Kĩrĩ Atana na Aarĩ ba Baaba Endwa:

Wendo kĩrĩ Mũrungu na kĩrĩ antũ nĩbũtũmaga ‘twĩta kwethia antũ ba mĩgongo yonthe baa aritwa . . . tũkĩbabatithagia.’ (Mat. 28:19, 20; Mar. 12:28-31) Wendo bwa kwiritanĩria bũrĩ inya ĩnene mono. Bwomba kũringithia nkoro cia barĩa barĩ na mwerekera jũmwega jwa “mwoyo jwa kenya-na-kenya.”—Math. 13:48.

Mberene, tũrainyagĩĩria mono kũgwata biugo birĩa tũgatumĩra tũkĩaria na antũ na kũbatigĩra mauku. Nandĩ nĩtũkũbatara gũciũmia kwagĩrithia njĩra yeetũ ya kwaranĩria na antũ. Nĩtũkwenda kwonia bangĩ wendo na njĩra ya kwarĩĩria mantũ jarĩa jakũbakucĩĩria. Ũu nĩ kuuga, kũgarũkana kũringana na o muntũ ũrĩa twacemania nawe, na kũthũgaanĩria kĩndene mantũ jarĩa jakũmũcumbũra na jakũmũkucĩĩria. Gauku gaka gagatũtethia atĩa kũthithia ũu?

Gauku gaka karĩna ithoomo 12 birĩa bigũtũritana nkuma irĩa tũkũbatara gũkũria nĩkenda twonia antũ wendo na tũbaethia aritwa. O kĩthoomo kiumanĩtie na rũgono rwa Bibiria rũkĩarĩĩragia nkuma nna ĩrĩa yoonanĩrue nĩ Jesũ, kana ũmwe wa atũmĩĩria ba karine ya mbere ũtungatĩrine. Mworoto nĩ gũtũtethia tũtĩgeeke biugo mathũgaanione akĩ, ĩndĩ tũcwee njĩra cia kwonia antũ wendo. Kinya kethĩra nkuma iu nikũbatarĩka ũtungatĩrine, tũkaarĩria ũrĩa imwe cia cio ikũbatarĩka nkũrũki rĩrĩa tũkwambĩrĩria rwaria, tũkĩthithia ndiũnga cia gũcookera, kana rĩrĩa tũgũtongeeria aritwa ba Bibiria.

Rĩrĩa ũgũcũnkũũna o kĩthoomo, thũgaanĩria na ũrito ũrĩa ũũmba kwonania nkuma ĩu rĩrĩa ũkwaranĩria na antũ ba gĩcigo kĩenu. Ciũmie kwongeera wendo bwaku kwerekera Jehova na antũ. Nkũrũki ya kwĩthĩrwa na ũtea bũnna, wendo bũu bũgagũtethia gũkinyĩra mworoto jwaku jwa kwethia antũ aritwa.

Nĩtũgwĩragĩrua mono kaanya karĩa twĩthagĩrwa nako ga kũritanĩria ngũgĩ amwe nabuĩ. (Zef. 3:9) Nĩtũkũromba Jehova abũtharime mono o bwĩtĩte na mbere kwenda antũ na kũbaethia aritwa!