Yandios ni jeʼe-Ya kuaʼa ley nu̱u̱ nda seʼe teé kuñaʼnu Abrahán tágua kenda kuu ñuu-Ya. Ñuu yaʼa ni nani Israel, de ni kuu matuʼun ñuu ja ni nevaʼa tuʼun Yandios ji chiñuʼun nda̱a̱ ji-Ya (Salmo 147:19, 20). Ja sɨkɨ ñuu yaʼa, nda ñayí ndaka ka ñuu kuu ni̱ʼi̱n-ji ja vaʼa. Kaʼvi-ní Hechos 3:25.

Yandios ni ka̱ji-Ya nda israelita tágua kuu nda-ji testigo maa-Ya. Nda tuʼun janaʼán ja ndakani sɨkɨ ñuu yaʼa steʼen nu̱u̱-yo ja nu kandija-yo nda ley Yandios kuu ni̱ʼi̱n-yo ja vaʼa (Deuteronomio 4:6). Ja sɨkɨ ñuu yaʼa, ndaka nda ñayí ku̱ú ka kuni-ji Yandios nda̱a̱. Biblia steʼen: “Nda maa-ro ka kuu-ro testigo maa-ni, kuu tuʼun kaʼan Jeová” (Isaías 43:10).

Ta nduu ni kandija ka ñuu Israel nu̱u̱ Jeová, ñuu ja ni ka̱ji-Ya, ni nasa̱ma-Ya inka ñuu ja kuu nda cristiano (Mateo 21:43; 23:37, 38). Suu kuu ja mita nda cristiano nda̱a̱ kuu ja satiñu nu̱u̱ Jeová tanu nda testigo maa-Ya de ma sú ka nda israelita. Kaʼvi-ní Hechos 15:14, 17.

Jesús ni saʼa tuʼva-de nda ñayí ja ni jika jín-de tágua ka kaʼan-ji tuʼun Yandios ji nandukú-ji ñayí nɨkaʼnu ñuuyɨvɨ́ tágua satiñu-ji nu̱u̱ Yandios (Mateo 10:7, 11; 24:14; 28:19, 20). De mita, nda kɨvɨ sándiʼi ñuuyɨvɨ́ yaʼa nɨkaʼnu nu̱u̱ ñuʼun ka saʼa tiñu kánuu yaʼa. De nda kɨvɨ kánuu yaʼa, Jeová nastútú-Ya kuaʼa millón nda ñayí nu̱u̱ ndɨʼɨ ñuu tágua kɨ̱vɨ-ji nu̱u̱ religión nda̱a̱ (Apocalipsis [Revelación] 7:9, 10). Sɨkɨ ja iyo tútú nda cristiano nda̱a̱, kuu chindee taʼan-ji ji jeʼe-ji tuʼun ndeé ini nu̱u̱ taʼan-ji. Suni ɨn ni̱ tuʼun kuu ja ka kutuʼva-ji nu̱u̱ reunión. Kaʼvi-ní Hebreos 10:24, 25.

Ni ka kejaʼa-de kuiya 1870. Ɨn grupo luli ni̱ kuu ja ni kejaʼa skuaʼa Biblia de sukua ni ka ndaniʼi nda-de tuʼun nda̱a̱ sɨkɨ Yandios ja ni iyo yuʼu̱ kuaʼa tiempo. Ni jakuʼun ini nda-de ja Jesús kuu ja ni saʼa tuʼva nda ñayí tágua ka kaʼan-ji tuʼun Yandios, sukua ni ka kejaʼa-de steʼen-de tuʼun sɨkɨ Reino nɨkaʼnu ñuuyɨvɨ́. De kuiya 1931 ni ja̱kunaní nda-de testigo Jeová. Kaʼvi-ní Hechos 1:8; 2:1, 4, 11, ji 5:42.

Nu̱u̱ ja ni ya̱ʼa kuiya ja ni ji̱ʼi̱ Jesús, ni jakoo ɨn grupo luli teé ja ni ndiki̱ Jesús ja ni yoso nu̱ú ji ja ni jito ñunkúú nda congregación, ji ni ka ndakuni-de ja Jesucristo kuu Xini nda-de (Hechos 16:4, 5). Suni sukua kuu mita, nu̱u̱ nda testigo Jeová iyo ɨn grupo luli teé jini ka ja ka ndiki̱ Jesús, ja yoso nu̱ú ji ka jito ñunkúú nda congregación, suu nda-de kuu ja jito nda sucursal ja iyo nɨkaʼnu ñuuyɨvɨ́. Grupo yaʼa nani Cuerpo Gobernante. Nu̱u̱ nda sucursal yaʼa ka ndasiáʼa tuʼun kaʼan inka ñuu, tava̱ ji skuite nu̱u̱ nda tutu ja steʼen tuʼun Yandios nu̱u̱ viʼi ka iñu ciento yuʼu. Nda teé yaʼa jatiñu nda-de Biblia tágua kuáʼa-de tuʼun ndeé ini ji chuʼun ichi-de viʼi ka cien mil congregación, suni iyo kuaʼa teé ja jini-de na̱sa koto ñunkúú-de nda tikachi Yandios. Kaʼvi-ní 1 Pedro 5:2, 3.

Nda testigo Jeová ka satiñu inuú ini-de tágua ka kaʼan-de nda tuʼun vaʼa ja vaji nu̱u̱ Biblia ji ka nandukú-de ñayí tágua satiñu nu̱u̱ Yandios. Tanu ni ka saʼa nda apóstol, suni sukua ka steʼen-de tuʼun Yandios veʼe veʼe (Hechos 20:20). Suni ka jeʼe-de curso sɨkɨ tuʼun Yandios nu̱u̱ nda ñayí ja kutoo-ji tuʼun nda̱a̱. De ma sú ja iyo tútú ni̱ nda ñayí yaʼa chi suni ka kuu-ji tanu ɨn ñayí veʼe nu̱u̱ iyo ñani̱, kuáʼa ji ku̱ʼu̱ ja ka kundaʼvi taʼan ini-ji ji iyo sii ini-ji chi jito Ta̱tá Yandios nu̱u̱ nda-ji (2 Tesalonicenses 1:3). Ndɨʼɨ ñayí ja kuu-ji ñuu nda̱a̱ Yandios ndɨʼvɨ ini-ji saʼa-ji ja taʼa̱n ini Yandios ji chindee-ji ndaka ñayí de sukua ka kuu-ji ñayí ja ndee sii ka níí ñuuyɨvɨ́. Kaʼvi-ní 1 Pedro 2:9 ji Hechos 20:35.