay jotmay ets myëjwindëkë axëkˈäjtën mët ko yajnibëdëˈëgyë Diosë xyëëw.

Myëmajtsk pëky, Jyobaa tsyojkypy parë niˈamukë agujk jotkujk nyajpatëm, pääty të ttuknibëjktäägë ko dyajmëjpëtsëmäˈäny xyëëw ets dyajwäˈätsäˈäny. Ets tyunaambyën duˈun, pes jyënaˈany: “Seguurë kots ja nxëëw nyajwäˈätsäˈäny mëdiˈibë ijtp mëj” (Ezeq. 36:23). Jesus nanduˈun ojts tyukniˈˈixë mä Padrenuestro “waˈanë mxëëw twäˈätsy” (Mat. 6:9, TNM). Ko duˈun jyënany, yëˈë yajnigëxëˈk ko jëjpˈam mbäät ninuˈkxtakëmë xyëëw. Mä Biiblyë kanäkˈok jap yajmaytyaˈaky ko tsojkëp nyajmëjpëtsëˈëmëmë Jyobaa xyëëw. Extëm nˈokpëjktakëm jap jyënaˈany: “Yajmëjpëtsëmdë Jyobaa xyëëw extëm pyaaty nyitëkëty” (1 Crón. 16:29; Sal. 96:8). “Kuyˈëw kuyyäˈäxtë xyëëw mëdiˈibë ijtp mëj” (Sal. 66:2). “Xëmëkyëjxmëts nyajmëjpëtsëmaˈanyë mxëëw” (Sal. 86:12). Tëgok jamë netyë Jesus yajpääty Jerusalén ko tmënuˈkxtakyë Tyeety: “Tatë yajmëjpëtsëmë mxëëw” etsë Tyeety ta yˈatsoowëmbijtë desde tsäjpotm: “Tëts nyajmëjpëtsëmy, ets nyajpëtsëmaambyëts jatëgok” a (Juan 12:28, TNM).

Myëdëgëk pëky, tijatyë Dios të ttuknibëjktäägë yëˈë parë xëmëkyëjxm myëjpëtsëmëdë xyëëw. Extëm nˈokpëjktakëm, ¿wiˈixëdaa Jyobaa xyëëw wyëˈëmäˈäny ko nety të yˈabajnë mä Jesus yˈAneˈemy Tuk Mil Jëmëjt ets ko yˈakˈyaˈijxmatstëdë naxwinyëdë jäˈäy? ¿Wiˈixë anklëstëjk nyayjyawëyäˈänëdë etsë naxwinyëdë jäˈäy ko netyë Jyobaa xyëëw të dyajwäˈätsy? Parë nnijäˈäwëm, tsojkëp njamyajtsëm wiˈixë Satanás ojts tnibëdëˈëky ja Jyobaa kutujkën jam Edén ets ko jyënany ko nituˈugë  naxwinyëdë jäˈäy tkamëmëdowäˈänyë Jyobaa. Mä taabë tiempë, të nety ja naxwinyëdë jäˈäy yˈakˈyaˈijxmatstë ets të nety jyëmbijnëdë wäˈätsjäˈäy, jamë nety jyukyˈäjnëdë mä ja it lugäärë tsujpë. Kyaj nyekytsyokäˈänyëty parë dyajnigëxëˈëktët pën myëmëdowandëbë Jyobaa o kyaj. Të nety nanduˈun nyigëxëˈëky ko yëˈëyë Jyobaa mëdiˈibë myëdäjtypyë madakën parë yˈanaˈamët. Mä taabë tiempë, niˈamukë naxwinyëdë jäˈäy etsë anklëstëjk të nety tkupëktë ko Jyobaa yëˈë mas oy anaˈamp. Per ¿wiˈixë net wyëˈëmäˈäny ja Jyobaa xyëëw?

Mä taabë tiempë të nety ja xyëëw wyaˈatsy ets kyaj nety pën mëdiˈibë ja xyëëw niwäämbatëdëp. Per pënaty jukyˈäjttëp yä Naxwiiny ets tsäjpotm, duˈunyëm mëj dyajnaxäˈändë Jyobaa xyëëw. ¿Tiko duˈun njënäˈänëm? Yëˈko duˈunyëm myonyˈixäˈän myonyjyawëyäˈändë mä tukëˈëyë tijatyë Jyobaa tyuumpy. Extëm nˈokpëjktakëm, ko netyë Jesus ttukëdëkë ja kutujkënë Tyeety, ta Jyobaa “tmëdäjtäˈäyët tëgekyë yˈanaˈamën patkëˈëy oytyim diˈibëty” (1 Kor. 15:28). Ets pënaty jukyˈatandëp yä Naxwiiny, ta tpäädäˈändë “ja awäˈätstuuyˈäjtën es ja kunuˈxën diˈibë pyäättëp ja Diosë yˈuˈungëty” (Rom. 8:21). Jaanëmë net yˈadëwäˈäny mëdiˈibë Jyobaa ojts ttuknibëjktäägë ko ja yˈuˈunk yˈënäˈk yajpäättët tuˈugyë duˈun jam tsäjpotm ets yä Naxwiiny (Éfes. 1:10).

Ets ¿wiˈixë net nyayjyawëyäˈänëdë niˈamukë Jyobaa yˈuˈunk yˈënäˈk ko duˈun tˈixtët? Seguurë ko amumduˈukjot nëjkx tmëjkumayäˈändë Diosë xyëëw, duˈun mëdiˈibë jukyˈäjttëp yä Naxwiiny ets tsäjpotm. David duˈun tkujäˈäyë: “Waˈan dyajmëjkumayë Jyobaa Dios […]. Waˈanë xyëëw tˈity mëjkumay winë xëëw” (Sal. 72:18, 19). Xëmëkyëjxm nˈixyˈatäˈänëmë Jyobaa ets nbëkäˈänëmë kuentë tiko mbäät nmëjkumäˈäyëmë xyëëw.

Extëm nˈijxëm Jyobaa xyëëw yëˈë yˈandijpy wiˈix jyaˈayˈaty. Pääty ko nwinmäˈäyëmë xyëëw, ta njamyajtsëm ko yëˈë tuˈugë Dios mëdiˈibë tsojkp (1 Fwank 4:8). Nˈokjamyajtsëm xëmë ko päätyë Jyobaa ojts xyajkojëm mët ko xytsyojkëm ets ojts xyjyuuybyëtsëˈëmëm mëk xytsyojkëm. Të nanduˈun xytyukˈijxëm ko yëˈë mëdiˈibë oy anaˈamp mët ko xytsyojkëm. Ets nˈixäˈänëm wiˈixë Jyobaa mëjwiin kajaa xykyunuˈkxëm mët ko xytsyojkëm. Winë xëëw winë tiempë niˈigyë nmëwingonäˈänëmë Jyobaa ets nyajmëjpëtsëmäˈänëm ja xyëëw (Sal. 73:28).