•   Biugo bia Kwambĩrĩria 2

•   Mantũ ja Bata Kuuma Rũtetone rwa Mũrungu 3-5

  •  Rwaria 3

  •  Mũthithũ jwa Gĩkĩrundu 4

  •  Ũthoomi bwa Bibiria 5

•   Agĩrithia Ũtungatĩri Bwaku 6-14

  •  Kwambĩrĩria Rwaria 7

  •  Gũcookera Antũ 8

  •  Kwethia Antũ Aritwa 9

  •  Gũtarĩĩria Jarĩa Wĩtĩkĩtie 10

  •  Rwaria 11

  •  Jarĩa Jabuĩrĩte Kwarĩĩrua 12

  •  Njĩra cia Gũtũmĩĩria 13

  •  Gũtumĩra Vidio na Mauku 14

•  Mũtũũrĩre jwa Gĩkristũ 15-16

  •   Wiritani bwa Bibiria bwa Kĩũthũrano 16

•  Biugo bia Kũrĩkĩĩria 17

•  Gũcookia Nkaatho na Kwejana Ũtaaro 18

•  Gũtumĩra Ĩgiita 19

•  Ndiũnga ya Mũtegeeri wa Mũthiũrũko 20

•  Kiumia gĩa Kĩgomano kĩa Mũthiũrũko kana kĩa Gĩcigo 21

•  Kiumia kĩa Mũriikana 22

•  Mũtegeeri wa Mũcemanio jwa Ũtũũro na Ũtungatĩri 23

•  Mũkarĩrigĩtĩ wa Mũcemanio jwa Ũtũũro na Ũtungatĩri 24

Mwejani Motaaro Jegie Ũritani 25

•  Iraci Bingĩ 26

•  Vidio 27

1. Mendekithia jarĩa jonanĩĩtue aja jagatetheeria bonthe barĩa barĩ na twanya kĩrĩ mũcemanio jwa Ũtũũro na Ũtungatĩri Bwetũ bwa Gĩkristũ. Babuĩrĩte kũthooma mendekithia jegie kaanya kaao o ta ũrĩa kwonanĩtue aja na kĩrĩ Gauku ka Mũcemanio jwa Ũtũũro na Ũtungatĩri, mbere ya kũthuranĩra kaanya kaao. Atũmĩĩria bonthe nĩbabuĩrĩte gwĩkĩrwa nkoro bairitĩre kũthithia twanya twa aritwa. Antũ bangĩ barĩa bagwatanagĩra na kĩũthũrano, no baewe twanya benda, bunka akĩ nĩbagwĩtĩkanĩĩria na ũritani bwa Bibiria, na nĩbagũtũũra kũringana na mooritani ja Gĩkristũ. Mũtegeeri wa Mũcemanio jwa Ũtũũro na Ũtungatĩri nabuĩrĩte kwaranĩria na barĩa batĩ atũmĩĩria, bwegie mantũ jarĩa babuĩrĩte kũthithia kethĩra muntũ nakwenda kwejagwa twanya mũcemanione jũjũ, na amũmenyithie kethĩra nakwagĩra. Abuĩrĩte kũthithia ũu barĩ amwe na ũrĩa ũmũritanaga Bibiria (kana barĩ amwe na mũciari waawe kethĩra nĩ mũkũũjĩ wa Jehova). Mantũ jarĩa jategagĩĩrwa no ũmwe na ja muntũ ũrĩa ũkwenda kwaa mũtũmĩĩria ũtĩrabatithua.—od-SW kĩth. 8 gĩc. 8.

2. Ndagĩka ĩmwe. O kiumia nyuma ya rwĩmbo na maromba ja kwambĩrĩria, mũkarĩrigĩtĩ wa Mũcemanio jwa Ũtũũro na Ũtungatĩri akagweta acancamũki bwegie jarĩa jakaarĩĩrua. Mũkarĩrigĩtĩ abuĩrĩte kwinyĩĩria mantũ jarĩa jakaguna kĩũthũrano nkũrũki.

 3. Rwaria: Ndagĩka ĩkũmi. Kĩongo na mantũ jaĩrĩ kana jathatũ jarĩa jagũciũmĩria nĩjethagĩrwa jaandĩki kĩrĩ Gauku ka Mũcemanio jwa Ũtũũro na Ũtungatĩri. Rwaria rũrũ rũbuĩrĩte kũgaĩrwa mũkũrũ wa kĩũthũrano kana nthũmba ya ũtungatĩri ũrĩa ũkwagĩra. Rĩrĩa iuku rĩrĩerũ rĩa Bibiria rĩkwambĩrĩrua kĩrĩ ũthoomi bwa Bibiria bwa o kiumia, vidio ya jarĩa jarĩ iukune rĩu ĩkonanua. Mwaria no agwete ũrĩa jarĩa jarĩ kĩrĩ vidio ĩu jagwĩtanĩria na kĩongo kĩa rwaria. O amwe nou, nabuĩrĩte kwarĩĩria jarĩa jarĩ kĩrĩ gauku ka mũcemanio. Kinya kwethĩrwa na kaanya, no aarĩĩrie mbica, tontũ nĩ cia kwigĩka mantũ jarĩa jakwarĩĩrua. Kinya no agwete mantũ jangĩ jarĩa jaejani bunka akĩ nĩjagũtetheeria gwaka mantũ jarĩa jarĩ kĩrĩ rwaria.

 4. Mũthithũ jwa Gĩkĩrundu: Ndagĩka ĩkũmi. Gĩkĩ nĩ gĩcuncĩ kĩa biũria na macookio, gĩtĩna biugo bia kwambĩĩria kana bia kũrĩĩkia. Kĩbuĩrĩte kũgaĩrwa mũkũrũ wa kĩũthũrano kana nthũmba ya ũtungatĩri ũrĩa ũkwagĩra. Ũrĩa ũgũtongeeria abuĩrĩte kũũria athikĩĩria biũria biĩrĩ birĩa biejani. Kinya akathuura kethĩra mĩstaarĩ ya Bibiria ĩrĩa yejani ĩkathoomwa kana ĩtĩthoomwa. Barĩa bakaewa kaanya ka gũcookia, babuĩrĩte gũtumĩra sekendi 30 kana inkai.

 5. Ũthoomi bwa Bibiria: Ndagĩka inya. Kaanya gaka ka mũritwa kabuĩrĩte kũgaĩrwa antũ arũme. Mũritwa abuĩrĩte kũthooma gacuncĩ karĩa agaĩri ĩmwe kwa ĩmwe atĩkũgweta mantũ jangĩ akĩambĩrĩria kana akĩrĩĩkia. Mũkarĩrigĩtĩ wa mũcemanio akainyĩĩria mono mono gũtetheeria aritwa kĩrĩ kũthooma bwega, gũciũkĩrwa nĩ jarĩa bakũthoooma, kũthooma taarĩĩria, kwinyĩĩria biugo, kũgarũra kaajũ, gũkira arĩa gũkwagĩra, na kwaria na njĩra ya wĩthĩre. Tontũ icuncĩ bimwe bia ũthoomi bwa Bibiria nĩ biikuĩ na bingĩ nĩ biiraaja, mũtegeeri wa Mũcemanio jwa Ũtũũro na Ũtungatĩri, nabuĩrĩte kũthũgaanĩria ũũmbi bwa o mũritwa rĩrĩa akũgaa twanya tũtũ.

6. Ndagĩka ĩkũmi na ithano. Mworoto jwa gĩcuncĩ gĩkĩ kĩa mũcemanio nĩ kwaa antũ bonthe kaanya ga kwimenyerithia tontũ bwa ũtungatĩri, na kwagĩrithia ũũmbi bwao bwa gũtũmĩĩria na kũritana. Kwabatarĩka, akũrũ ba kĩũthũrano no bagaĩrwe twanya twa aritwa. O mũtũmĩĩria nabuĩrĩte kũritĩra ngũgĩ ũntũ bũrĩa aragaĩri kuuma kĩrĩ gauku Kufundisha kana Enda Antũ bũrĩa bwonanĩtue kĩrĩ Gauku ka Mũcemanio jwa Ũtũũro na Ũtungatĩri. Magiita jamwe, gacuncĩ ga kwaranĩria amwe na athikĩĩria gakeejanwa. Gacuncĩ ta kau gakaarĩĩragua nĩ mũkũrũ wa kĩũthũrano kana nthũmba ya ũtungatĩri ũrĩa ũkwagĩra.—Tega  gacuncĩ ka 15 kegie ũrĩa tũcuncĩ twa kwaranĩria tũbuĩrĩte kũritwa.

 7. Kwambĩrĩria Rwaria: Kaanya gaka ka mũritwa no kagaĩrwe muntũ mũrũme kana muntũ mũka. Kethĩra muntũ mũrũme na muntũ mũka bakarita barĩ amwe, babuĩrĩte kwĩthĩrwa barĩ ba nja ĩmwe. Barĩa bagaĩri kaanya gaka, no barite barũngi kana bakari nthĩ.—Kwona mantũ nkũrũki jegie gacuncĩ gaka kana ũrĩa kabuĩrĩte kũritwa, tega  gacuncĩ 12 na  13.

 8. Gũcookera Antũ: Kaanya gaka ka mũritwa no kagaĩrwe muntũ mũrũme kana muntũ mũka. Gatĩbuĩrĩte kũritwa nĩ muntũ mũrũme na muntũ mũka barĩ amwe. (km-SW 5/97 kar. 2) Barĩa bagaĩri kaanya gaka, no barite barũngi kana bakari nthĩ. Mũritwa abuĩrĩte kwonania akĩarĩĩria ũntũ bũrĩa baatigĩĩrĩre na muntũ ũrĩa acookerete.—Kwona mantũ nkũrũki jegie gacuncĩ gaka kana ũrĩa kabuĩrĩte kũritwa, tega  gacuncĩ 12 na  13.

 9. Kwethia Antũ Aritwa: Kaanya gaka ka mũritwa no kagaĩrwe muntũ mũrũme kana muntũ mũka. Kabuĩrĩte kũritwa nĩ muntũ mũrũme na muntũ mũrũme, kana muntũ mũka na muntũ mũka. (km-SW 5/97 kar. 2) Barĩa bagaĩri kaanya gaka, no barite barũngi kana bakari nthĩ. Kaanya gaka kabuĩrĩte kwonania wiritani bwa Bibiria bwĩtĩte na mbere. Mũritwa atĩbuĩrĩte kũgweta mantũ jangĩ akĩambĩrĩria kana akĩrĩĩkia, tinga akethĩrwa nĩbu ũntũ akũritagĩra ngũgĩ. To mwanka mantũ jarĩa jarĩ gĩcuncĩne kĩu jathoomwe jonthe.

 10. Gũtarĩĩria Jarĩa Wĩtĩkĩtie: Rĩrĩa kaanya gaka kabanganĩtue ta rwaria, kabuĩrĩte kũgaĩrwa muntũ mũrũme. Rĩrĩa kethĩrwa karĩ kĩonanĩĩria, no kagaĩrwe muntũ mũrũme kana muntũ mũka. Kethĩra muntũ mũrũme na muntũ mũka bakarita kaanya gaka barĩ amwe, bethĩrwe barĩ ba nja ĩmwe. Mũritwa nabuĩrĩte kwejana ĩcookio rĩrĩega na rĩa ũũme rĩa ũntũ bũrĩa bũrĩtue kĩrĩ kĩongo, agĩtumagĩra kaumo ka mantũ karĩa kaejani. Mũritwa akathuura kethĩra akagweta kana atĩgweta kaumo ka mantũ jarĩa akwarĩĩria akĩrita kaanya gaka.

 11. Rwaria: Kaanya gaka ka mũritwa kabuĩrĩte kũgaĩrwa muntũ mũrũme na akarite ta rwaria kĩrĩ kĩũthũrano. Rwaria rũkeja kwĩthĩrwa rũkĩaragĩĩria ũntũ bũnna kuuma kĩrĩ nteto irĩa irĩ mũthia A kĩrĩ gauku Enda Antũ, mũritwa nabuĩrĩte kwonania ũrĩa mũstaarĩ kana mĩstaarĩ iu yũũmba gũtumĩrwa ũtungatĩrine. Ngerekano, no atarĩĩrie nĩrĩ mũstaarĩ jũu jũũmba gũtumĩrwa, ũrĩa jũkwonania, na ũrĩa ũũmba kũjwarĩĩria na muntũ. Rĩrĩa rwaria rũkwarĩĩria ũntũ bũnna kuuma kĩrĩ kĩthoomo kĩmwe kĩa gauku Enda Antũ, mũritwa abuĩrĩte kwinyĩĩria ũrĩa ũntũ bũu bũũmba gũtumĩrwa ũtungatĩrine. No arĩĩrie ngerekano irĩa ciejani kĩrĩ ũntũ bwa 1 bwa kĩthoomo, kana mĩstaarĩ ĩngĩ ĩrĩa ĩrĩ kĩthoomone kĩu, kethĩra ĩgatethia.

   12. Jarĩa Jabuĩrĩte Kwarĩĩrua: Mantũ jarĩa jarĩ gĩcuncĩne gĩkĩ na kĩrĩa kĩthingatĩte, jegie kaanya ga “Kwambĩrĩria Rwaria” na ka “Gũcookera Antũ”. Tinga gũkethĩrwa kwonanĩĩtue ũũngĩ, mworoto jwa mũritwa nĩ kwarĩĩria ũmma bũnna bwa Bibiria bũrĩa bũkwagĩra muntũ ũrĩa akwaranĩria nawe, na gwĩĩka mũsingi jwa gwitithia rwaria na mbere ĩgiita rĩngĩ. Mũritwa nabuĩrĩte kũthuura kĩongo kĩrĩa gĩkwagĩra ĩgiita rĩu, na gĩkwagĩra gĩcigone kĩrĩa agũtũmĩĩria. Akathuura kethĩra no amwee iuku kana kũmwonia vidio kuuma kĩrĩ Kathandũkũ ka Into Bietũ bia Kũritana. Antũ a kũthingatĩĩra kĩonanĩĩria kĩrĩa kĩbanganĩtue o mbere, mũritwa abuĩrĩte kwimenyerithia ũtea bwa kwaria, ta kwarĩĩria mantũ jarĩa jagũkucĩĩria bangĩ na kwaria na njĩra ya wĩthĩre.

   13. Njĩra cia Gũtũmĩĩria: Mũritwa abuĩrĩte gũtumĩra njĩra ĩrĩa yejani kũringana na gĩcigo kĩrĩa agũtũmĩĩria. Ngerekano:

1.  (1) Nyomba kwa Nyomba: Njĩra ĩjĩ ya gũtũmĩĩria nĩ ya nja kwa nja—wĩthĩrwe nĩ muntũ gwĩta ĩmwe kwa ĩmwe, gũkũrũkĩĩra thimũ, kana barũga—na gũcookera muntũ ũrĩa bwaranĩrĩĩtie nawe ũrĩ ntũmĩĩrine ya nyomba kwa nyomba.

2.  (2) Gũtũmĩĩria Ũrĩ Mantũne Jangĩ: Njĩra ĩjĩ ĩrĩtarĩĩria gũtumĩra kanya karĩa bũkwarĩĩria mantũ jangĩ na muntũ, ũkagarũra rwaria nĩkenda ũmũtũmĩĩrĩria. Womba kũthithia ũu rĩrĩa wathoomera muntũ Ĩandĩko bũrĩ ngũgĩne, cukuru, naarĩa ũkaraga, ũkamati nĩ matatũ, kana o naarĩa ũkethĩrwa mantũne jangĩ.

3.  (3) Gũtũmĩĩria Gũntũ kwa Mwingĩ: Njĩra ĩjĩ nĩ amwe na ntũmĩĩri ya kĩgarĩ, gũntũ kwa biashara, barabareene, bieniine bia kũnogoka, naarĩa ngarĩ ipakagwa, kana gũntũ kunthe kũrĩa antũ boomba kwonekana.

 14. Gũtumĩra Vidio na Mauku: Kũringana na mantũ jarĩa mũritwa akarĩĩria, no athuure gũtumĩra vidio kana iuku. Kethĩra kaanya kau karĩna vidio, kana kethĩra akathuura gũtumĩra vidio nna, abuĩrĩte kũmĩgweta na kũmĩarĩĩria, ĩndĩ tĩ kũmĩonania.

15. Nyuma ya rwĩmbo, ndagĩka 15 irĩa ikathingata cia gĩcuncĩ gĩkĩ, gũkethĩrwa na gacuncĩ kamwe kana twĩrĩ tũrĩa tũthuranĩri gũtetheeria athikĩĩria gũtumĩra Rũteto rwa Mũrungu. Gacuncĩ ka mobatu ja kĩũthũrano kabuĩrĩte kũthithua nĩ mũkũrũ wa kĩũthũrano akĩ, ĩndĩ tũcuncĩ tũu tũngĩ no tũgaĩrwe mũkũrũ wa kĩũthũrano kana nthũmba ya ũtungatĩri ũrĩa ũkwagĩra, tinga gũkethĩrwa kwonanĩtue ũũngĩ. Rĩrĩa gacuncĩ kethĩrwa nĩ ga kwaranĩria, ũrĩa ũtongeretie no athuure gũtumĩra biũria kĩrĩ gacuncĩ konthe, o amwe na biũria birĩa biejani. Biugo biawe bia kwambĩrĩria bibuĩrĩte kwĩthĩrwa birĩ biikai nĩkenda kwĩthĩrwa na ĩgiita rĩa kũng’ana rĩa kwarĩĩria mantũ jarĩa jagũciumĩria, na kenda athikĩĩria bethĩrwa na kaanya ka gũcookia. Kwethĩrwa na kaanya ga kũũria mantũ, nĩbwega ũrĩa ũkoorua, kwombĩka eeje au mbere, antũ a kwaria akari nthĩ amwe na bangĩ.

 16. Wiritani bwa Bibiria bwa Kĩũthũrano: Ndagĩka mĩrongo ĩthatũ. Kaanya gaka kabuĩrĩte kũritwa nĩ mũkũrũ wa kĩũthũrano ũrĩa ũkwagĩra. (Naarĩa kũrĩna akũrũ baakai, nthũmba cia ũtungatĩri barĩa bakwagĩra no barite kaanya gaka kwabatarĩka.) Kĩama gĩa akũrũ nĩkĩbuĩrĩte kũthuura barĩa bakwagĩra gũtongeeria kaanya gaka ka Wiritani bwa Bibiria bwa Kĩũthũrano. Barĩa bakaathuurwa babuĩrĩte gũtongeeria bwega batĩgũkũrũkia ndagĩka, bainyĩĩrie maandĩko jarĩa jakũbatarĩka, na gũtetheeria bonthe kwona baita cia gũtumĩra jarĩa bairitana. Barĩa bakathuurwa bakagunĩka bakũrũkĩĩra mwerekera jũrĩa jwejani jwa gũtongeeria twanya twa biũria na macookio. (w23.04-SW kar. 24, kathandũkũ) Gĩcuncĩ kĩrĩa kĩragai gĩa kiumia kĩu kĩarĩĩkia kwarĩĩrua, to mwanka rwaria rũregue nĩkenda ndagĩka ithira. Kethĩrwa kwombĩka, gĩcuncĩ gĩkĩ no gĩtongeerue na kũthoomwa nĩ antũ mwanya mwanya o kiumia. Mũkarĩrigĩtĩ wa Mũcemanio jwa Ũtũũro na Ũtungatĩri akeeja kũromba ndagĩka inyiigaue, ũrĩa ũgatongeeria nĩwe ũkathuura ũrĩa agacinyiia. No athuure icuncĩ bimwe bitĩkathoomwe.

17. Ndagĩka ithatũ. Mũkarĩrigĩtĩ wa Mũcemanio jwa Ũtũũro na Ũtungatĩri agacookera mantũ jamakai ja gĩtũmi jarĩa jaciumĩria mũcemanione. Kinya nabuĩrĩte gũkũrũkĩĩra jarĩa jakaarĩĩrua kiumia kĩu kĩngĩ. No agwete mariĩtwa ja barĩa bakethĩrwa na twanya kiumia kĩu kĩngĩ, kethĩra ndagĩka itĩrathira. Tinga gũkethĩrwa kwonanĩtue ũũngĩ, mũkarĩrigĩtĩ abuĩrĩte kũthoomera kĩũthũrano imenyithia na barũga irĩa ikũbatarĩka ĩgiita rĩa biugo biawe bia kũrĩĩkia. Imenyithia bia wĩthĩre, ta mĩcemanio ya ũtungatĩri na mĩbango ya ũtheru, bitĩbuĩrĩte gũtũmĩĩrua mũcemanione, ĩndĩ bibuĩrĩte gwĩkwa kĩbaũne kĩa imenyithia. Kethĩra ndagĩka cia biugo bia kũrĩĩkia itĩng’ana nĩkenda barũga kana imenyithia bimwe bithoomwa, mũkarĩrigĩtĩ nabuĩrĩte kũromba barĩa barĩna twanya kĩrĩ gacuncĩ ka Mũtũũrĩre jwa Gĩkristũ, banyiie twanya twao ũrĩa kũmbĩkĩka. (Tega gĩcuncĩ kĩa 16 na 19.) Mũcemanio jũkathira na rwĩmbo na maromba.

18. Kĩrĩ kaanya ka o mũritwa, mũkarĩrigĩtĩ wa Mũcemanio jwa Ũtũũro na Ũtungatĩri agatumĩra ndagĩka ta ĩmwe kũmũcookeria nkaatho na kũmwaa ũtaaro agĩtumagĩra ũntũ bwa kwiritana bũrĩa aragaĩrĩ. Rĩrĩa mũkarĩrigĩtĩ akũgwata ũgeni mũritwa, atĩgweta ũntũ bũrĩa akũritĩra ngũgĩ. Amwe nou, mũritwa arĩĩkia kaanya kaawe, na mũkarĩrigĩtĩ amũcookeria nkaatho ũrĩa gũkwagĩra, akagweta ũntũ bũrĩa akũritagĩra ngũgĩ na agwete naarĩa athithia bwega, kana na njĩra ya wendo atarĩĩrie nĩkĩ na ũrĩa mũritwa abuĩrĩte kwagĩrithia nkũrũki kĩthoomo kĩu. Mũkarĩrigĩtĩ kinya no agwete ũntũ bũngĩ bwegie kĩonanĩĩria bũrĩa akwona bwomba kũguna mũritwa kana kinya athikĩĩria. Ũtaaro bungĩ bwa gwaka kuuma kĩrĩ gauku Enda Antũ, Kufundisha, kana iuku Shule ya Huduma, no bwejwanwe kĩrĩ mũritwa arĩ wenka nyuma ya mũcemanio kana ĩgiita rĩngĩ, bũkiinyagĩĩria ũntũ bũrĩa akũgaĩri kana ũntũ bũngĩ.—Kenda wona mantũ nkũrũki jegie ngũgĩ ya mũkarĩrigĩtĩ wa Mũcemanio jwa Ũtũũro na Ũtungatĩri na mwejani motaaro jegie ũritani, tega  gacuncĩ  ka 19,  24, na 25.

19. Gũtĩ gacuncĩ kabuĩrĩte gũkũrũkia ndagĩka, kinya ka mũkarĩrigĩtĩ wa Mũcemanio jwa Ũtũũro na Ũtungatĩri. Kinya kethĩra Gauku ka Mũcemanio jwa Ũtũũro na Ũtungatĩri nĩkonanĩĩtie ndagĩka kĩrĩ o gĩcuncĩ, kethĩra gĩkũthithua bwega na ndagĩka itĩrathira, to mwanka wongeere mantũ nĩkenda ndagĩka ithira. Mũritwa akeeja gũkũrũkia ndagĩka, no arũngĩkwe na njĩra ya ũũme. Muntũ akeeja gũkũrũkia ndagĩka, mũkarĩrigĩtĩ wa Mũcemanio jwa Ũtũũro na Ũtungatĩri kana mwejani mootaro jegie ũritani, no amwee ũtaaro nyumene barĩ bo baĩrĩ. (Tega gĩcuncĩ kĩa 24 na 25.) Mũcemanio junthe, o amwe na ndwĩmbo na maromba, jũbuĩrĩte kũjũkia ĩthaa 1 na ndagĩka 45.

20. Rĩrĩa kĩũthũrano kĩrĩna ndiũnga ya mũtegeeri wa mũthiũrũko, mũtaratara jũrĩa jũrĩ kĩrĩ Gauku ka Mũcemanio jwa Ũtũũro na Ũtungatĩri nĩju jũbuĩrĩte kũthingatwa, tinga akĩ mantũ jaja: Kĩrĩ gĩcuncĩ kĩa Mũtũũrĩre jwa Gĩkristũ, rwaria rwa ndagĩka 30 rwa mũtegeeri wa mũthiũrũko rũkajũkia kaanya ka gacuncĩ ka Wiritani bwa Bibiria bwa Kĩũthũrano. Mbere ya rwaria rwa mũtegeeri wa mũthiũrũko, mũkarĩrigĩtĩ wa Mũcemanio jwa Ũtũũro na Ũtungatĩri agacookera jarĩa jarĩĩrua mũcemanione na agwete ja kiumia kĩu kĩngĩ, athoome imenyithia na barũga irĩa ikũbatarĩka, rĩu agwate ũgeni mũtegeeri wa mũthiũrũko. Nyuma ya rwaria, mũtegeeri wa mũthiũrũko akarĩĩkia mũcemanio na rwĩmbo rũrĩa akathuura. No agwate ũgeni mũtana wa baaba ũngĩ arĩĩkie na maromba. Gũtĩ iraci bingĩ mwanya bia kĩũthũrano o kĩu bibuĩrĩte kũthithua ĩgiita rĩa ndiũnga ya mũtegeeri wa mũthiũrũko. Kwethĩrwa kĩũthũrano kĩrĩa kĩrĩna ndiunga ya mũtegeeri kĩrĩ na gĩkundi, gĩkundi kĩu no kĩthithie mĩcemanio yakĩo. Amwe nou, gĩkundi kĩu nĩkĩbuĩrĩte kũgwatanĩra na kĩũthũrano nĩkenda bathikĩĩra rwaria rwa mũtegeeri wa mũthiũrũko.

21. Kiumia gĩa kĩgomano kĩa mũthiũrũko kana kĩa gĩcigo, gũtĩ mĩcemanio ya kĩũthũrano ĩkathithua. Kĩũthũrano nĩkĩbuĩrĩte kũriikanua atĩ, mantũ ja mũcemanio jarĩa jarabangi kiumia ta kĩu, jabuĩrĩte kũthomwa nĩ muntũ kĩũmbe kana ta nja.

22. Rĩrĩa Mũriikana jwa Gĩkuũ kĩa Jesũ jwethĩrwa gatĩgatĩ ga kiumia, Mũcemanio jwa Ũtũũro na Ũtungatĩri jũtĩthithua.

23. Mũkũrũ wa kĩũthũrano ũrĩa ũthuuri nĩ kĩama gĩa akũrũ, agatumĩka ta mũtegeeri wa Mũcemanio jwa Ũtũũro na Ũtungatĩri. Ngũgĩ yaawe nĩ gũtigĩĩra mũcemanio jũjũ nĩ jũbanganĩtue bwega na nĩ jũgũtongeerua kũringana na mendekethia jaja. Nabuĩrĩte kwĩthĩrwa na rũmenyeria rwa kwaranĩria na mwejani motaaro jegie ũritani. O rĩo gauku ka Mũcemanio jwa Ũtũũro na Ũtungatĩri kaumĩra, mũtegeeri wa Mũcemanio jwa Ũtũũro na Ũtungatĩri akabangania twanya tunthe twa mũcemanio jwa gatĩgatĩ ga kiumia, twa ĩgiita rĩa mĩeri ĩĩrĩ. Twanya tũu nĩ amwe na tũrĩa tũtĩejagwa aritwa, na twa akarĩrigĩtĩ ba mũcemanio jũjũ barĩa betĩkĩrĩĩtue nĩ kĩama gĩa akũrũ, na kinya twanya twa aritwa. (Tega gĩcuncĩ kĩa 3-16 na 24.) Rĩrĩa akũgaa twanya twa aritwa, nabuĩrĩte kũthũgaanĩria ũkũrũ, ũũmbi, na kethĩra mũritwa no arĩĩrie ũntũ bũrĩa agaĩri atĩkwigua nthao. O ũu nou abuĩrĩte kũthithia rĩrĩa akũgaa twanya tũngĩ twa mũcemanio. O kaanya kabuĩrĩte kwejanwa gĩntũ ta biumia bithatu mbere ya tarĩki cia gũkarita. Fomu ya Kaanya ka Mũcemanio jwa Ũtũũro na Ũtungatĩri Bwetũ bwa Gĩkristũ (S-89) ĩbuĩrĩte gũtumĩrwa kĩrĩ twanya twa aritwa. Mũtegeeri wa Mũcemanio jwa Ũtũũro na Ũtungatĩri nabuĩrĩte kwona atĩ, karataci ka mũtaratara jwa twanya twa mũcemanio junthe nĩgeeki kĩbaũne kĩa imenyithia. Kĩama gĩa akũrũ no kĩrombe mũkũrũ ũngĩ kana nthũmba ya ũtungatĩri amũtetheerie. Amwe nou, nĩ akũrũ akĩ babuĩrĩte kwejana twanya tũrĩa tũtĩ twa aritwa.

24. O kiumia, mũkũrũ ũmwe agatumĩka arĩ mũkarĩrigĩtĩ ĩgiita rĩa Mũcemanio jwa Ũtũũro na Ũtungatĩri. (Naarĩa kũrĩna akũrũ baakai, nthũmba cia ũtungatĩri barĩa bakwagĩra no baewe kaanya gaka kwabatarĩka.) Nowe ũkathuranĩra biugo bia kwambĩrĩria na bia kũrĩkĩĩria. Nĩwe ũgwataga ũgeni barĩa barĩ na twanya tũngĩ tunthe, na kethĩra akũrũ ba kĩũthũrano tĩ babaingĩ, no agaĩrwe twanya tũmwe twa mũcemanio, mono mono twanya twa vidio tũrĩa tũtĩkũbatara kwarĩĩrua. Abuĩrĩte kwaria na njĩra ĩnkuĩ rĩrĩa akwejana motaaro. Kĩama gĩa akũrũ, gĩkathuura nĩ akũrũ barĩkũ bakwagĩra kaanyene gaka. Akũrũ barĩa bakwagĩra bakaejagwa kaanya ga kwaa mũkarĩrigĩtĩ ĩgiita kwa ĩgiita. Kũringana na o kĩũthũrano, mũtegeeri wa Mũcemanio jwa Ũtũũro na Ũtungatĩri oomba gũtumĩka arĩ mũkarĩrigĩtĩ maita jamaingĩ nkũrũki ya akũrũ barĩa bangĩ bakwagĩra. Kethĩra mũkũrũ nakwagĩra gũtongeeria kaanya ka Wiritani bwa Bibiria bwa Kĩũthũrano, bũu nĩ bũgũtũma aagĩra kwaa mũkarĩrigĩtĩ wa mũcemanio. Itũ bu riikana atĩ, mũkũrũ ũrĩa ũgũtumĩka arĩ mũkarĩrigĩtĩ, na njĩra ya wendo nabuĩrĩte gũcookeria nkaatho barĩa barĩna twanya twa aritwa na kũbaa motaaro jarĩa jakabatethia, kwabatarĩka. Mũkarĩrigĩtĩ kinya akathingatĩĩra kwona atĩ mũcemanio jũkũthira ĩgiita rĩrĩa rĩagĩrĩte. (Tega gĩcuncĩ kĩa 17 na 19.) Mũkarĩrigĩtĩ enda na kwethĩrwa na kaanya gakũngˈana njukwaene, maĩkrofoni ĩngĩ no ĩĩkwe ĩrĩa agatumĩra kũgwata ũgeni barĩa barĩna twanya tũrĩa tũthingatĩte, nĩkenda nabo beeta arĩa kũrĩna maĩkrofoni ĩrĩa ĩtumagĩrwa nĩ barĩa bakwaria au mbere. Mũkarĩrigĩtĩ enda, no akare nthĩ au njukwaene ĩgiita rĩa gĩcuncĩ kĩa mũcemanio gĩa kaanya ka mũritwa ka ũthoomi bwa Bibiria, na twaanyene twa Agĩrithia Ũtungatĩri Bwaku. Bũu bũgatethia gũtumĩra ĩgiita bwega.

25. Kwombĩka, nĩbwega gũtumĩra mũkũrũ ũrĩa ũrĩ mwaria ũrĩna ũtea kaanyene gaka. Ngũgĩ ya mwejani motaaro jegie ũritani nĩ kwaa akũrũ na nthũmba cia ũtungatĩri motaaro kwabatarĩka nyuma ya mĩcemanio, na tĩ mbere ya antũ, kĩrĩ twanya tũrĩa bagaĩri, ta twa Mũcemanio jwa Ũtũũro na Ũtungatĩri, ndwaria cia antũ bonthe, gũtongeeria kana kũthooma ĩgiita rĩa Wiritani bwa Mũkaria, kana kĩrĩ Wiritani bwa Bibiria bwa Kĩũthũrano. (Tega gĩcuncĩ kĩa 19.) Kwethĩrwa kũrĩna akũrũ babaingĩ ba kĩũthũrano barĩa barĩ aritani na aaria babeega, o mwaka o mwaka mũkũrũ ũngĩ ũkwagĩra no atumĩke arĩ mwejani motaaro jegie ũritani. To mwanka mwejani motaaro jegie ũritani aejane ũtaaro o kaanya karitwa.

26. Kũringana na ũrĩa aritwa bangˈana, biũthũrano bĩomba kũthithia iraci bingĩ tontũ bwa twanya twa aritwa. O kĩraci kĩbuĩrĩte kwĩthĩrwa na mwejani motaaro ũkwagĩra, na mono mono ethĩrwe nĩ mũkũrũ wa kĩũthũrano. Kwabatarĩka, nthũmba ya ũtungatĩri ũrĩa ũkwagĩra no atumĩke. Kĩama gĩa akũrũ nĩkĩbuĩrĩte kũthuura nĩ baaũ bagatumĩka kaanyene gaka, na kethĩra bathithagie bakĩgarũkanaga. Mwejani motaaro nabuĩrĩte kũthingatĩĩra mũtaratara jũrĩa jũtaarĩĩrĩtue gĩcuncĩne kĩa 18. Kethĩra kĩraci kĩngĩ gĩkathithua ĩgiita rĩa mũcemanio, aritwa babuĩrĩte kũrombwa beete kĩracine kĩu, nyuma ya kaanya ka Mũthithũ jwa Gĩkĩrundu kĩrĩ gĩcuncĩ kĩa Mantũ ja Bata Kuuma Rũtetone rwa Mũrungu. Babuĩrĩte gũcookanĩĩra na bangĩ kĩũthũranone nyuma ya gĩcuncĩ kĩa mũthia kĩa mũritwa.

27. Vidio irĩa ithuuri igatumĩrwa ĩgiita rĩa mũcemanio jũjũ. Vidio cia mũcemanio jwa gatĩgatĩ ga kiumia ikethĩrwa irĩ kĩrĩ JW Library na muntũ no acione agĩtumagĩra thimũ kana into bingĩ bia kielekroni.

© 2023 Watch Tower Bible and Tract Society of Pennsylvania

S-38-UU 11/23