Tuˈugë organisasion diˈib pyudëjkëbë jäˈäy Inglaterra, ojts dyakyë premië Diana, ets yëˈë myooy tuˈugë mixyuˈunk diˈib mäjkë jyëmëjt diˈib xyëˈäjtypy Hugo, mët ko tpudëkë myëˈeskuelëˈˈënäˈk parë twinguwäˈägëdët ko myëguˈuktëjk axëëk tyunëdë.

Hugo jyënaˈany: “Tyäˈädë premië të nˈaxäjëts mët yëˈëgyëjxmë bideo Cómo defenderte sin dar un solo golpe, diˈib yajpatp mä sitio jw.org. Tyäˈädë bideo yëˈëjëts të xytyukniˈˈixë parëts nitsiptunët pënaty axëëk tuunëdëbë myëˈeskuelëˈˈënäˈk”.

Ko Hugo ttukˈijxyë tyäˈädë bideo ja myaˈestrëtëjk, ta ttukniwijtsëdë parë niˈamukë ja eskuelëˈˈënäˈk mbäät tyëkëdë mä sitio jw.org. Nimaybyë ja myëˈeskuelëˈˈënäˈk, diˈibë jyëmëjt tuktujk ets mäjk tyëkëdë tyam janäämëty mä tyäˈädë sitio. Ets jyënäˈändë ko kyaj jeˈeyë pyudëkëdë mä myëˈeskuelëˈˈënäˈk axëëk tyunëdë, nanduˈun pyudëkëdë parë tnijawëdët wiˈix yaˈˈatsoowëmbity tijaty nayajtëëwëdëp, extëm wiˈix tpäättëdë oybyë myëtnaymyaayëbë.

Mä jatuˈugë eskuelë diˈib Inglaterra, Elijah jatuˈugë mixyuˈunk diˈib tuktujkë jyëmëjt, nanduˈunë nety axëëk tyunyëtyë myëguˈuktëjk. Pääty tˈijxtë mëdë fyamilyë tyäˈädë bideo Cómo defenderte sin dar un solo golpe, ta net ojts ttuundäˈäktë wiˈix tˈanëëmëdët ja myëguˈuktëjk ko nyibëdëˈëgëdët ets ti tyunëp. Tyäˈädë yëˈë diˈib jotmëkmooyë parë twinguwäˈägëdë tyäˈädë jotmay. Ok, ko ttukjäjty tuˈugë sëmään mä yajmaytyaˈaky eskuelë wiˈixë ënäˈkuˈunk nyaytyuunëdë axëëk, ta ja Elijah myaˈestrë ttukˈijxyë bideo niˈamukë ja ënäˈkuˈunk.

Perë kyaj jeˈeyë duˈun jyajty Inglaterra, nanduˈun jyaty abëtsemy nyaxwinyëdë. Etsë tyäˈädë bideo Cómo defenderte sin dar un solo golpe pyudëjkëbë ënäˈktëjk oytyim määjëty.

Jap Estados Unidos, Ivie tuˈugë kixyuˈunk diˈib mäjkë jyëmëjt, tsyëˈkëbë nety tuˈugë myëguˈuk diˈib mëët yˈeskuelëˈaty mët ko axëëk tyunyëty. Per ko tˈijxyë bideo Cómo defenderte sin dar un solo golpe, yëˈë jotmëkmooyë parë twinguwäˈägëdë tyäˈädë jotmay. Nan myëtmaytyak ja myaˈestrë diˈib pudëjkë parë kyaj axëëk nyekyyajtunët. Ja kixyuˈunk diˈibë nety axëëk tuunëbë Ivie, ojts tˈamdoyë maˈkxën ets tyam oy nyaymyënëjkxëdë.

Jyobaa tyestiigëty naytyukjotmaytyuunëdëbë ënäˈktëjk. Pääty duˈunyëm tijaty dyajpëtsëmäˈändë diˈib mbäät pyudëkëdë parë twinguwäˈägëdët ja jotmay diˈib pyattëp tuˈuk tuˈugë xëë, extëm ko myëˈeskuelëˈˈënäˈk tyunëdë axëëk.