Tijaty tyam tyuundëbë Jyobaa tyestiigëty, ja tsyondaky mä nety jyëjpkëxanë siiglë 19. Mä tadë tiempë, tuk grupë jäˈäy diˈib yˈëxpëjktëbë Biiblyë jap Pittsburgh (Pensilvania, Estados Unidos) ojts ttukniwinmayëdë wiˈix tˈëxpëkäˈändë Biiblyë. Mä tpayoˈoytyë ojts tˈijxkijpxyëdë wiˈixë jäˈäy yaˈëxpëky mä tsäjptëjk ets wiˈixë Biiblyë tyukniˈˈixë. Ta net tnimaytyaktë diˈib yˈëxpëjktë. Dyajpëtsëëmdë liibrë, tjääytyë artikulo parë pyëtsëmët mä perioodikë ets dyajpëtsëëmdë rebistë diˈib tyam nˈixyˈäjtëm Diˈib Xytyukˈawäˈänëm. Yëˈë nyigajpxypyë Jyobaa yˈAnaˈamën.

 Niduˈuk diˈib tuun, yëˈë Charles Taze Russell, yëˈë diˈib tim jawyiin yajpëtsëëmë rebistë Diˈib Xytyukˈawäˈänëm ets diˈib yˈijx wiˈix yajtunët ja tuunk mä jäˈäy yajtukniˈˈixëdë Biiblyë. Per oy duˈun tyuuny, kyaj yëˈë dyajnaxkëdakyë jembyë relijyonk. Diˈib tyukniwinmäˈäyë Russell mët pënaty yˈËxpëjktëbë Biiblyë (duˈun yaˈixyˈäjttë), yëˈë dyaˈëxpëkäˈändë jäˈäy extëmë Jesukristë tyukniˈˈijxë ets ttunäˈändë tijaty extëmë nety të dyajnaxkëdäˈäktë pënaty pyanëjkxtë Kristë mä primer siiglë. Ets komë Jesus yëˈë yajnaxkëdak parë jäˈäy pyanëjkxëdët, ta yajjaygyukë ko yëˈë diˈib yajtsondak (Kolosʉ 1:18-20).