Jyobaa tyestiigëty yaˈixyˈattë mët ko yˈëwäˈkx kyäjpxwäˈkxtë tëjkmdëjkm. Per tyam, nan käjpxwäˈkxtëp mä tnadanëdë karruˈunk mä mayë jäˈäy nyaxtë.

Tyää näämnëm, niˈigyë duˈun tjotmoˈoytyë tyäˈädë tuunk. Ja duˈun ttuuntsondaktë nobiembrë 2011 mä siudad diˈib Nueva York. Tuk grupë Testiigë duˈun tyuundë parë jäˈäy tnijawëdët ja tëyˈäjtën diˈib yajpatp mä Biiblyë. Kom jantsy oy wyimbëtsëëmy, ta nanduˈun yajtukniwinmäˈäyë parë duˈun yajtunët mä wiinkpë siudad.

Parë marsë 2015, ja kujk yajkexyë karruˈunk 165,390 mäjaty tyuˈukmuktë Jyobaa tyestiigëty. Nanduˈun milˈamë meesë o mä dyaˈixëdë ëxpëjkpajn.

Jyobaa tyestiigëty duˈunyëm jëjpˈam dyajnaxtë ko yˈëwäˈkx kyäjpxwäˈkxtë tëjkmdëjkm parë jäˈäy ttukniˈˈixëdë tëyˈäjtën diˈib mä Biiblyë. Per nan oy wyimbëtsëmy ko tpëjtäˈäktë karruˈunk. Min nˈokˈijxëm tuˈuk majtsk wiˈix wyimbëtsëmy.

Jap Perú, tuˈugë yetyëjk diˈib xyëˈäjtypy Raul tmëwingoony ja Testiigëty diˈibë nety jam nyadënääytyëp ja karruˈunk ets tˈanmääy: “¿Mä nety miitsëty? Tëgëk jëmëjt kujk nˈëxtääynyëdë ets kojëts të nˈixyë mgarruˈungëty, tajëts të ngukäjpxë mä Dios”.

Mä tsyëënë Raul, tamë netyë Jyobaa tyestiigëty kyäjpxwäˈkxtë, per kyaj nety tyimˈyajpääty ni sëmäänoty ets ni sääbëdë domingë. Raul ta jyënany ko të nety yˈokˈëxpëjkpë mëdë Jyobaa tyestiigëty ets ko yˈëxpëkaambyë nety jatëgokë Biiblyë. Ta ja nmëguˈukˈäjtëm ttukniwijtsëdë parë jatëgok yˈëxpëkët.

Jap Bulgaria, tuˈugë kasäädë jäˈäy ojts tniwäˈkˈawë mä nety ja ëxpëjkpajn të yajpëjtaˈaky ets ta ojts tkonyë liibrë El secreto de la felicidad familiar. Ja kyum sëmään, ta jatëgok jyëmbijty ets ojts tkony majtskë liibrë Maytyaˈaky diˈib miimp mä Biiblyë etsë Aprendamos del Gran Maestro. Ta ja Testiigë diˈibë nety nyadënaapy ja karruˈunk dyajtëëy näägë netyë yˈuˈunk tmëdattë. Ta ja kasäädë jäˈäy yˈatsoowdë: “Nituˈuknëm, per pën jaajëts näˈä nmëdattë, ntsojktëbëts parë tˈixyˈatëdë Dios. Etsë tyäˈädë liibrë yëˈë duˈun diˈibëts nyajtëgoyˈäjttëp”.

Jap Ucrania, tuˈugë yetyëjk diˈib tuump soldäädë mëdë syoldäädë wit tnimëjwaˈky ja ëxpëjkpajn ets jyënany: “Toˈoxyˈënäˈkëty anmaagyëts näˈä myinäˈänyë Armajedon”. Tyäˈädë yetyëjk, të nety näämnëm tsyiptuny mä ja tsip diˈib tuunë Ucrania. Ets diˈib yaˈijtë seguurë ko tim tsojk myinäˈänyë Armajedon, yëˈë tijaty yˈijxypy tyuny jyatyëty abëtsemy nyaxwinyëdë, per ta nyayajtëëwë tiko netyë Dios ti tkatuny. Ta ja Testiigëty ttukmëtmaytyaktë mëdë Biiblyë tiko Dios tkayajminynyëmë Armajedon, per ko tim tsojk dyajjëjptëgoyaˈanyë axëkˈäjtën. Ja yetyëjk ta ojts tˈaxäjë rebistë Diˈib Xytyukˈawäˈänëm etsë ¡Despertad!, etsë liibrë ¿Existe un Creador que se interese por nosostros?

Jap Macedonia, tuˈugë mixy myëjwaˈky mä nety ja Testiigëty tnadanëdë ja karruˈunk, ets jyënany ko të nety tkajpxyë rebistë ets ko yëˈë nety tsyejpyë liibrë ¿Ti tëyˈäjtën jantsy tukniˈijxëbë Biiblyë? Ko yajmooy ta netyë jyënany ko nyëjkxäˈäny mä bibliotekë parë tkäjpxtsondäˈägäˈäny.

Kyum majtsk oorë, ta jyëmbijty të nety tkajpxy axtë pajina 79, ta jyënany: “Tyäˈädë liibrë të dyajtëgatsyëtsë njukyˈäjtën. Ets tëjëts nbëkyë kuentë ko kyaj may tyëyˈäjtënëty diˈibëts nmëbëjkypy. Yajjaygyujkëp extëm tnimaytyaˈagyë tyäˈädë liibrë. Tyam tim tëgatsyëtsë net nˈixyë jukyˈäjtën”.