LECCIÓN 55
Chíndeé-ní nu̱u̱ congregación-ní
Nu̱u̱ níí ñuuyɨvɨ́, kuaʼa millón nda ñayí ka ndachiñuʼun sii ini-ji Jeová nu̱u̱ kuaʼa mil nda congregación. Nda ñayí yaʼa ka teya̱ʼvi tuni-ji nda tuʼun ja ka kutuʼva-ji, ji ka chíndeé tuni-ji nu̱u̱ congregación nu̱u̱ kuaʼa tiñu. ¿A suni sukua kuu ini-ní nu̱u̱ congregación-ní?
1. ¿Na̱sa kuu chíndeé-ní nu̱u̱ congregación jín tiempo-ní ji ja ndakui-ní?
Ndɨʼɨ nda-yo kuu chíndeé-yo nu̱u̱ congregación-yo. Tanu kuu, ¿a iyo nu̱u̱ congregación-ní nda ñani̱ ji kuáʼa ñaʼnu axi ja ka kúʼu̱? ¿A kuu chíndeé-ní nda-ji tágua kuu ka kiʼin-ji nu̱u̱ nda reunión? ¿Axi iyo inka tiñu ja kuu saʼa-ní nu̱u̱ nda-ji, tanu ja kiʼin-ní kueen-ní ndatiñu ja ka jiniñuʼun-ji axi ja chíndeé-ní nu̱u̱ tiñu veʼe-ji? (Kaʼvi-ní Santiago 1:27). Suni kuu ndasaʼa ndoo-yo ji chíndeé-yo ja koo vaʼa Salón del Reino. Ni ɨn ñayí nduu tetúu nu̱u̱-yo ja saʼa-yo tiñu yaʼa; chi saʼa sii ini-yo sɨkɨ ja kutoo-yo Yandios ji nda ñani̱-yo ji nda kuáʼa-yo (Salmo 110:3, TNM).
Nda Testigo ja̱ ja ni janduté suni kuu ka chíndeé-ji nu̱u̱ congregación nu̱u̱ sava ka tiñu. Nda ñani̱ ja ka saʼa vaʼa-ji tiñu kuu ka kenda-ji ja kuu-ji siervo ministerial de, ichi nu̱u̱ ka, anciano. De ndɨʼɨ, nda ñani̱ ji kuáʼa, kuu ka kaʼan ka-ji Tuʼun Yandios nú ka kuu-ji precursor. De suni, sava ka nda Testigo ka chíndeé-ji nu̱u̱ kuvaʼa kuaʼa nda veʼe nu̱u̱ chiñuʼun Yandios. De iyo sava ka-ji ja jankoo-ji nu̱u̱ inka ñuu tágua ka chíndeé-ji nu̱u̱ ɨn congregación ja jiniñuʼun ja chíndeé nu̱u̱-ji.
2. ¿Na̱sa kuu chíndeé-yo nu̱u̱ congregación jín xu̱ʼún-yo ji ndatiñu ja nevaʼa-yo?
Nu̱u̱ Biblia kachi: “Chiñuʼun Jeová jín nda ndatiñu ya̱ʼvi-ro” (Proverbios 3:9, TNM). Ɨn ja vii tuni kuu nu̱u̱-yo ja kuatiñu-yo xu̱ʼún-yo ji nda ndatiñu ja nevaʼa-yo tágua chíndeé-yo congregación-yo ji tágua kaʼan-yo Tuʼun Yandios nu̱u̱ níí ñuuyɨvɨ́ (kaʼvi-ní 2 Corintios 9:7). De jín nda xu̱ʼún ja jinimani̱-yo chíndeé-yo nu̱u̱ ta kenda tundoʼo. Kuaʼa nda ñani̱ ji kuáʼa ka chuvaʼa siin-de “jaku xu̱ʼún” tágua ka kunimani̱-de (kaʼvi-ní 1 Corintios 16:2). Kuu chuʼun-yo nu̱u̱ nda caja luli ja iyo nu̱u̱ Salón del Reino axi tetiñu-yo nu̱u̱ página donate.pr418.com. Jeová jeʼe-Ya tuʼun ja kuatiñu-yo nda ndatiñu ja nevaʼa-yo tágua steʼen-yo ja kutoo yo-Ya.
NÁ KUTUʼVA KA-YO SƗKƗ TUʼUN YAʼA
Ná kutuʼva-yo sɨkɨ sava nda tiñu ja kuu saʼa-ní tágua kuu chíndeé-ní congregación-ní.
3. Kuu kuatiñu-ní nda ndatiñu ja nevaʼa-ní
Jeová ji Jesús ka kutoo-Ya nda ñayí ja ka jinimani̱ sii ini-ji. De, Jesús ni ndeʼe-de na̱sa ni saʼa ɨn ñaʼan ndaʼvi ja ni ji̱ʼi̱ yɨɨ́-ña tágua kunimani̱-ña xu̱ʼún. Ka kaʼvi-ní Lucas 21:1-4 de ka ndatuʼun-ní sɨkɨ nda tuʼun yaʼa:
-
¿A jiniñuʼun kunimani̱ tuni-yo xu̱ʼún tágua koo sii ini Jeová?
-
¿Na̱sa kuu ini Jeová ji Jesús ta jinimani̱-yo jín nde ini anu-yo?
Tágua kuni-ní na̱sa jatiñu nda xu̱ʼún ja jinimani̱-yo, ka kundeʼe-ní VIDEO. Ñukua de ka ndatuʼun-ní sɨkɨ nda tuʼun yaʼa:
-
¿Na̱sa chíndeé nu̱u̱ nda congregación nu̱u̱ níí ñuuyɨvɨ́ nda xu̱ʼún ja jinimani̱-yo?
4. Kuu chíndeé-ní nu̱u̱ jiniñuʼun
Nda ñayí ja ni ka chiñuʼun Jeová tiempo yáta̱ ni ka chindeé sii ini-ji tágua koo vaʼa nda veʼe nu̱u̱ ni ka chiñuʼun-ji Yandios ma sú matuʼun ni̱ jín xu̱ʼún. Ka kaʼvi-ní 2 Crónicas 34:9-11, TNM de ka ndatuʼun-ní sɨkɨ nda tuʼun yaʼa:
-
¿Naguá ni ka saʼa ndɨʼɨ nda israelita tágua ka koto-ji “veʼe Jeová”, ja kúni kaʼan, veʼe nu̱u̱ ni ka chiñuʼun ji-Ya?
Tágua kuni-ní na̱sa ka ndiki̱ nda testigo Jeová ejemplo yaʼa, ka kundeʼe-ní VIDEO. Ñukua de ka ndatuʼun-ní sɨkɨ nda tuʼun yaʼa:
-
¿Nakú kánuu ja chuʼun ini-yo tágua koo ndoo ji koo vaʼa Salón del Reino-yo?
-
¿Na̱sa ku̱ú chindeé maa-ní?
5. Nda ñani̱ kuu ka chuʼun ini-de tágua kuu ni̱ʼi̱n ka-de tiñu ini congregación
Biblia kachi nu̱u̱ nda teé ja ka kuu cristiano ja ná ka chuʼun ini-de tágua kuaʼnu ka-de nu̱u̱ Tuʼun Yandios, de sukua kuu ka chindeé ka-de nu̱u̱ congregación. Tágua kuni-ní ɨn ñani̱ ja ni saʼa-de sukua, ka kundeʼe-ní VIDEO. Ñukua de ka ndatuʼun-ní sɨkɨ nda tuʼun yaʼa:
-
¿Naguá ni saʼa Ryan tágua kuaʼnu-de nu̱u̱ Tuʼun Yandios de sukua chíndeé ka-de nu̱u̱ congregación?
Nu̱u̱ Biblia kachi naguá jiniñuʼun saʼa nda ñani̱ ja ka kúni-de ka kuu-de siervo ministerial ji anciano. Ka kaʼvi-ní 1 Timoteo 3:1-13 de ka ndatuʼun-ní sɨkɨ nda tuʼun yaʼa:
-
¿Naguá jiniñuʼun ka saʼa nda ñani̱ ja ka kúni-de kuu-de siervo ministerial ji anciano?
-
¿Naguá jiniñuʼun ka saʼa nda taʼan veʼe-de? (Ka kundeʼe-ní nda versículo 4 ji 11).
-
Nú nda ñani̱ ka chuʼun ini-de tágua ka saʼa-de tanu kachi nda tuʼun yaʼa, ¿na̱sa chíndeé yaʼa nu̱u̱ congregación?
JA KA JIKATUʼUN SAVA NDA ÑAYÍ: “¿Na̱sa ka níʼi̱n nda testigo Jeová xu̱ʼún tágua ka saʼa-de nda tiñu-de?”.
-
¿Na̱sa kachi-ní?
JA NI KUTUʼVA-YO
Jeová teya̱ʼvi tuni-Ya ndɨʼɨ ja saʼa-yo tágua chíndeé-yo nu̱u̱ congregación jín tiempo-yo, ja ndakui-yo ji nda ndatiñu ja nevaʼa-yo.
Tuʼun núku̱ʼun ini
-
¿Na̱sa kuu chíndeé-yo congregación jín tiempo-yo ji ja ndakui-yo?
-
¿Na̱sa kuu chíndeé-yo congregación jín nda ndatiñu ja nevaʼa-yo?
-
¿Na̱sa kúni maa-ní chindeé-ní congregación?
NU̱U̱ NDANIʼI KA-NÍ TUʼUN
Kutuʼva-ní nakú Yandios nduu kúni ka-Ya ja nda ñayí ja chiñuʼun nu̱u̱-Ya ka kuáʼa-ji diezmo.
Biblia kachi sɨkɨ sava nda tiñu ja jiniñuʼun saʼa nda teé ja̱ ja ni janduté. De ¿naguá kuu nú ɨn ñaʼan kuu ja saʼa ɨn nda tiñu yaʼa?
Kuni-ní sava nda Testigo ja nduu ka yu̱ʼú-de ji ja ka chuʼun tuni ini-de tágua nda ñani̱-de ji kuáʼa-de ka níʼi̱n-ji nda tutu sɨkɨ Yandios.
Skuite nu̱u̱ nda tutu sɨkɨ Tuʼun Yandios nu̱u̱ ñuu Congo (4:25)
Kuni-ní na̱sa siin jakunaa nda tiñu ja ka saʼa nda Testigo sá ja saʼa sava ka nda religión.
“¿Na̱sa jakunaa nda tiñu ja ka saʼa nda testigo Jeová?” (Artículo nu̱u̱ jw.org)