LECCIÓN 10
¿Na̱sa kuni-yo nde kuu religión nda̱a̱?
1. ¿A iyo ɨn matuʼun ni̱ religión nda̱a̱?
“De ma kandija kuiti̱-ro nda teé stáʼvi.” (MATEO 7:15)
Jesús ji nda discípulo-de ni ka saʼa-de ja ni kachi matuʼun ni̱ religión nda̱a̱, de ni skani taʼan-de jín ɨn ichi ja saʼa ja kuteku-yo nɨkani, de jaku ni̱ ñayí kuu ja ka ndaniʼi (Mateo 7:14). Yandios taʼa̱n ini-Ya ja chiñuʼun yo-Ya tanu kachi Tuʼun nda̱a̱ ja yoso nu̱u̱ Biblia. Nda ñayí ja chiñuʼun-Ya ta ɨn kaʼan tuʼun nda̱a̱ yaʼa, iyo inuú ini-ji nu̱u̱ ɨn ni̱ fe. Kaʼvi-ní Juan 4:23, 24 ji Efesios 4:4, 5.
Kundeʼe-ní video ¿A jetaʼvi Yandios ndɨʼɨ nda veñuʼun?
2. ¿Naguá kuu ja ni kachi Jesús sɨkɨ nda cristiano túʼu̱n?
“De viso kaʼan-ji ja jini-ji Yaa Dios, shochi jín tiñu ja saʼa-ji de jini o ja nduu.” (TITO 1:16)
Jesús ni kachi-de nu̱u̱ nda cristiano ja koo sava ñayí ja sa̱ma-ji tuʼun ja ni steʼen-de sɨkɨ na̱sa kuu ja chiñuʼun nda̱a̱ ji ja tandee nu̱u̱ Yandios. Nda ñayí yaʼa ji veñuʼun nda-ji ka kaʼan-ji ja kuu nda-ji cristiano. Vese kachi nda-ji ja ka nevaʼa-ji ichi nda̱a̱, ma sú sukua ku̱ú chi sa ja kaʼan túʼu̱n-ji nu̱u̱ nda ñayí. Vese sukua, kuu ndakuni-yo nde kuu religión nda̱a̱ chi ja saʼa nda ñayí ja ka yiʼi-ji ñukua náʼán kají ja ka kuu-ji cristiano nda̱a̱. Kaʼvi-ní Mateo 7:14-23.
3. ¿Nde kuu nda ja saʼa ja kaʼan religión nda̱a̱?
Na kundeʼe-yo uʼun tiñu ja steʼen kají nde kuu nda ñayí yaʼa:
-
Kandija nda̱a̱-ji ja Tuʼun Yandios kuu Biblia. Nduu kandija-ji tuʼun steʼen ñayí ñuuyɨvɨ́ chi sa chuʼun ini-ji ja kandija-ji ichi ja yoso nu̱u̱ Biblia (Mateo 15:7-9). De suni, saʼa nda-ji tuʼun ja ka steʼen-ji. Kaʼvi-ní Juan 17:17 ji 2 Timoteo 3:16, 17.
-
Yɨñuʼún nda-ji sɨvɨ Yandios, Jeová. Jesús ni saʼa-de sukua ta steʼen-de sɨvɨ Ta̱tá-de. Ni kaʼan-de jín nda ñayí sɨkɨ Jeová ji steʼen-de na̱sa saʼa-ji sáʼan: “Ta̱tá nda-ni ja iyo-ro andɨvɨ́, na ku̱ú i̱i̱ sɨvɨ-ro” (Mateo 6:9, TNM). ¿Nde ɨn religión kuu ja steʼen sɨvɨ Yandios nu̱u̱ ndee-ní? Jesús ni kachi-de: “De maa-ni ja ni steʼen-ni sɨvɨ-ro, de steʼen ka-ni, tágua tuʼun kundaʼvi ini ja ni kundaʼvi ini-ro nduʼu koo ji nda-ji, de sukua koo inuú-ni jín nda-ji” (Juan 17:26, TNM).
-
Ka steʼen-ji sɨkɨ Reino Yandios. Ni ndetiñu-Ya Jesús nu̱u̱ Ñuʼun tágua steʼen-de tuʼun vaʼa sɨkɨ Reino Yandios, de suu yaʼa kuu matuʼun tuʼun vaʼa ja ndetu ñuuyɨvɨ́. Ni saʼa-de tiñu yaʼa nde kɨvɨ ja ni ji̱ʼi̱-de (Lucas 4:43; 8:1; 23:42, 43). De suni, ni kachi-de ja nda discípulo-de kuikonu̱u̱ kachi tuʼun sɨkɨ gobierno yaʼa. Suu kuu ja nu ɨn ñayí ni kenda nu̱u̱ ndee-ní de kaʼan sɨkɨ Reino Yandios, ¿na religión káʼán-ní ja kuu-ji? Kaʼvi-ní Mateo 24:14.
-
Nduu kuu nda-ji ñayí ñuuyɨvɨ́ ndevaʼa yaʼa. Nda discípulo Jesús nduu kɨ̱vɨnduu nu̱u̱ política ni nu̱u̱ tuʼun kɨtɨ̱ ini ñuu ñuuyɨvɨ́ (Juan 17:16; 18:36). Suni nduu ka jani ini-ji de nduu ka saʼa-ji tanu saʼa nda ñayí ñuuyɨvɨ́ ja ka saʼa tiñu ja nduu iyo vaʼa. Kaʼvi-ní Santiago 4:4.
-
Náʼán kají ja kundaʼvi nu̱u̱ taʼan-ji. Nduu naguá saʼa na ñuu ka kuu-ji, Tuʼun Yandios ni steʼen nu̱u̱ nda-ji ja koo yɨñuʼún-ji nu̱u̱ ndɨʼɨ ñayí. Nda religión ja nduu steʼen nda̱a̱ ka kɨ̱vɨnduu-ji nu̱u̱ kana̱á ñayí, de nda ñayí ja chiñuʼun nda̱a̱ Yandios nduu saʼa-ji sukua (Miqueas 4:1-3). Sa jeʼe nda-ji tuʼun ndeé ini nu̱u̱ taʼan-ji ji jatiñu-ji tiempo-ji ji ndatiñu-ji tágua ka chindee-ji taʼan-ji de nduu naguá ndetu-ji ni̱ʼi̱n-ji nu̱u̱ tiñu ja saʼa-ji. Kaʼvi-ní Juan 13:34, 35 ji 1 Juan 4:20.
4. ¿A ku̱ú ndakuni-ní nde kuu nda ñayí ja chiñuʼun nda̱a̱ Yandios?
¿Na religión kuu ja ndɨʼɨ tuʼun ja steʼen yoso nu̱u̱ Biblia, yɨñuʼún sɨvɨ Yandios ji kaʼan ja Reino-Ya ja iyo andɨvɨ́ kuu matuʼun ni̱ ja vaʼa ja ndetu ñuuyɨvɨ́? ¿Nde kuu matuʼun ni̱ religión, ja maa ja nda̱a̱ ja kundaʼvi nu̱u̱ taʼan de nduu chindee nu̱u̱ kana̱á ñayí ñuu? ¿Na̱sa jani ini-ní? Kaʼvi-ní 1 Juan 3:10-12.
