LECCIÓN 07
¿Na̱sa kaa Jeová?
Ta jani ini-ní sɨkɨ Jeová, ¿na̱sa jani ini-ní ja kaa-Ya? ¿A jani ini-ní ja ndíchi tuni-Ya de ji̱ka tuni iyo-Ya, tanu nda ki̱mi nu̱u̱ ɨn galaxia ja iyo ji̱ka tuni? ¿Axi jani ini-ní ja ɨn ja ndakui tuni kuu-Ya de kaa-Ya, tanu ɨn sa̱vi tachí jín taja? ¿Na̱sa kaa ndija Jeová? Nu̱u̱ tuʼun-Ya, ja kuu Biblia, Jeová steʼen-Ya jaku na̱sa kaa-Ya ji suni ja ñúʼun ini-Ya ja kuu maa-ní.
1. ¿Nakú nduu kuu kundeʼe-yo Yandios?
“Ya̱a̱ Dios cúu Espíritu” (Juan 4:24). Jeová nduu nevaʼa-Ya ɨn yɨkɨ kuñu. Maa-Ya kuu ɨn espíritu ja ndee andɨvɨ́, ɨn nu̱u̱ ja suni ma kuu kundeʼe-yo.
2. ¿Nde kuu sava nda ja vaʼa ini ja nevaʼa Jeová?
Vese nduu kuu kundeʼe-yo Jeová, ta jíni̱ yoʼo-Ya kejaʼa-yo kutoo yoʼo-Ya chi iyo ndija-Ya de vaʼa tuni ini-Ya. Biblia kachi: “Jeová kutoo-Ya tiñu nda̱a̱ de ma sndoo̱-Ya ñayí iñi tu̱u̱n nu̱u̱-Ya” (Salmo 37:28, TNM). “Chi cúndáʼví ndasí ini̱ ya̱ yóʼó, de va̱ʼa ndasí ini̱ ya̱ jíín ó”, de viʼi ka jín nda ñayí ja ka ndoʼo (Santiago 5:11). “Jeová iyo ñati-Ya nu̱u̱ nda ñayí kukuéká anu; skáku-Ya nda ñayí ja nuu ini-ji” (Salmo 34:18, TNM). ¿De a jíni̱-ní ja tiñu ja saʼa-yo kuu saʼa ja koo sii ini axi kukuéká ini Jeová? Ñayí ja kúni-ji ja saʼa-ji tiñu ja nduu iyo vaʼa saʼa kuéká-ji ini Jeová de saʼa-ji ja ta juʼvi ini anu-Ya (Salmo 78:40, 41, TNM). De ñayí ja saʼa ja iyo vaʼa saʼa sii-ji anu Jeová (kaʼvi-ní Proverbios 27:11, TNM).
3. ¿Na̱sa steʼen Jeová ja kutoo-Ya yoʼo?
Ɨn ja vaʼa tuni ka ini Jeová kuu ja too ini-Ya. De ja nda̱a̱, “Yandios kuu ja too ini” (1 Juan 4:8, TNM). Jeová jatiñu-Ya Biblia jín nda ndatiñu ja ni saʼa-Ya tágua steʼen-Ya ja kutoo-Ya yoʼo (kaʼvi-ní Hechos 14:17). Tanu kuu, kani ini-ní, na̱sa ni saʼa-Ya nda-yo. Ni saʼa-Ya yoʼo tágua kuu kundeʼe-yo nda color ja vii tuni ji tágua kusii ini-yo jín yaa̱ ji nda ndeyu ja vaʼa tuni yaji. Kúni-Ya ja na koo sii ini-yo.
NÁ KUTUʼVA KA-YO SƗKƗ TUʼUN YAʼA
Ná kundeʼe-yo naguá jatiñu Jeová tágua saʼa-Ya tiñu ja saʼvi ini. Ji ñukua de kundeʼe-yo na̱sa steʼen-Ya ja vaʼa ini-Ya nu̱u̱-yo.
4. Espíritu santo: yaʼa kuu ja ndakui Yandios ja satiñu
Maa-yo jatiñu-yo ndaʼá-yo tágua satiñu-yo, de Jeová jatiñu-Ya espíritu santo-Ya. Biblia nduu kachi ja espíritu santo kuu ɨn ñayí, chi kuu ja ndakui ja jatiñu Jeová tágua saʼa-Ya ndɨʼɨ ja kúni-ya. Ka kaʼvi-ní Lucas 11:13 ji Hechos 2:17, de ka ndatuʼun-ní sɨkɨ nda tuʼun yaʼa:
-
Yandios taji-Ya espíritu santo-Ya nu̱u̱-yo nú kakan-yo nu̱u̱-Ya. Nusaá ¿a jani ini-ní ja espíritu santo kuu ɨn ñayí axi ja ndakui Yandios, ja satiñu? ¿Nakú jani ini-ní sukua?
Jeová jatiñu-Ya espíritu santo-Ya tágua saʼa-Ya tiñu ja saʼvi ini. Ka kaʼvi-ní Salmo 33:6, TNM ji 2 Pedro 1:20, 21, de ka ndatuʼun-ní sɨkɨ nda tuʼun yaʼa:
-
¿Na̱sa ja jatiñu Jeová espíritu santo-Ya?
5. Jeová nevaʼa-Ya ja vaʼa ini ja taʼa̱n ini-yo
Moisés ni satiñu tu̱u̱n-de nu̱u̱ Yandios. Vese saá, ni kúni-de ja kuni vaʼa ka-de Yandios. Ñukua kuu ja Moisés ni kachi-de nu̱u̱-Ya: “Steʼen-ro ichi-ro nu̱u̱-ni tágua kuu kuni-ni ndoʼo” (Éxodo 33:13, TNM). Jeová ni kaʼan-Ya jín-de sɨkɨ sava nda ja vaʼa ini-Ya. Ka kaʼvi-ní Éxodo 34:4-6, TNM de ka ndatuʼun-ní sɨkɨ nda tuʼun yaʼa:
-
¿Nde kuu nda ja vaʼa ini ja ni kachi Jeová nu̱u̱ Moisés?
-
¿Na ja vaʼa ini Jeová kuu ja taʼa̱n ka ini maa-ní?
6. Jeová ndɨʼvɨ ini-Ya ja kuu nda ñayí
Nda hebreo, ñuu Yandios nde janaʼán ni ka kuu esclavo ñuu Egipto. ¿Na̱sa ni kuu ini Jeová ta ni ndeʼe-Ya ja ñuu-Ya ni ndoʼo-ji? Kunini-ní AUDIO ji kundiki̱-ní ja kaʼvi, axi ka kaʼvi-ní Éxodo 3:1-10, TNM. Ñukua de ka ndatuʼun-ní sɨkɨ nda tuʼun yaʼa:
-
¿Naguá steʼen tuʼun yaʼa nu̱u̱-ní sɨkɨ na̱sa kuu ini Jeová ta ndeʼe-Ya ja ndoʼo ñayí? (Ka kundeʼe-ní nda versículo 7 ji 8).
-
¿A káʼán-ní ja Jeová kuu ndija ini-Ya chindeé-Ya nda ñayí? ¿A káʼán-ní ja kuu saʼa-Ya? ¿Nakú jani ini-ní sukua?
7. Nu̱u̱ nda ndatiñu ja ni saʼa Jeová ndeʼe-yo nda ja vaʼa ini-Ya
Jeová jatiñu-Ya nda ndatiñu ja ni saʼa-Ya tágua steʼen-Ya nu̱u̱-yo na̱sa kaa-Ya. Ka kundeʼe-ní VIDEO. Ñukua de ka kaʼvi-ní Romanos 1:20 de ka ndatuʼun-ní sɨkɨ nda tuʼun yaʼa:
-
¿Na ja vaʼa ini Jeová ndeʼe-ní nu̱u̱ nda ndatiñu ja ni saʼa-Ya?
JA KACHI SAVA NDA ÑAYÍ: “Yandios kuu ɨn ja ndakui ja iyo nɨkaʼnu, nduu kuu-Ya ɨn ñayí ja kuu kuni-yo”.
-
¿Na̱sa jani ini-ní?
-
¿Nakú jani ini-ní sukua?
JA NI KUTUʼVA-YO
Jeová kuu-Ya ɨn espíritu de ñukua kuu ja ma kuu kundeʼe yoʼo-Ya. Nevaʼa-Ya ja vaʼa tuni ini, de nu̱u̱ ndɨʼɨ nda ja yaʼa ja niji̱ ka kuu ja too ini.
Tuʼun núku̱ʼun ini
-
¿Nakú nduu kuu kundeʼe-yo Jeová?
-
¿Naguá kuu espíritu santo?
-
¿Nde kuu sava nda ja vaʼa ini Jeová?
NU̱U̱ NDANIʼI KA-NÍ TUʼUN
Kuni vaʼa ka-ní sɨkɨ Jeová ta kutuʼva-ní kumi ja vaʼa tuni ja iyo ini-Ya.
Kundeʼe-ní na tuʼun nda̱a̱ iyo ja Jeová nduu iyo-Ya yaʼa ji ñukua.
“¿A iyo Yandios yaʼa ji ñukua? ¿A iyo Yandios nɨkaʼnu?” (Artículo nu̱u̱ jw.org)
Kundeʼe-ní nakú Biblia kachi ja espirítu santo kuu tanu “ndaʼá” Yandios.
Ɨn teé kuáá víjin ni kuu nu̱u̱-de ja kandija-de ja Yandios ndɨʼvɨ ini-Ya sɨkɨ-de. Kundeʼe-ní naguá ni saʼa ja ni sa̱ma-de ja ni jani ini-de.
“Mita jíni̱-sa ja kuu chíndeé-sa sava ka ñayí” (La Atalaya, 1 yo̱o̱ octubre kuiya 2015)