Jyobaa tyestiigëty kyajts nmëjtundë kumpleˈanyë mët ko seguurëts nˈittë ko Dios kyaj ttukjotkëdaˈaky. Mä Biiblyë kyaj mää jyënaˈany: “Kyaj xytyunëdë kumpleˈanyë”, per myaytyakypy diˈib mbäät xytyukjaygyujkëm wiˈixë Dios tˈixy. Min nˈokˈijxëm taxk pëky tikots kyaj ndundë kumpleˈanyë ets wiˈixë Biiblyë jyënaˈany.

1.   Kumpleˈanyë jam tsyoony mä relijyonk diˈib kyaj tyëyˈäjtënëty. Tuˈugë diksionaaryë jyënaˈany ko päätyë jäˈäy ttundë kumpleˈanyë mët ko tmëbëktë ko mä dyaˈˈabetyë jyëmëjt ja nyiminyëty “ja tsuu poj parë yˈaxëktunäˈänyëty”, ets ko “mbäät kyuwäˈänyëty ko jyamˈatët ja myëtnaymyaayëbëty ets ko yajtukmëtsokët parë tmëdatët oyë suertë” (Funk & Wagnalls Standard Dictionary of Folklore, Mythology, and Legend). Ja tuˈugë liibrë jyënaˈany ko yajjääybyajtp ijty näˈä jäˈäy myaxuˈunkˈaty, “net yajnijawët ti signo tukäˈäjëp mä horóscopo”, duˈun tyukniˈˈixëdë pënaty nyiˈëxpëjkëdëbë astrología o diˈib yajniwij yajnikajtëbë mëtsäˈä. Tyäˈädë liibrë nanduˈun jyënaˈany: “Mayë jäˈäy tmëbëktë ko yajpëjtaˈagyë seerë mä kumpleˈanyë myëdäjtypyë magia parë yajkuytyunët tijaty ja jäˈäy tsyojkënyëˈajtypy” (The Lore of Birthdays).

    Perë Biiblyë yajkubojkypyë magia, xëwëj xëmaaky, brujëˈäjtk ets “oytyim tiijëty diˈib duˈun extëmë tyäˈädë” (Deuteronomio 18:14; Galasyʉ 5:19-21). Päätyë Dios ttukumëdooy ja Babilonia käjpn mët ko yajniwij yajnikajtëbë nety ja mëtsäˈä (Isaías 47:11-​15). Ëëtsëty Jyobaa tyestiigëty kyajts yëˈë ndimpayoˈoytyë mä tsyoony tuˈuk tuˈugë kostumbrë o xëë diˈibë jäˈäy tyuundëp, per ko Biiblyë yajxon tnigajpxy ko kyaj yˈoyëtyë brujëˈäjtk, tajëts njëjpkudijëdë.

2.   Pënaty tim jawyiin ojts tpanëjkxtë Jesus kyaj tmëjtuundë kumpleˈanyë. Tuˈugë enciclopedia jyënaˈany ko pënaty tim jawyiin pyanëjkxtë Jesus, duˈun “tˈijxtë oytyim diˈibëtyë kumpleˈanyë extëm tuˈugë kostumbrë diˈib tyuundëp pënaty kanäägë dios yˈawdäjttëp” o diˈib tsoˈomp mä relijyonk diˈib kyaj tyëyˈäjtënëty (The World Book Encyclopedia). Biiblyë nyigajpxypy ko ja apostëlëtëjk ets pënatyë Jesus panëjkxë, ojts dyajnaxkëdäˈäktë tuˈugë ijxpajtën diˈib mbäät tpanëjkxtë niˈamukë pënaty myëbëjktëbë Jesus (2 Tesalónikʉ 3:6).

3.   Tuˈuk jeˈeyë xëë diˈib ojts yajtukˈanaˈamdë tmëjtundët pënaty ojts tpanëjkxtë Jesus, yëˈë ja yˈoˈkën xëë, kyaj yëˈëjëty mä myaxuˈunkˈäjty (Lukʉs 22:17-​20). Kyaj tiko tëgatsy nmëdoˈowëm, pesë Biiblyë jyënaˈany ko “mas oy ja xëë mä [jäˈäy] yˈooky ets kyaj dyuˈunëty ja xëë mä myaxuˈunkˈaty” (Eclesiastés 7:1). Ko netyë Jesus yˈooganë, të nety Dios windum oy dyajwëˈëmy ja xyëë. Pääty niˈigyë jyëjpˈamëty ja xëë mä ojts yˈooky ets kyaj dyuˈunëty mä myaxuˈunkˈäjty (Ebreeʉsʉty 1:4).

4.   Mä Biiblyë nituˈugë Dios mëduumbë kyayajmaytyaˈaky diˈib tyuunë kyumpleˈanyë. Tyäˈädë kyaj yëˈë tˈandijy ko yˈijxtëgooytyë, pes mä Biiblyë yajkujäˈäyë majtskë kumpleˈanyë, per yëˈë tyuundë jäˈäy diˈib kyaj Dios mëdundë. Tyäˈädë majtskpë kumpleˈanyë kyaj oy yajnimaytyaˈaky (Génesis 40:20-​22; Markʉs 6:​21-​29).

 Jyobaa tyestiigëty duˈun ttsoktë yˈuˈunk yˈënäˈk extëm oytyim pënëtyë uˈunkteety diˈib oyjyaˈay, pääty tmoˈoytyë ryegalë oytyim näˈäjëty ets tyuunëdëbë xyëë parë jotkujk nyayjawëdët. Tyuundëbë mëjää parë tpanëjkxëdë Diosë yˈijxpajtën diˈib nyayajkypy tijaty oytyim näˈäjëty (Matewʉ 7:​11). Päätyë Testiigë yˈuˈunk yˈënäˈk kyaj wyinmaytyë ko kyaj jotkujk yajpäättë ko kyayajtunyë kyumpleˈanyë. Min nˈokˈijxëm wiˈix nääk jyënäˈändë:

•   Tammy diˈibë jyëmëjt mäjmajtsk, jyënaˈany: “Jantsy oy nnayjäˈäwëm ko ajotkumonë nyajmoˈoyëm tuˈugë regalë”.

•   Gregory diˈibë jyëmëjt mäjktuˈuk, jyënaˈany: “Kyajtsë ndääk ndeety xymyoˈoyë regalë kojëtsë njëmëjt nyaˈˈabety, per xymyooytyëbëts oytyim näˈäjëty. Jantsy oyëts nnayjawëty kojëts ajotkumonë tijaty nyajmoˈoy”.

•   Eric diˈibë jyëmëjt tëdujk, jyënaˈany: “Ënäˈkuˈungëty jeˈeyë tkaytyë pastel ets yˈëwdë. Kyajtsë duˈumbë xëë nˈoyˈixy, niˈigyë yˈoyëty extëmëts nxëdundë mäjëtsë ndëjk”.