LECCIÓN 56
Saʼa-ní ja koo inuú ini congregación
Ta iyo tútú-yo jín congregación, kuu ini-yo tanu rey David. Ni kachi-de: “¡Ka kundeʼe na̱ka̱ vaʼa ji na̱ka̱ vii kuu ja nda ñani̱ ka kundee tútú-de ji ka koo inuú ini-de!” (Salmo 133:1, TNM). Ja iyo tútú-yo ma sú ɨn ja sanaa ni̱ kuu; ndɨʼɨ-yo jiniñuʼun ja chuʼun ini-yo tágua ma skinaa-yo.
1. ¿Na tiñu ja saʼa ñuu Yandios saʼa ja saʼvi ini nda ñayí?
Nú na kiʼin-ní nu̱u̱ ɨn congregación nu̱u̱ inka ñuu, sanaa ma jakuʼun ini-ní yuʼu-ji; vese sukua kuu ku̱ú koo sii ini-ní. ¿Nakú? Chi, vaʼani̱ ndenu kiʼin-ní, kuni-ní ja nda Testigo ɨn ni̱ tutu ka jatiñu-sa tágua ka skuaʼa-sa Biblia. Suni, ka chuʼun ini-sa tágua ka kutoo taʼan-sa. Vaʼani̱ ndenu ndee-yo, nda̱ká-yo kúni-yo “kaʼan-yo sɨvɨ Jeová” ji chiñuʼun “inuú ini” yoʼo-Ya (Sofonías 3:9; nota, TNM).
2. ¿Naguá kuu saʼa-ní tágua koo inuú ini congregación?
“Cundáʼví ndasí ini̱ ro táʼán ro jonde̱ jíín ini̱ jíín áno̱ ro” (1 Pedro 1:22). ¿Na̱sa kuu kandija-ní tuʼun yaʼa? Ma kundeʼe-ní nu̱u̱ tiñu ja nduu ka saʼa vaʼa sava ka ñayí, jiniñuʼun kundeʼe-ní nu̱u̱ tiñu ja ka saʼa vaʼa-ji. Ma kitaʼan-ní jín matuʼun ni̱ nda ñayí ja ka jani ini tanu maa-ní; suni chuʼun ini-ní kitaʼan-ní jín nda ñayí inka ñuu. Suni, nú jani kuéʼé ini-ní sɨkɨ inka ñayí chuʼun ini-ní sa̱ma-ní (kaʼvi-ní 1 Pedro 2:17). a
3. ¿Naguá sáʼá-ní nú nduu iyo inuú ini-ní jín inka cristiano?
Ja nda̱a̱ kuu ja iyo inuú ini-yo; de, sɨkɨ ja ñayí kuachi ka kuu-yo, koo ji̱chi ja kaʼan-yo axi saʼa-yo ɨn tiñu ja saʼa ja kukuéká ini ɨn ñayí. Ja ñukua kuu ja Tuʼun Yandios kachi nu̱u̱-yo: “De kunee kaʼnu ini-ro nu̱u̱-ji”. De kachi ka: “Chi Jeová ni née kaʼnu ini-Ya nu̱u̱ nda-ro, de suni sukua jiniñuʼun saʼa nda̱ká-ro” (kaʼvi-ní Colosenses 3:13, TNM). Chi nu̱u̱ Jeová kuaʼa tuni ji̱chi saʼa-yo kuachi nu̱u̱-Ya, de vese sukua kuu maa-Ya née kaʼnu ini-Ya nu̱u̱-yo. De sɨkɨ ñukua kuu ja suni maa-Ya ndetu-Ya ja kunee kaʼnu ini nu̱u̱ taʼan-yo. Nú maa-ní ni jíni̱-ní ja ni saʼa-ní ja kukuéká ini ɨn ñayí, ñama̱ ndasaʼa vaʼa-ní tiñu ñukua (kaʼvi-ní Mateo 5:23, 24). b
NÁ KUTUʼVA KA-YO SƗKƗ TUʼUN YAʼA
Kani xini-ní na̱sa kuu saʼa-ní tágua koo ja mani̱ ji koo inuú ini congregación.
4. Ma kani kuéʼé ini-ní sɨkɨ inka ñayí
Kúni-yo steʼen-yo ja kutoo-yo nu̱u̱ nda̱ká ñayí ja iyo nu̱u̱ ñuu Yandios. De sanaa víjin kuu ja kutoo-yo nu̱u̱ sava nda-ji, tanu kuu nú jani ini-yo ja siin kaa-ji tanu maa-yo. ¿Naguá ku̱ú chindeé nu̱u̱-yo? Ka kaʼvi-ní Hechos 10:34, 35 de ka ndatuʼun-ní sɨkɨ nda tuʼun yaʼa:
-
Jeová jetaʼvi-Ya ndɨʼɨ ñayí naani ñuu tágua kuu-ji Testigo-Ya. Ta jíni̱-ní ja yaʼa, ¿na̱sa jiniñuʼun ja kundeʼe-ní nda ñayí ja siin kaa tanu maa-ní?
-
Nu̱u̱ ndee-ní, ¿na̱sa ka jani ini-ji sɨkɨ nda ñayí inka ñuu? ¿Nakú jiniñuʼun ja ma kani ini-ní sukua?
Ka kaʼvi-ní 2 Corintios 6:11-13 de ka ndatuʼun-ní sɨkɨ nda tuʼun yaʼa:
-
¿Naguá ku̱ú saʼa-ní tágua kutoo ka-ní ndɨʼɨ ñayí ja iyo nu̱u̱ ñuu Yandios?
5. Kunee kaʼnu ini-ní ji ndu̱u̱ mani̱ taʼan-ní
Vese maa-yo nduu jiniñuʼun ja kunee kaʼnu ini-yo nu̱u̱ Jeová, maa-Ya chi niini née kaʼnu ini-Ya nu̱u̱-yo. Ka kaʼvi-ní Salmo 86:5, TNM de ka ndatuʼun-ní sɨkɨ nda tuʼun yaʼa:
-
¿Naguá steʼen versículo yaʼa nu̱u̱-yo sɨkɨ na̱sa née kaʼnu ini Jeová?
-
¿A nakuetaʼvi-ní ja née kaʼnu ini Jeová? ¿Nakú?
-
¿Na tiñu kuu saʼa ja víjin kuu nu̱u̱-yo ja kitaʼan vaʼa-yo jín sava ka nda ñayí?
¿Naguá jiniñuʼun saʼa-yo tágua saʼa-yo tanu saʼa Jeová, de sukua koo inuú ini-yo jín nda ñayí ini congregación? Ka kaʼvi-ní Proverbios 19:11, TNM de ka ndatuʼun-ní sɨkɨ nda tuʼun yaʼa:
-
Ta ɨn ñayí saʼa ɨn tiñu ja nduu taʼa̱n ini-ní axi saʼa ja kɨtɨ̱ ini-ní, ¿naguá ku̱ú saʼa-ní tágua koo vaʼa-ní jín ñayí ñukua?
Ka kundeʼe-ní VIDEO de ka ndatuʼun-ní sɨkɨ nda tuʼun yaʼa:
Koo ji̱chi ja maa-yo kuu ja kaʼan-yo ɨn tuʼun axi saʼa-yo ɨn tiñu ja nduu taʼa̱n ini inka ñayí. Ta kenda ku̱ú sukua, ¿naguá jiniñuʼun saʼa-yo?-
¿Na̱sa ni saʼa ñaʼan ja ni kee nu̱u̱ video tágua ndu̱u̱ mani̱ nu̱u̱ taʼan-ña?
6. Kundeʼe-ní nu̱u̱ nda tiñu vaʼa ja ka saʼa nda ñani̱ ji kuáʼa
Ta ya̱ʼa-yo kuaʼa tiempo jín nda ñani̱ ji kuáʼa-yo, jíni̱-yo nda tiñu vaʼa ja ka saʼa-ji, de suni jíni̱-yo nde kuu ja nduu ka saʼa vaʼa-ji. ¿Na̱sa kuu kundeʼe ñunkúú-yo nu̱u̱ ja vaʼa ja ka saʼa-ji? Ka kundeʼe-ní VIDEO ñukua de ka ndatuʼun-ní sɨkɨ nda tuʼun yaʼa:
-
¿Naguá ku̱ú chindeé nu̱u̱-ní tágua kundeʼe-ní nda tiñu vaʼa ja ka saʼa nda ñani̱ ji kuáʼa?
Jeová matuʼun ni̱ ndeʼe-Ya nu̱u̱ ja vaʼa ini ja nevaʼa-yo. Ka kaʼvi-ní 2 Crónicas 16:9a, TNM de ka ndatuʼun-ní sɨkɨ nda tuʼun yaʼa:
-
¿Na̱sa kuu ini-ní ta jíni̱-ní ja Jeová matuʼun ni̱ ndeʼe-Ya nu̱u̱ ja vaʼa ini ja nevaʼa-ní?
JA KACHI SAVA NDA ÑAYÍ: “Tágua kunee kaʼnu ini-sa nu̱u̱ ɨn ñayí, jiniñuʼun ja xinañuʼun steʼen-ji ja ndakani ini-ji”.
-
¿Nakú jiniñuʼun ja nɨkani koo tuʼva-yo tágua kunee kaʼnu ini-yo?
JA NI KUTUʼVA-YO
Nú maa-ní née kaʼnu ini-ní nu̱u̱ nda ñani̱ ji kuáʼa de steʼen-ní ja too ini-ní nu̱u̱ nda-ji, chindeé-ní ja koo inuú ini congregación.
Tuʼun núku̱ʼun ini
-
¿Na̱sa kuu kundeé-ní nu̱u̱ ja nduu jani vaʼa xini-ní sɨkɨ inka ñayí?
-
¿Naguá sáʼá-ní nú nduu kitaʼan tuʼun-ní jín inka cristiano?
-
¿A taʼa̱n ini-ní kunee kaʼnu ini-ní nu̱u̱ sava ka ñayí tanu saʼa Jeová? ¿Nakú?
NU̱U̱ NDANIʼI KA-NÍ TUʼUN
Kundeʼe-ní ɨn ejemplo ja ni jatiñu Jesús ja chíndeé nu̱u̱-yo ja ma kaʼan ndevaʼa-yo sɨkɨ nda ñayí.
¿A jiniñuʼun ja kakan-yo ja kunee kaʼnu ini inka ñayí nu̱u̱-yo nú jani ini-yo ja nduu na kuachi-yo?
Kundeʼe-ní na̱sa uu teé ja ni ka jaʼnu-de nu̱u̱ ɨn ñuu ja ka ndeʼe juʼvi nu̱u̱ taʼan ni ka kutuʼva-de ja koo inuú ini-de.
Johny ji Gideon: kɨvɨ ichi yáta̱ ni ka ndeʼe juʼvi nu̱u̱ taʼan-de, mita ka kitaʼan vaʼa-de (6:42)
Kutuʼva-ní na̱sa kuu ndasaʼa-ní ɨn tundoʼo ja nevaʼa-ní jín inka ñayí ta nchaʼa ka ja naa ja mani̱ ini nu̱u̱ congregación.
“Ná ndatuʼun mani̱-yo ta kenda tuʼun kɨtɨ̱ ini” (La Atalaya, yo̱o̱ mayo kuiya 2016)