LECCIÓN 35
Na̱sa kuu ka̱ji vaʼa-yo ja saʹa-yo
Ndɨʼɨ-yo jiniñuʼun ka̱ji-yo ja saʼa-yo. Ja jani ini-yo saʼa-yo kuu steʼen na̱sa teku-yo ji na̱sa kitaʼan-yo jín Jeová. Tanu kuu, sanaa jiniñuʼun kani ini-yo ndenu kundee-yo, na̱sa níʼi̱n-yo xu̱ʼún ji nú tánda̱ʼá-yo axi nduu. Nú kani vaʼa xini-yo naguá saʼa-yo, ku̱ú koo sii ini-yo ji suni saʼa sii-yo ini Jeová.
1. ¿Na̱sa kuu chíndeé Biblia nu̱u̱-yo tágua ka̱ji vaʼa-yo ja saʼa-yo?
Ta nchaʼa ka ka̱ji-ní ja saʼa-ní, kakan-ní nu̱u̱ Jeová ja ná chíndeé-Ya nu̱u̱-ní. De nandukú-ní nu̱u̱ Biblia naguá jani xini-Ya sɨkɨ tiñu yaʼa (Kaʼvi-ní Proverbios 2:3-6, TNM). De kuni-ní ja Jeová kachi-Ya ɨn tuʼun nu̱u̱-ní. Nú sukua kuu, ja kandija-ní nu̱u̱-Ya kuu ɨn ja vaʼa ka.
De ¿naguá kuu nú nu̱u̱ Biblia nduu ndaniʼi-ní ɨn tuʼun ja steʼen ka̱jí naguá saʼa-ní? De vese saá, Jeová chuʼun ichí Ya-ní “ichi” ja jiniñuʼun kaka-ní (Isaías 48:17, TNM). ¿Na̱sa? Nda principio chíndeé nu̱u̱-ní. Nda principio Biblia ka kuu tuʼun nda̱a̱ ja chíndeé nu̱u̱-yo jakuʼun ini-yo ja jani xini Jeová ji na̱sa kuu ini-Ya. De iyo ji̱chi ndaniʼi-yo nda tuʼun yaʼa ta kaʼvi-yo Biblia. De ta jíni̱-yo ja jani ini Jeová ka̱ji vaʼa ka-yo ja saʼa-yo.
2. ¿Naguá jiniñuʼun kani ini-yo ta nchaʼa kenda-yo saʼa-yo ja jani xini-yo?
Nu̱u̱ Biblia kachi ja “ɨn ñayí ja jani vaʼa xini vaʼa ndeʼe-ji nu̱u̱ jañu-ji” (Proverbios 14:15, TNM). Yaʼa kúni kaʼan ja ta nchaʼa ka saʼa-yo ɨn tiñu kánuu ja kani vaʼa xini-yo. Ta jani xini-ní nu̱u̱ ɨn ɨn tiñu, katuʼun-ní maa-ní: “¿Na nda principio Biblia yitaʼan jín tiñu yaʼa? ¿Nde tiñu chindeé ka nu̱u̱-sa? ¿Na̱sa ku̱ú stíví-sa inka ñayí sɨkɨ tiñu ja ka̱ji-sa saʼa-sa? De, ja kánuu ka, ¿a sáʼá sii ini Jeová?” (Deuteronomio 32:29, TNM).
Yandios kuu kachi-Ya nu̱u̱-yo tiñu ja iyo vaʼa ji ja nduu iyo vaʼa. Ta jíni̱ vaʼa-yo nda ley-Ya ji nda principio-Ya de chuʼun ini-yo kandija-yo, nevaʼa-yo ɨn janduni vaʼa. Janduni-yo kuu ja kachi nu̱u̱-yo na tiñu iyo vaʼa ji ja nduu iyo vaʼa (Romanos 2:14, 15). Ɨn janduni vaʼa chíndeé nu̱u̱-yo kani vaʼa xini-yo ja saʼa-yo.
NÁ KUTUʼVA KA-YO SƗKƗ TUʼUN YAʼA
Ná kutuʼva ka-yo na̱sa vaʼa tuni steʼen nda principio Biblia nu̱u̱-yo ji suni janduni-yo ta jani ini-yo na tiñu saʼa-yo.
3. Ná kuáʼa-yo tuʼun ja chuʼun ichí Biblia nu̱u̱-yo
¿Na̱sa chuʼun ichí nda principio Biblia nu̱u̱-yo ta jiniñuʼun kani xini-yo na tiñu saʼa-yo? Ka kundeʼe-ní VIDEO de ka ndatuʼun-ní sɨkɨ nda tuʼun yaʼa:
-
¿Naguá kuu libre albedrío?
-
¿Nakú ni taji Jeová libre albedrío nu̱u̱-yo?
-
¿Naguá ni taji Yandios tágua chíndeé nu̱u̱-yo ja kuatiñu vaʼa ka-yo libre albedrío?
Tágua kundeʼe-yo ɨn ejemplo sɨkɨ ɨn principio Biblia, ka kaʼvi-ní Efesios 5:15, 16. Ñukua de ka ndatuʼun-ní sɨkɨ nda tuʼun yaʼa “Ma̱ snáa̱ ro tiempo” chi sa...
-
... kaʼvi-yo Biblia nu̱u̱ nda̱ká kɨvɨ.
-
... kuu-yo ɨn yɨɨ́ vaʼa ka, ta̱tá axi nda seʼe.
-
... kiʼin-yo nu̱u̱ nda reunión congregación.
4. Steʼen vaʼa-yo janduni-yo tágua ka̱ji vaʼa-yo tiñu saʼa-yo
Ta iyo ɨn tuʼun tatuni nu̱u̱ Biblia sɨkɨ ɨn tiñu, chíndeé nu̱u̱-yo ja ñama̱ ka̱ji vaʼa ka-yo ja saʼa-yo. De ¿a nú nduu iyo ɨn tuʼun ja tatuni? Ka kundeʼe-ní VIDEO de ka ndatuʼun-ní sɨkɨ nda tuʼun yaʼa:
-
Tanu kachi video, ¿naguá ni saʼa ɨn kuáʼa tágua satuʼva-ña janduni-ña de kani vaʼa xini-ña saʼa-ña tiñu ja taʼa̱n ini Jeová?
¿Nakú ma ku̱ú kakan-yo nu̱u̱ ɨn ñayí ja kachi-ji naguá saʼa-yo? Ka kaʼvi-ní Hebreos 5:14 de ka ndatuʼun-ní sɨkɨ nda tuʼun yaʼa:
-
Vese ñama̱ ka kuu ja kakan-yo nu̱u̱ inka ñayí ja kachi-ji naguá saʼa-yo, ¿nakú kánuu ja ɨn ɨn maa-yo ka̱ji vaʼa-yo tiñu ja saʼa-yo?
-
¿Na ndatiñu kuu chíndeé nu̱u̱-yo satuʼva-yo janduni-yo de ka̱ji vaʼa ka-yo ja saʼa-yo?
Janduni kuu tanu ɨn mapa, ja chíndeé nu̱u̱-yo tágua kuni-yo na ichi kiʼin-yo nu̱u̱ nda kɨvɨ teku-yo.
5. Ná koo yɨñuʼún-yo nu̱u̱ janduni sava ka ñayí
Sɨkɨ ja nda̱ká-yo siin siin kaa-yo, siin siin ka̱ji-yo saʼa-yo tiñu. ¿Na̱sa kuu steʼen-yo ja iyo yɨñuʼún-yo nu̱u̱ janduni sava ka ñayí? Ná kundeʼe-yo uu nda ejemplo.
Ejemplo xinañuʼun: Ɨn kuáʼa ja taʼa̱n ini-ña kaʼyu-ña nu̱u̱-ña nasa̱ma-ña nu̱u̱ ɨn congregación ja kuaʼa nda kuáʼa nduu ka taʼa̱n ini-ña.
Ka kaʼvi-ní Romanos 15:1 ji 1 Corintios 10:23, 24, de ka ndatuʼun-ní sɨkɨ nda tuʼun yaʼa:
-
Tanu kachi nu̱u̱ nda versículo yaʼa, ¿naguá sáʼá kuáʼa yaʼa? De maa-ní, ¿naguá sáʼá-ní nú janduni ɨn ñayí nduu jeʼe tuʼun ja saʼa-ji ɨn tiñu de janduni maa-ní chi jeʼe tuʼun ja saʼa-ní?
Ejemplo uu: Ɨn ñani̱ jíni̱-de ja Biblia kachi ja ñayí ku̱ú koʼo-ji jaku ni̱ ndi̱xí; de maa-de ni jani xini-de ja ma koʼo kuiti̱-de. Ɨn kɨvɨ, ni ka ndutútú-de nu̱u̱ ɨn convivio de ni jini-de sava nda ñani̱ ja ka jíʼi-de ndi̱xí.
Ka kaʼvi-ní Eclesiastés 7:16 ji Romanos 14:1, 10, TNM de ka ndatuʼun-ní sɨkɨ nda tuʼun yaʼa:
-
Tanu kachi nda versículo yaʼa, ¿naguá sáʼá ñani̱ yaʼa? De maa-ní, ¿naguá sáʼá-ní nú ndeʼe-ní ɨn ñayí ja saʼa-ji ɨn tiñu ja nduu taʼa̱n ini maa-ní?
¿Naguá jiniñuʼun saʼa-ní tágua ka̱ji vaʼa-ní tiñu ja saʼa-ní?
1. Kakan-ní nu̱u̱ Jeová ja ná chíndeé-Ya nu̱u̱-ní tágua ka̱ji vaʼa-ní tiñu ja saʼa-ní (Santiago 1:5).
2. Nandukú-ní tuʼun nu̱u̱ Biblia jín nu̱u̱ nda tutu tágua ndaniʼi-ní nda principio ja yitaʼan jín tuʼun yaʼa. Suni kuu katuʼun-ní nu̱u̱ sava ka nda ñani̱ ja jíni̱ vaʼa ka sɨkɨ tuʼun yaʼa.
3. Kani xini-ní na̱sa chíndeé nu̱u̱ sava ka ñayí ji nu̱u̱ janduni-ní sɨkɨ tiñu ja saʼa-ní.
JA KACHI SAVA NDA ÑAYÍ: “Maa-ro kuu saʼa-ro ja kúni maa-ro. ¡Nduu kánuu ja jani xini inka ñayí!”.
-
¿Nakú jiniñuʼun ja kundɨʼvɨ ini-yo ja jani ini Yandios ji suni ja jani ini sava ka ñayí?
JA NI KUTUʼVA-YO
Ka̱ji vaʼa-yo ta nandukú-yo tuʼun sɨkɨ ja jani xini Jeová sɨkɨ ɨn tiñu de tíin kuenta-yo nú chíndeé nu̱u̱ sava ka ñayí ja saʼa-yo axi saʼa ja kukuéká ini-ji.
Tuʼun núku̱ʼun ini
-
¿Na̱sa kuu ka̱ji vaʼa-ní saʼa-ní ɨn tiñu ja taʼa̱n ini Jeová?
-
¿Naguá kuu saʼa-ní tágua janduni-ní koo tuʼva?
-
¿Na̱sa kuu steʼen-ní ja iyo yɨñuʼún-ní nu̱u̱ janduni sava ka ñayí?
NU̱U̱ NDANIʼI KA-NÍ TUʼUN
¿Na̱sa kuu ka̱ji vaʼa-ní tiñu ja saʼa-ní tágua saʼa kutú-ní ja kitaʼan-ní jín Yandios?
“Ná chiñuʼun-yo Yandios jín ja jani xini-yo” (La Atalaya, 15 yo̱o̱ abril kuiya 2011)
Jakuʼun vaʼa ka ini-ní naguá kachi Jeová nu̱u̱-yo.
Kundeʼe-ní naguá ni chindeé nu̱u̱ ɨn teé tágua ka̱ji vaʼa-de ja saʼa-de nu̱u̱ ɨn tiñu víjin.
Kundeʼe-ní na̱sa kuu saʼa sii ka-ní ini Jeová ta maa-Ya nduu kaʼan-Ya na̱sa saʼa-yo sɨkɨ ɨn tiñu.
“¿A nɨkani jiniñuʼun ɨn tuʼun ja tatuni Biblia?” (La Atalaya, 1 yo̱o̱ diciembre kuiya 2003)