Jesus jyënany ko ja oybyë ayuk mä yajnimaytyaˈagyë Diosë Kyutujkën yajkäjpxwäˈkxäˈäny abëtsemy nyaxwinyëdë (Matewʉ 24:14). Desde 1909, Jyobaa tyestiigëty tkäjpxnaxtë amxanë ëxpëjkpajn diˈib miimp mä Biiblyë, duˈun tpudëkëdë jäˈäy abëtsemy nyaxwinyëdë parë tmëdowdët mä yajnimaytyaˈagyë Diosë yˈAnaˈam Kyutujkën mä kyëˈëm ayuk. Abëtsemy nyaxwinyëdë, Chino yëˈë diˈib mas mayë jäˈäy kyäjpxtëp, ta net jaayë amxan, diˈib kyäjpxtëp naa 500 miyongënë jäˈäy.

William, diˈib kyäjpxnäjxypyë ëxpëjkpajn amxan, jyënaˈany: “Amxan yëˈë tuˈugë ayuk diˈib abëtsemy nyaxwinyëdë jäˈäy kyäjpxtëp, pes yajkajpxy kanäk paˈis, oy wiˈixë jäˈäy tmëdattëdë kostumbrë”. Ta yˈakjënäˈäny: “Diˈibëts ntsojktëp kojëts ngäjpxnaxtë, yëˈë parë jyotjäˈtëdët pënaty kyäjpxtëbë ëxpëjkpajn, oy mä tsyoondët, oy wiˈixëmë ëxpëjkënë tmëdattët ets oy myëkjäˈäyëty o yˈayoobë jäˈäyëty”. Ets parë jäˈäy tjaygyukëdët oy mä tsyoondët, yëˈë käjpxnäjxtëp pënaty tsoˈondëp Argentina, Colombia, El Salvador, Estados Unidos, Guatemala, Nëwinm, Puerto Rico, Uruguay, Venezuela ets nanduˈun diˈib España.

Kanäk jëmëjtë Jyobaa tyestiigëty tkäjpxnäjxtë ëxpëjkpajn amxan jap Estados Unidos, ets yëˈë tuundë diˈib tsoˈondëp Argentina, España ets Nëwinm. Per mä jëmëjt 1993, ta ojts yajmënëjkxtë Puerto Rico parë jap tuˈugyë tyundët.

Ets marsë 2012, ta yajtukniwinmäˈäyë parë pënaty käjpxnäjxtëp amxan, yajmënëjkxtët mä Jyobaa tyestiigëty tmëdattë sukursal jap España. Edward jyënaˈany: “Kyaj jeˈeyë ojts yajmënëjkxtë jäˈäy, nanduˈun tijaty myëdäjttëp ets diˈib nanduˈun ojts dyajnëjkxtë, yëˈë ja bibliotekë diˈib mas jëjpˈam yajtuundëp parë kyäjpxnaxtë”. Mä tyäˈädë bibliotekë yˈity naa 2,500 liibrë ets mëgoˈpxˈam, yëˈë Biiblyë diˈibë jäˈäy të tkäjpxnaxtë amxan.

Ets 29 äämbë mayë 2013, ojts jyäˈttë España pënaty kyäjpxnäjxtëbë amxan parë jap tyundët, jantsy oy ojts yˈagëˈë yˈaxäjëdë pënaty tuundëp Betel. Tyuknäjxtë Océano Atlántico parë jyäjttë España, nanduˈun ojts tmënëjkxtë ja liibrë diˈib yajtuundëp ets tijaty myëdäjttëp. Ets mët ko yajxon yajtukniwijtsë ets mëk tyuundë, ta kyaj të tyuˈuwëˈëmë ëxpëjkpajn diˈib kyäjpxnäjxtëp. Edward yˈakjënaˈany: “Diˈib mas jëjpˈam, yëˈë ko yajnimaytyaˈagyë Diosë yˈAnaˈam Kyutujkën. Ets ntsojktëbëts parë mayë jäˈäy tkäjpxtëdë ëxpëjkpajn diˈib pëtsëëmp amxan”.