KĨŨRIA KĨA 3
Nĩatĩa Mpũũmba Kwaria na Aciari Bakwa?
NĨATĨA ŨŨGWE ŨŨMBA KŨTHITHIA?
Ũthũgaania: Nĩ Njumatano ũgoro. Geoff, wa mĩaka 17 akũthiria ngũgĩ cia nyomba, na nandĩ ga akwenda kuurũka. Akarugũrĩĩra TV, akaigera gĩtĩne kĩrĩa endete.
O rĩu, ĩthe akaumĩra mwarine atĩgwĩrĩtue.
“Geoffrey! Nĩkĩ ũgũta kagiita au ũgĩtegaga TV, rĩrĩa ũbuĩri kwĩthĩrwa ũgĩteethia mũtano-nyakwe ũmũniini kũthithia ngũgĩ ya cukuru? Ũtiigagua ũrĩa ũkwĩrwa!”
Geoff akanung’una na kajũ gakwigĩkua akauga, “baaba nawe atĩndeka.”
Ĩthe ageetaĩta akũĩ. “Ee nĩatĩa wauga gwe?”
“Gũtĩu ndauga ni,” Geoff agacookeria ĩthe aimbĩtie mũromo.
Ĩthe akathũũra mono akauga, “Ũmenye ũtĩmbarĩria ũu ũkwaria!”
Ũrĩĩngĩthĩrwa nĩgwe Geoff, nĩatĩa ũrĩngĩrigĩĩria mateta jau?
AMBA ŨTHŨGAANIE!
Kwaranĩria na aciari baaku nĩ ta gwĩtithia ngaarĩ. Ũkeethĩra njĩra ĩingi, no wĩte na njĩra ĩngĩ.
NGEREKANO:
Mwarĩ ũmwe ũgwĩtwa Leah ariuga: “Mbonaga kũũmi mono kwaranĩria na baaba. Ĩgiita rĩngĩ no mwĩre ũntũ, akaambĩra, ‘Ũcookera ntĩraigua bwega.’”
LEAH ARĨ NA MANTŨ TA JATHATŨ JA KŨTHITHIA.
-
Kũgondokera ĩthe.
Leah akagondoka, “Ũntũ bũbũ nĩ bwa gĩtũmi! Nthikĩĩra!”
-
Atige kwĩra ĩthe.
Leah agatiga kũgeria kwĩra ĩthe thĩĩna yaawe.
-
Eteere ĩgiita rĩngĩ rĩrĩega rĩa kwarĩĩria ũntũ bũu.
Leah akaaria na ĩthe barĩ bobaĩrĩ ĩgiita rĩngĩ, kana akamwandĩkĩra barũga ĩkwonania thĩĩna yaawe.
Kĩrĩ jau jathatũ nĩ bũrĩkũ ũũgwe ũrĩngĩĩra Leah athithie?
THŨGAANIA:Ĩthe akwangaratanua—na atĩramenya thĩĩna ya Leah. Kwou kethĩra Leah akathithia Ũntũ bwa mbere, ĩthe akaaga nĩmbi Leah akũgondokera. Ũntũ bũu bũtĩtũma ĩthe amũthikĩĩra na bũtĩonania Leah nakũmũtĩĩa. (Aefeso 6:2) Kwou ũntũ bũu gũtĩwe bũkaguna.
O ta ũrĩa ũtĩbuĩri kũreka njĩra ĩingi ĩtũma ũtĩgeete kũrĩa wĩtĩte, no ũcwe njĩra ĩngĩ ya kwaria na aciari baaku
Kinya kethĩra Ũntũ bwa jaĩrĩ, no bwonekane bũũthi, tĩ njĩra ya ũũme. Nĩkĩ? Tontũ kenda Leah oombana na mathĩĩna jaawe, nabuĩri kwaria na ĩthe—na kenda ĩthe amũteethia, nakũbatara kũmenye kĩrĩa gĩkũmũcumbũra. Gũkira gũtĩu kũgateethia.
Ĩndĩ kĩrĩ Ũntũ bwa jathatũ, atĩkũreka kĩrigĩĩria kĩaa nĩju mũthia. Ĩndĩ arĩgeria kwarĩĩria ũntũ bũu ĩgiita rĩngĩ. Na akathuura kwandĩkĩra ĩthe barũga no aigue anogoka o rĩo.
Kwandĩka barũga kinya kwomba kũmũteethia kũbangania bwega ũrĩa akwenda kuuga. Ĩthe athooma barũga akamenya bũrĩa Leah akũgeria kũmwĩra, na bũu no bũteethie ĩthe aciũkĩrwa bwega nĩ thĩĩna yaawe. Kwou ũntũ bwa jathatũ, nĩbũkũguna Leah na kinya ĩthe. Bakeethĩrwa bakaaranĩria bobaĩrĩ kana nĩ na barũga, ũntũ bũũ bũrĩthingata ũtaaro bwa Bibiria bũrĩa buugaga “rumagiireni mantu jaria jatumaga kugita thiiri.”—Aroma 14:19.
Nĩ mantũ jangĩ jarĩkũ Leah oomba kũthithia?
Thũgaania kethĩra kwĩ bũngĩ, na ũbwandĩke aja. Rĩu waandĩke kĩrĩa ũntũ bũu bũũmbĩkia kwiingia.
UGA MANTŨ BWEGA
Riikana, ũrĩa uugĩre na ũrĩa aciari baaku bakũthũgaania nĩu uugĩre, tĩ rĩonthe bwĩtanagĩria.
NGEREKANO:
FOR EXAMPLE:
Aciari baaku bagakũũria nĩkĩ ũkwonekana ũtĩgwĩrĩtue. Ũkabeera, “Gũtĩu.”
Nabo aciari baaku barĩthũgaania ũrĩbeera: “Ntĩbwĩtĩkĩtie, nkeera acoore baakwa, ĩndĩ tĩ bwĩ.”
Ũthũgaania ũrĩ thĩĩnene ĩnene na mũciari waaku nakwenda kũgũteethia. Ĩndĩ ũkauga: “Ũkamaka. nkoona ũrĩa nkathithia.”
-
Aciari baaku boomba kũthũgaania ũrĩbeera:
-
Ĩcookio rĩrĩega rĩrĩa ũũmba kũbaa nĩ:
