LECCIÓN 7
¿Naguá kuu Reino Yandios?
1. ¿Naguá kuu Reino Yandios?
¿Nakú kuu kaʼan-yo ja Jesús kuu ɨn rey vaʼa tuni? (MARCOS 1:40-42)
Reino Yandios kuu ɨn gobierno ja iyo nde andɨvɨ́ de nduu kuaʼa ka de ndakuiñi nu̱u̱ ndɨʼɨ nda ñayí ja tatuni de ja yaʼa saʼa ja kúni Yandios ja ku̱ú nu̱u̱ Ñuʼun tanu kuu andɨvɨ́. Reino Yandios kuu ɨn gobierno ja jiniñuʼun ñuuyɨvɨ́, chi ja yaʼa saʼa ja kundee inuú ini ndɨʼɨ ñayí ñuuyɨvɨ́. ¿A ma sú ja nda̱a̱ kuu ja tuʼun vaʼa kuu tuʼun yaʼa? Kaʼvi-ní 1 Corintios 15:24; Mateo 6:9, 10, ji 24:14.
Sɨkɨ ja ndɨʼɨ ñuu jiniñuʼun ɨn ñayí ja koso nu̱ú, Yandios Jeová ni jani̱-Ya Seʼe yɨɨ́-Ya, Jesucristo, tágua ku̱ú-de Rey nu̱u̱ Reino-Ya. Kaʼvi-ní Apocalipsis (Revelación) 11:15.
Kundeʼe-ní video ¿Naguá kuu Reino Yandios?
2. ¿Nakú kuu Jesús ɨn Rey vaʼa ka?
Seʼe yɨɨ́ Yandios kuu rey vaʼa ka, chi vaʼa tuni ini-de de nɨkani saʼa nda̱a̱-de tiñu (Mateo 11:28-30). Suni nevaʼa-de poder tágua chindee-de ñayí, de suni kuatiñu-de ta kɨvɨ tatuni-de nu̱u̱ Ñuʼun nde andɨvɨ́. De ta ni yaʼa kɨvɨ ja ni nateku Jesús, ni ndaa-de andɨvɨ́, de ni ndetu-de xiín ndaʼá kuáʼá Yandios nde kɨvɨ ni tíin-de tiñu tágua tatuni-de (Hebreos 10:12, 13). De ni jinú kɨvɨ ja ni jeʼe Yandios tiñu sɨkɨ-de. Kaʼvi-ní Lucas 1:32, 33.
3. ¿A tatuni kuaʼa ka ñayí jín Jesús?
Nu̱u̱ Biblia kachi ja tatuni Jesús jín jaku ni̱ ñayí ja ka satiñu-ji nu̱u̱ Yandios. Nu̱u̱ Daniel 7:27 kachi ja ka nani-de santo. Nda ñayí xinañuʼun ja ni ka̱ji Yandios tágua ku̱ú santo ni kuu nda apóstol maa Jesús. Nde kɨvɨ mita ka̱ji-ka Jeová ndaka teé ji ñaʼan ja iyo fe tágua ku̱ú nda-de santo. Jesús ni ji̱ʼi̱-de de ni ndaa-de andɨvɨ́, suni sukua nda ñayí yaʼa kɨvɨ ka ji̱ʼi̱-ji, Jeová nasteku Ya-ji tanu ɨn espíritu nde andɨvɨ́. Kaʼvi-ní Juan 14:1-3 ji 1 Corintios 15:42-44.
¿Nasaa ñayí kiʼin andɨvɨ́? Nu̱u̱ Tutu Yandios kachi ja jaku ni̱ ñayí kuu, de Jesús ni kachi-de ja nani ‛jaku tikachi’ (Lucas 12:32). Nda ñayí ja tatuni nu̱u̱ Ñuʼun jín Jesús kuu 144.000. Kaʼvi-ní Apocalipsis 14:1.
4. ¿Naguá ni kuu kɨvɨ ja ni jakoso corona xini Jesús?
Ni jakoso corona xini Jesús kuiya 1914, de xinañuʼun ja ni saʼa-de kuu ja ni tava̱-de Tachi Juʼvi ji nda tachi xée̱n nu̱u̱ andɨvɨ́ de ni skuun-de nu̱u̱ Ñuʼun. * Tachi Juʼvi ni Kɨtɨ̱ xée̱n ini de ni kejaʼa saʼa tundoʼo nɨkaʼnu ñuuyɨvɨ́ (Apocalipsis 12:7-10, 12). Nde kɨvɨ ñukua ñuuyɨvɨ́ yaʼa xée̱n tuni ka iyo ɨn kɨvɨ ɨn kɨvɨ. Nda ñuʼun ta̱an, kue̱ʼe̱, ta̱ma̱ ji ja kana̱á ñuu, kenda kuu ɨn tuʼun ja ni kachi Biblia ja ku̱ú, de ja yaʼa steʼen ja vakuñati kɨvɨ ja tatuni Reino Yandios nɨkaʼnu nu̱u̱ Ñuʼun. Kaʼvi-ní Lucas 21:7, 10, 11, 31.
5. ¿Naguá saʼa Reino Yandios mita, de naguá ku̱ú ja saʼa ichi nu̱u̱?
Reino Yandios jatiñu ñayí ja ka kaʼan tuʼun Yandios nɨkaʼnu ñuuyɨvɨ́, tágua nastútú “kuaʼa ndasi̱ nchivi̱” ndɨʼɨ ñuu. Iyo kuaʼa tuni millón teé ji ñaʼan vaʼa ini ja kandija nu̱u̱ Reino Jesús. Ndɨʼɨ nda ñayí yaʼa káku-ji kɨvɨ ja xnaa Reino Yandios ñuuyɨvɨ́ kini̱ yaʼa. De ñukua kuu ja nu kúni-yo ni̱ʼi̱n-yo ja kuáʼa Reino, jiniñuʼun kandija-yo nu̱u̱ Jesús. Kaʼvi-ní Apocalipsis 7:9, 14, 16, 17.
Ta ni̱ jika mil kuiya, Reino Yandios saʼa ja kuu nda̱a̱ ja ni kúni Yandios nde kɨvɨ xinañuʼun nu̱u̱ ñuuyɨvɨ́. Ñuʼun ndu̱u̱ ɨn ñuʼun vii. De ja sándiʼi ñukua de Jesús ndakuáʼa-de Reino nu̱u̱ Ta̱tá-de (1 Corintios 15:24-26). ¿A taʼa̱n ini-ní ndakani-ní tuʼun sɨkɨ Reino yaʼa nu̱u̱ ɨn ñayí? Kaʼvi-ní 2 Pedro 3:13.
^ párr. 6 Tágua kutuʼva ka-ní sɨkɨ tuʼun ja ni kachi Tutu ii sɨkɨ kuiya 1914, kundeʼe-ní nu̱u̱ nota 22 nu̱u̱ nda página 217 nde 220 nu̱u̱ tutu ¿Qué nos enseña la Biblia? Nu̱u̱ tuʼun stila.
