LECCIÓN 51
Na̱sa kuu saʼa sii-yo ini Jeová jín ja kaʼan-yo
Ta Jeová ni saʼa-Ya yoʼo, ni jinimani̱-Ya ɨn ja vii tuni: ja kuu ja kaʼan-yo. ¿A ndɨʼvɨ ini-Ya na̱sa jatiñu-yo ja ni jinimani̱-Ya nu̱u̱-yo? ¡Sukua kuu, ndɨʼvɨ ini-Ya! (Kaʼvi-ní Santiago 1:26). Nusaá, ¿na̱sa kuu saʼa-yo tágua saʼa sii-yo ini Jeová ta kaʼan-yo?
1. ¿Na̱sa kuu kuatiñu vaʼa-yo ja ni jinimani̱ Jeová nu̱u̱-yo?
Biblia kachi nu̱u̱-yo: “Ca̱ʼa̱n ro tu̱ʼun ndeé ini̱ jíín táʼán ro, de scúja táʼán ro jíín tu̱ʼun ya̱” (1 Tesalonicenses 5:11). ¿A jíni̱-ní ɨn ñayí ja jiniñuʼun ɨn tuʼun ndeé ini? ¿A kuu chíndeé-ní nu̱u̱-ji tágua koo vaʼa ini-ji? Kachi-ní nu̱u̱ ñayí ñukua ja kuu-ji ɨn ñayí yiya̱ʼvi tuni nu̱u̱-ní. Sanaa ku̱ú kachi-ní nu̱u̱-ji nda ja vaʼa ja saʼa-ji. ¿A jíni̱-ní ɨn texto Biblia ja kuu chíndeé nu̱u̱ ɨn ñayí ja jíni̱-ní? Iyo kuaʼa tuni tágua kuu ka̱ji-ní. Suni, ma naa ini-ní ja nda tuʼun ja kaʼan-ní ji na̱sa kaʼan-ní kuu chíndeé nu̱u̱ ɨn ñayí. Ja ñukua kuu ja ta kaʼan-ní kaʼan kuéé-ní ji kaʼan vaʼa-ní (Proverbios 15:1, TNM).
2. ¿Na tuʼun kuu ja ma kuu kaʼan-yo?
Biblia kachi: “Ni iin tu̱ʼun ne̱ʼén ma̱ cáʼa̱n ndá ro” (kaʼvi-ní Efesios 4:29). Yaʼa kúni kaʼan ja ma kaʼan-yo tuʼun téʼén ma kaʼan ndevaʼa-yo ni ma saʼa-yo ja kukuéká ini inka taʼan-yo. Suni, ma skuite nu̱u̱-yo tuʼun túʼu̱n ji ma te̱e̱ kuachi-yo sɨkɨ ñayí (kaʼvi-ní Proverbios 16:28, TNM).
3. ¿Naguá kuu chindeé nu̱u̱-yo tágua kaʼan-yo tuʼun vaʼa?
Tanu kuu, nda tuʼun ja kaʼan-yo steʼen naguá jani ini-yo ji na̱sa kuu ini-yo (Lucas 6:45). Sɨkɨ ñukua kuu ja jiniñuʼun ja ka̱an-yo kani xini-yo nda tuʼun vaʼa, yaʼa kúni kaʼan, nda̱ká tiñu ja saʼa vaʼa, tiñu iyo ndoo, tiñu ja jetaʼvi Yandios ji tiñu ja ndaʼvi ini (Filipenses 4:8). Tágua kuu sukua, jiniñuʼun ja ka̱ji vaʼa-yo nda ja ndeʼe-yo ji ja nini-yo ji ndukú-yo nda amigo vaʼa (Proverbios 13:20, TNM). Suni kánuu ja kani vaʼa xini-yo ta nchaʼa ja kaʼan-yo. Kani xini-ní nú tuʼun ja kaʼan-ní nu̱u̱ ɨn ñayí chindeé nu̱u̱-ji axi nduu. Biblia kachi: “Nda tuʼun kaʼan-yo ta nduu jani xini-yo kuu nda-ji tanu kani ɨn espada, de nda tuʼun kaʼan nda ñayí ndíchi satátán nu̱u̱ juʼvi” (Proverbios 12:18, TNM).
NÁ KUTUʼVA KA-YO SƗKƗ TUʼUN YAʼA
Ná kundeʼe-yo na̱sa taʼa̱n ini Jeová ja kaʼan-yo ji kuu chíndeé nu̱u̱ inka ñayí.
4. Ka̱ji vaʼa-ní tuʼun ja kaʼan-ní
Nda̱ká-yo iyo ji̱chi kaʼan-yo ɨn tuʼun náá ini ñukua de ndakani ini-yo (Santiago 3:2). Ka kaʼvi-ní Gálatas 5:22, 23 de ka ndatuʼun-ní sɨkɨ nda tuʼun yaʼa:
-
Tágua kuu ka̱ji-ní na tuʼun kaʼan-ní ji na̱sa kaʼan-ní, ¿na ja vaʼa ini yaʼa ku̱ú kakan-ní nu̱u̱ Jeová? ¿Na̱sa ku̱ú chindeé nu̱u̱-ní?
Ka kaʼvi-ní 1 Corintios 15:33 de ka ndatuʼun-ní sɨkɨ nda tuʼun yaʼa:
-
¿A chíndeé nu̱u̱-ní nda ñayí ja kitaʼan jín-ní, ja ndeʼe-ní axi ja nini-ní tágua kaʼan vaʼa-ní? ¿Na̱sa?
Ka kaʼvi-ní Eclesiastés 3:1, 7, TNM de ka ndatuʼun-ní sɨkɨ nda tuʼun yaʼa:
-
¿Na tiempo kuu ja kasi̱ yuʼu-yo axi kundetu-yo nu̱u̱ ɨn tiempo vaʼa ka tágua kaʼan-yo?
5. Kaʼan vaʼa-ní sɨkɨ nda ñayí
¿Na̱sa kuu saʼa-yo tágua ma kaʼan-yo tuʼun néʼén? Ka kundeʼe-ní VIDEO de ka ndatuʼun-ní sɨkɨ nda tuʼun yaʼa:
-
¿Nakú ni kúni teé ja ni kee nu̱u̱ video sa̱ma-de na̱sa kaʼan-de?
-
¿Naguá ni saʼa-de tágua kundeé-de?
Ka kaʼvi-ní Eclesiastés 7:16, TNM de ka ndatuʼun-ní sɨkɨ nda tuʼun yaʼa:
-
¿Naguá jiniñuʼun ja núku̱ʼun ini-yo ta kúni-yo kaʼan ndevaʼa-yo sɨkɨ ɨn ñayí?
Ka kaʼvi-ní Eclesiastés 7:21, 22, TNM de ka ndatuʼun-ní sɨkɨ nda tuʼun yaʼa:
-
¿A kuu chindeé nda versículo yaʼa nu̱u̱-ní tágua ma kɨtɨ̱ ini-ní ta ɨn ñayí kaʼan-ji tuʼun ndevaʼa sɨkɨ-ní? ¿Nakú?
6. Koo vitá ini-ní ta kaʼan-ní jín nda taʼan veʼe-ní
Jeová kúni-Ya ja kaʼan vaʼa-yo ji kaʼan vii-yo nu̱u̱ nda taʼan veʼe-yo. Ka kundeʼe-ní VIDEO de ka ndatuʼun-ní sɨkɨ nda tuʼun yaʼa:
-
¿Naguá chindeé nu̱u̱-ní tágua kaʼan vaʼa-ní jín nda taʼan veʼe-ní?
Ka kaʼvi-ní Efesios 4:31, 32 de ka ndatuʼun-ní sɨkɨ nda tuʼun yaʼa:
-
¿Na̱sa kuu kaʼan-yo tágua kundee sii nda ñayí veʼe-yo?
Jeová ni kachi-Ya nasaa ni kutoo-Ya seʼe-Ya, Jesús. Ka kaʼvi-ní Mateo 17:5 de ka ndatuʼun-ní sɨkɨ nda tuʼun yaʼa:
-
¿Na̱sa kuu saʼa-ní tanu saʼa Jeová ta kaʼan-ní jín nda taʼan veʼe-ní?
JA KACHI SAVA NDA ÑAYÍ: “Maa-sa kaʼan-sa ja jani ini-sa. De nú sava ka ñayí nduu taʼa̱n ini-ji, kuachi maa-ji kuu”.
-
¿A taʼa̱n ini-ní na̱sa jani ini sava nda ñayí yaʼa? ¿Nakú?
JA NI KUTUʼVA-YO
Ndakui tuni nda tuʼun ja kaʼan-yo. Ja ñukua kuu ja jiniñuʼun kani vaʼa xini-yo naguá kaʼan-yo, na tiempo kaʼan-yo ji na̱sa kaʼan-yo.
Tuʼun núku̱ʼun ini
-
¿Na̱sa ku̱ú kuatiñu-ní nda tuʼun ja kaʼan-ní tágua chindeé-ní nu̱u̱ sava ka ñayí?
-
¿Na tuʼun ma kuu kaʼan-yo?
-
¿Naguá chindeé nu̱u̱-yo tágua niini kaʼan-yo tuʼun vaʼa ji tuʼun vii?
NU̱U̱ NDANIʼI KA-NÍ TUʼUN
¿Naguá kuu chíndeé nu̱u̱-yo tágua kaʼan-yo tuʼun vaʼa ji tuʼun ndeé ini?
Kutuʼva-ní naguá kuu chindeé nu̱u̱-ní tágua ma kaʼan-ní tuʼun téʼén.
“¿Naguá ku̱ú nú kaʼan-yo nda tuʼun téʼén?” (Artículo nu̱u̱ jw.org)
Kundeʼe-ní naguá kuu saʼa-ní tágua ma kinunkava-ní nu̱u̱ tuʼun túʼu̱n.
Kaʼvi-ní na̱sa ni chindeé Jeová nu̱u̱ ɨn teé tágua sndoo̱-de ja kaʼan-de tuʼun téʼén.
“Ni kejaʼa-sa ni jani xini-sa na̱sa ni ndee-sa” (La Atalaya, 1 yo̱o̱ agosto kuiya 2013)