KĨTHOOMO KĨA 13
Ũrĩa Ndini cia Ũrongo Icambithagia Mũrungu
Kethĩra Mũrungu nĩ wendo-rĩ, nĩkĩ ndini inyingĩ irĩa ciugaga nĩ ciawe ithithĩtie mantũ jamaingĩ jamathũũku? Na njĩra ĩnkuĩ, ndini iji nĩ cia ũrongo; neka icambithagia Mũrungu. Nĩ na njĩra irĩkũ imũcambithagia? Nĩatĩa aigagua bwegie ũntũ bũu? Na nĩ ĩtagaaria rĩrĩkũ akaijũkĩria?
1. Nĩatĩa moritani ja ndini cia ũrongo jacambithagia Mũrungu?
Ndini cia ũrongo nĩciatigĩre “nteto iria cia mma cia Murungu, baraikuurania na nteto cia urongo.” (Aroma 1:25) Ngerekano, ndini inyingĩ itĩritanĩte athingati bacio riĩtwa rĩa Mũrungu. Bibiria, ĩritanĩte atĩ riĩtwa rĩa Mũrungu nĩrĩbuĩrĩte gũtumĩrwa. (Aroma 10:13, 14) Atongeeria bamwe ba ndini baugaga ũntũ bũthũũku rĩrĩa bwaumĩra, nĩ wendi bwa Mũrungu. Ĩndĩ bũu nĩ ũrongo. Gũtĩrĩo Mũrungu ethĩrwa arĩ kaumo ka mothũũku. (Thooma Jakubu 1:13.) Kĩeba nĩ atĩ, morongo ja ndini nĩjatũmĩte antũ bakeerũkĩra Mũrungu.
2. Nĩatĩa mathithio ja ndini cia ũrongo jacambithagia Mũrungu?
Ndini cia ũrongo itĩthithagĩria antũ ota ũrĩa Jehova abathithagĩria. Bibiria yugaga ũjũ bwegie ndini cia ũrongo, atĩ ‘meeyia jaao nijakinyite Matune.’ (Kugwurirwa 18:5) Mĩaka ĩmingĩ, ndini nitonyete ciacene, ikagwata mbaru ndwa, na ikooragithia kana igatũma antũ babaingĩ bakua. Atongeeria bamwe ba ndini bakaraga ũtũũro bwa ĩguru mono, tontũ bũu bakainyĩĩria athingati baao bakĩbetagia mbeca. Mathithio jau jarikithagia atĩ kinya batijĩ Mũrungu na batĩbuĩrĩte kũmũrũngamĩĩra.—Thooma 1 Johana 4:8.
3. Nĩatĩa Mũrungu aigagua bwegie ndini cia ũrongo?
Kethĩra nĩũthũragua nĩ mantũ jarĩa jathithagua nĩ ndini cia ũrongo, ũrĩthũgaania Jehova nĩatĩa aigagua? Nendete antũ, ĩndĩ nathũraga atongeeria ba ndini barĩa bamũcambagia na kwinyĩĩria athingati baao. Neranĩte atĩ ndini cia ũrongo ikathirua buru na ‘itikarocoka kwonewa kairi kinya ri.’ (Kugwurirwa 18:21) Ĩgiita rĩtĩ kũraaja, Mũrungu akathiria ndini cionthe cia ũrongo.— Kugwurirwa 18:8.
ĨNJA NKŨRŨKI
Cũnkũũna nkũrũki ũrĩa Mũrungu aigagua bwegie ndini cia ũrongo. Iritane jamaingĩ jegie ũrĩa ndini ithithĩtie, na kinya wiritane nĩkĩ ũtĩbuĩrĩte gwĩtĩkĩĩria jau jakũrigĩĩria kũmenya Jehova.
4. Mũrungu atĩĩtĩkagĩĩria ndini cionthe
Antũ babaingĩ betĩkĩtie atĩ ndini nĩ ta njĩra mwanyamwanya, irĩa cionthe ibatongagĩĩria kĩrĩ Mũrungu. Ĩndĩ-rĩ, bũu nĩ mma? Thooma Mathayo 7:13, 14, rĩu bwarĩĩrie kĩũria gĩkĩ kĩthingatĩte:
-
Nĩatĩa Bibiria ĩtaaragĩĩria njĩra ĩrĩa ĩĩtaga mwoyone?
Tega VIDIO, rĩu bwarĩĩrie kĩũria kĩrĩa kĩthingatĩte.
-
Bibiria-rĩ, kamma nĩritanaga atĩ kũrĩ na ndini inyiingĩ irĩa igwĩragia Mũrungu?
5. Ndini cia ũrongo itĩonanagia wendo bwa Murungu
Ndini nicambĩtie Mũrungu na njĩra inyingĩ. Njĩra ĩmwe ĩrĩa nthũũku buru, nĩ ũrĩa ciĩthĩrĩtwe igitonyithania na ndwa. Kenda wona ngerekano ĩmwe, tega VIDIO. Rĩu bwarĩĩrie biũria bibi bithingatĩte.
-
Nĩ mantũ jarĩkũ ndini inyingĩ ciathithĩrie ĩgiita rĩa Ndwa ya II ya Kĩmanthĩgũrũ?
-
Nĩatĩa ũkwigua bwegie jarĩa ndini ciathithĩrie?
Thooma Johana 13:34, 35 na 17:16. Rĩu bwarĩĩrie biũria bibi:
-
Ũrĩthũgaania nĩatĩa Jehova aigagua rĩrĩa ndini ciaitonyia ndwene?
-
Ndini cia ũrongo nĩcio ĩtũmĩte mantũ jamaingĩ jamaĩ jathithĩka. Nĩ na njĩra irĩkũ wonete ndini ikĩremwa kwonania wendo bwa Mũrungu?
Ndini cia ũrongo itĩonanĩtie wendo bwa Mũrungu
6. Mũrungu nakwenda gũtethia antũ bauma kĩrĩ ndini cia ũrongo
Thooma Kugwurirwa 18:4, a rĩu bwarĩĩrie kĩuria gĩkĩ:
-
Nĩatĩa ũkwigua tontũ bwa kũmenya atĩ Mũrungu nakwenda gũtethia antũ barĩa bethĩrĩtwe bagĩtongeerua bũũthũku nĩ ndini cia ũrongo?
7. Ĩta na mbere kwiritana bwegie Mũrungu wa mma
Rĩ, ndini cia ũrongo nibuĩrĩte gũtũma wĩthĩrwa na mwonere jũtĩbui kwerekera Mũrungu? Thũgaanĩria mũtaana ũrĩa ũreganĩte na ũtongeeria bwa ĩthe bwa ũũme. Mũtaana ũjũ akaumagara nja akethĩrwa na ũtũũro bũthũũku. Ĩthe atĩgwĩtĩkanĩĩria na mathithio ja mũtaanowe. Nĩkĩ bũtĩngĩthĩrwa bũrĩ ũntũ bwa ĩota, kwerekeria ĩthe kĩara tontũ bwa mũtũũrĩre jũrĩa mwana waawe ndemi agũtũũra?
-
Gwe-rĩ, nũkwona teka bũrĩngĩthĩrwa bũrĩ ũntũ bwa ĩota kwerekeria Jehova kĩara, na gũtiga kwiritana bũmwegie tontũ bwa mathithio ja ndini cia ũrongo?
ANTŨ BAMWE BAUGAGA: “Ntĩendete mantũ ja Mũrungu tontũ ndini nitũmĩte gũkethĩrwa na mathĩĩna jamaingĩ.”
-
Ũgwe nwigagua ũu?
-
Nĩkĩ mathithio ja ndini cia ũrongo jatĩbuĩrĩte gũtũma twĩthĩrwa na mwonere jũtĩbui kwerekera Jehova?
NA NJĨRA ĨNKUĨ
Ndini cia ũrongo nicambithĩtie Mũrungu gũkũrũkĩĩra moritani jaao ja ũrongo, na mathithio jaao jamathũũku. Mũrungu akathiria ndini cia ũrongo.
Gũcookera
-
Nĩatĩa ũkwigua bwegie jarĩa ndini cia ũrongo iritanĩte na jarĩa ithithĩtie?
-
Nĩatĩa Jehova aigagua bwegie ndini cia ũrongo?
-
Nĩatĩa Mũrungu akathithĩria ndini cia ũrongo?
CŨNKŨŨNA
Iritane mantũ ta jaĩrĩ jarĩa ndini inyingĩ ithithagia jakathũũria Mũrungu.
“Rĩ, Ndini cionthe no Ũmwe? Cionthe Nitongagĩĩria Antũ kĩrĩ Mũrungu?” (Thooma intanetine)
Nĩkĩ tontũ Jehova endaga tũmũthathayia amwe na bangĩ?
“Rĩ, No Mwanka Wĩthĩrwe Ũgwatanĩrĩte na Gĩkundi Kĩna kĩa Ndini?” (Thooma intanetine)
Mũtongeeria ũmwe wa kĩndini naacumbũragwa nĩ ndini yaawe. Ĩndĩ bũu bũtamũrigĩĩrie kwiritana ũmma bwegie Mũrungu.
“Nĩkĩ Mũtongeeria wa Kĩndini Aatigĩre Kanisa Yaawe” (Amkeni!, Februarĩ 2015)
Mĩaka ĩmingĩ ndini niritanĩte ũrongo bũrĩa bũtũmaga Mũrungu oneka teka atĩtũmakagĩra, na atĩ kĩao. Iritane ũmma bwegie morongo jau jathatũ.
“Morongo Jarĩa Jatũmaga Antũ Batĩkende Mũrungu” (Mnara wa Mlinzi, Novemba 1, 2013)
a Kenda ũmenya nĩkĩ iuku rĩa Kũgwũrĩrwa rĩtaragĩĩria ndini cia ũrongo ta mũka ũrĩa wĩtagwa Babiloni mũciĩ jũrĩa mũnene, tega Nteto cia mũthia 1.
