LECCIÓN 23
Ja janduté: ɨn ja vaʼa ja kuu chuʼun ini-ní saʼa-ní
Jesús ni steʼen-de ja tágua kuu-yo cristiano jiniñuʼun kuanduté-yo (kaʼvi-ní Mateo 28:19, 20). ¿De naguá kuu ja janduté? ¿De naguá jiniñuʼun saʼa ɨn ñayí tágua kuu kuanduté-ji?
1. ¿Naguá kuu ja janduté?
Tuʼun janduté kuu ɨn tuʼun ja vaji nu̱u̱ yuʼu griego ja kúni kaʼan “kusa̱ʼvi”, axi, ja kee chijin ndute. Ta Jesús ni janduté-de, ni sa̱ʼvi-de nu̱u̱ yúte Jordán, de ñukua “ni̱ nquee ya̱” nu̱u̱ “ndute” (Marcos 1:9, 10). Ta nda cristiano nda̱a̱ ka janduté, suni ka sa̱ʼvi ndɨʼɨ-de nu̱u̱ ndute.
2. ¿Naguá steʼen ɨn ñayí ta janduté-ji?
Ta ɨn ñayí janduté-ji, steʼen-ji ja ni nakuáʼa-ji maa-ji nu̱u̱ Jeová. ¿De naguá jiniñuʼun saʼa-yo tágua nakuáʼa-yo maa-yo nu̱u̱ Jeová? Jiniñuʼun saʼa-yo ɨn sáʼan nu̱u̱ Yandios de kachi-yo ja kúni-yo satiñu-yo nu̱u̱-Ya nɨkani. De yaʼa jiniñuʼun saʼa-yo ta nchaʼa kuanduté-yo. Nu̱u̱ sáʼan ñukua, ñayí ja kúni-ji nakuáʼa-ji maa-ji nu̱u̱ Jeová kachi-ji ja chiñuʼun-ji matuʼun ni̱ Jeová de ja kánuu ka nu̱u̱-ji kuu ja saʼa-ji ja kúni Yandios. De suni, ka̱ji-ji kundiki̱-ji ejemplo ji ja steʼen Jesús, ja ni kachi-de: “Na̱-ni nchivi̱ tú cúni̱ ji cuniqui̱n ji nduʼu̱ [...], de ná cási̱ ji ja̱ cúni̱ maá ji, de ná cúniqui̱n ji nduʼu̱” (Mateo 16:24). De ja sɨkɨ ja ni nakuáʼa-ji ji ja ni janduté-ji, ñayí ñukua kuu kitaʼan vaʼa-ji jín Jeová ji nda ñayí ja chiñuʼun nu̱u̱-Ya.
3. ¿Naguá jiniñuʼun saʼa-yo tágua kuanduté-yo?
Nú kúni-ní kuanduté-ní, xinañuʼun jiniñuʼun kutuʼva-ní sɨkɨ Jeová ji kunevaʼa-ní fe nu̱u̱-Ya (kaʼvi-ní Hebreos 11:6). Iini kutuʼva ka-ni sɨkɨ Jeová ji nevaʼa-ní fe sɨkɨ-Ya kutoo ka-ní nu̱u̱-Ya. De ñukua saʼa ja kúni-ní kaʼan-ní sɨkɨ Tuʼun-Ya ji kundee-ní tanu tetiñu Tuʼun-Ya (2 Timoteo 4:2; 1 Juan 5:3). Ta ɨn ñayí ndee-ji tanu “jétaʼa̱n ini̱ ya̱”, nusaá kuu nakuáʼa-ji maa-ji nu̱u̱ Yandios de kuanduté-ji (Colosenses 1:9, 10). a
NÁ KUTUʼVA KA-YO SƗKƗ TUʼUN YAʼA
Ná kundeʼe-yo naguá steʼen nu̱u̱-yo ja ni janduté Jesús ji na̱sa kuu satuʼva ɨn ñayí maa-ji tágua kuu kuanduté-ji.
4. Ja steʼen nu̱u̱-yo ja ni janduté Jesús
Tágua kuni ka-ní sɨkɨ ja ni janduté Jesús, ka kaʼvi-ní Mateo 3:13-17. Ñukua de ka ndatuʼun-ní sɨkɨ nda tuʼun yaʼa:
-
Ta ni janduté Jesús, ¿a ni kuu-de ɨn suchí ñíkín?
-
¿A jaku ni̱ ndute ni ka joso nu̱u̱ xini-de? Nusaá, ¿na̱sa ni janduté-de?
Ta ni janduté Jesús, ni kejaʼa-de jín ɨn tiñu kánuu ja ni jeʼe Yandios nu̱u̱-de. Ka kaʼvi-ní Lucas 3:21-23 ji Juan 6:38, de ka ndatuʼun-ní sɨkɨ nda tuʼun yaʼa:
-
Ta ja ni janduté Jesús, ¿na tiñu ni kuu ja kánuu tuni ka nu̱u̱-de?
5. Ja janduté ɨn ja kuu chuʼun ini-ní saʼa-ní
Nú kani ini-ní ja nakuáʼa-ní maa-ní ji ja kuanduté-ní nu̱u̱ xinañuʼun sanaa de yu̱ʼú-ní jaku. De, nú maa-ní kutuʼva ka ní sɨkɨ Jeová ji kuni vaʼa ka-ní nu̱u̱-Ya, kuʼun kají ini ka-ní ja saʼa-ní tiñu kánuu yaʼa. Tágua kuni-ní sava nda ñayí ja ni ka kundeé, ka kundeʼe-ní VIDEO.
Ka kaʼvi-ní Juan 17:3 ji Santiago 1:5, de ka ndatuʼun-ní sɨkɨ nda tuʼun yaʼa:
-
¿Naguá kuu chíndeé nu̱u̱ ɨn ñayí ja koo tuʼva-ji tágua kuanduté-ji?
-
Nakuáʼa-yo maa-yo nu̱u̱ Jeová ta kaʼan-yo nu̱u̱-Ya ja kúni-yo saʼa-yo tiñu-Ya nɨkani.
-
Ta ja ni janduté-yo, steʼen-yo nu̱u̱ nda̱ká-ji ja ni nakuáʼa-yo maa-yo nu̱u̱ Yandios.
6. Ta janduté-yo kenda-yo kuu-yo ñayí ñuu Jeová
Ta ni janduté-yo, kɨ́vɨ-yo nu̱u̱ ɨn familia inuú ini ja iyo nu̱u̱ níí ñuuyɨvɨ́. De nduu kánuu nde nu̱u̱ vaji-yo axi ja ni saʼa-yo ichi yáta̱, ndɨʼɨ-yo kandija ɨn ni̱ tuʼun ji saʼa-yo tanu kachi Biblia. Ka kaʼvi-ní Salmo 25:14, TNM ji 1 Pedro 2:17, de ka ndatuʼun-ní sɨkɨ nda tuʼun yaʼa:
-
Tanu kachi nda versículo yaʼa, ¿na̱sa chíndeé nu̱u̱-yo ta janduté-yo?
JA KACHI SAVA NDA ÑAYÍ: “Nduu iyo tuʼva-sa ja kuanduté-sa”.
-
Vese maa-ní jani ini-ní sukua, ¿a káʼán-ní ja janduté kuu ɨn ja kuu chuʼun ini-ní saʼa-ní?
JA NI KUTUʼVA-YO
Jesús ni kachi tágua kuu-yo cristiano jiniñuʼun kuanduté-yo. De, tágua kuu chuʼun ini-yo saʼa-yo kánuu koo ndakui fe-yo nu̱u̱ Jeová, saʼa-yo ja kachi-Ya ji nakuáʼa-yo maa-yo nu̱u̱-Ya.
Tuʼun núku̱ʼun ini
-
¿Naguá kuu ja janduté, ji nakú kánuu tuni?
-
¿Nakú yitaʼan tuʼun nakuáʼa ji ja janduté?
-
¿Naguá jiniñuʼun saʼa ɨn ñayí ta nchaʼa ka nakuáʼa-ji maa-ji ji kuanduté-ji?
NU̱U̱ NDANIʼI KA-NÍ TUʼUN
Kuni-ní sava nda tuʼun nduu iyo vaʼa sɨkɨ ja janduté de naguá kuu ja nda̱a̱ ja kúni kaʼan.
Skuaʼa-ní sava nda tuʼun ja kuu chindeé nu̱u̱-ní tágua kenda-ní kuanduté-ní.
Kaʼvi-ní sɨkɨ ɨn teé ja ni janduté-de de nduu ni saʼa-de sɨkɨ ja ni kusii ini-de sukua ni̱.
“Ni ka kúni-de ja matuʼun-sa nandukú-sa tuʼun nda̱a̱” (La Atalaya, 1 yo̱o̱ febrero kuiya 2013)
Kundeʼe-ní nakú ja janduté kuu ɨn ja vaʼa ja chuʼun ini-ní saʼa-ní ji na̱sa satuʼva-ní maa-ní.
a Nú ɨn ñayí ni janduté-ji nu̱u̱ inka religión, jiniñuʼun na kuanduté tuku-ji. ¿Nakú? Chi religión ñukua nduu ni steʼen ja nda̱a̱ sɨkɨ Biblia nu̱u̱-ji (kundeʼe-ní Hechos 19:1-5 ji nu̱u̱ lección 13).