Ũrakuĩrwa nĩ mwendwa waaku? Ĩgiita rĩu rĩa kĩeba no ũciũrie: ‘Nĩatĩa gũkarĩkaga rĩrĩa twakua? Kũrĩ na wĩrĩgĩĩro bwa kwona endwa beetũ kaĩrĩ?’ Kĩrĩ kĩthoomo gĩkĩ na kĩrĩa kĩthingatĩte tũkoona macookio ja Bibiria jagũtũboreeria

1. Nĩatĩa gũkarĩkaga rĩrĩa twakua?

Jesũ ang’uanĩthanĩrie gĩkuũ na toro ĩndito. Rĩrĩa muntũ amami toro ĩndito, atĩmenyaga jarĩa jagũkarĩka akuĩ nawe. Nĩatĩa gĩkuũ kĩng’uanene na toro? Muntũ arĩkia gũkua, atĩũmba kwigua ũrũrũ. Atĩũmba kwigua ĩoru, kinya kethĩra acoore na antũ ba nja nĩbaramwendete bũng’ana. Bibiria yugaga “baria bakuite-ri guti untu baiji.”—Thooma Mutumiiria 9:5.

2. Nĩatĩa tũgunĩkaga twamenya ũmma bwegie gĩkuũ?

Antũ babaingĩ nĩbakĩraga gĩkuũ—o na kinya akuũ! Ĩndĩ womba kwona kũborerua wamenya jarĩa Bibiria yugaga bwegie gĩkuũ. Jesũ augĩre: ‘Umma bukabukuura ukombone.’ (Johana 8:32) Mwanya na ũrĩa ndini inyingĩ ciugaga, Bibiria ĩtĩritanaga atĩ muntũ arĩna mwoyo jũtĩũmba gũkua jũrĩa jwĩtaga na mbere gũtũũra akua. Kwou, gũtĩ muntũ ũthangĩkaga nyuma ya gũkua. Na tontũ akuũ gũtĩ ũntũ kĩnya bũrĩkũ bamenyaga, batĩũmba gũtũthũũkia. Kwou gũtĩ na gĩtũmi gĩa kwerenca kana kũthathayia akuũ na gũtĩ na gĩtũmi gĩa kũbarombera.

Antũ bamwe baugaga nobombe kwaranĩria na akuũ. Ĩndĩ bũu bũtĩũmbĩka, o ta ũrĩa twarĩkĩa kwiritana akuũ “guti untu baiji.” Barĩa bathũgaanagia nĩbakwaranĩria na endwa baao barĩa bakuĩte kamma nobombe kwĩthĩrwa bakĩaranagĩria na irundu biithũũku birĩa biciethagia antũ barĩa bakuĩte. Kwou kũmenya ũmma bwegie gĩkuũ nĩ gũtũkaragia kuumania na irundu biithũũku. Jehova natũkanagia kũgeria kwaranĩria na akuũ tontũ naijĩ kwaranĩria na ĩrundu bibithũũku gũgatũthũũkia.—Thooma Kuriikanithia Maathana 18:10-12.

3. Iritane ũmma bwegie ũrĩa gũkarĩkaga muntũ akua

Nthĩgũrune yonthe, antũ nĩbethagĩrwa na mawĩtĩkio mwanya mwanya jegie ũrĩa gũkarĩkaga rĩrĩa twakua. Amwe na bũu, tĩ jonthe ja mawĩtĩkio jau jarĩ ja mma.

• Nĩ mawĩtĩkio jarĩkũ jegie ũrĩa gũkarĩkaga muntũ akua jarĩ ja wĩthĩre gĩcigone gĩaku?

 4. Kũmenya ũmma bwegie gĩkuũ nĩgũtũgunaga

Ũmma bwegie gĩkuũ nĩgũtwebanagia na gũkĩra akuũ. Thooma Mutumiiria 9:10, rĩu bwarĩĩrie kĩũria gĩkĩ:

• Rĩ, akuũ no batũthũũkie?

Ũmma bwa Bibiria bwegie akuũ kinya nĩbũtũkaragia kuumania na wĩtĩkio bwa ũrongo atĩ no mwanka tũberence kana kinya kũbathathayia. Thooma Isaya 8:19 na Kugwurirwa 4:11, rĩu bwarĩĩrie kĩũria gĩkĩ:

• Ũrĩthũgaania nĩatĩa Jehova aigagua bwegie muntũ ũrĩa ũthathagia kana agacwa ũtethio kĩrĩ muntũ ũkuĩte?

5. Kũmenya ũmma bwegie gĩkuũ nĩgũtũboragĩria

Antũ babaingĩ bethĩrĩtwe bakĩritanwa atĩ, rĩrĩa baakua bakathangĩkua nĩ ũntũ bwa mathithio jaao ja karaaja. Ĩndĩ nĩtũboragĩrua twamenya atĩ gũtĩ muntũ ũthangĩkagua akua—kinya muntũ ũrĩa wĩthagĩrwa athithĩtie mantũ jamathũũku mono atĩthangĩkagua. Thooma Aroma 6:7, rĩu bwarĩĩrie kĩũria gĩkĩ:

• Kethĩra, gĩkuũ nĩkĩrekagĩĩria kana gĩkathaũra muntũ kuuma kĩrĩ wĩyia o ta ũrĩa twathooma kĩrĩ Bibiria, ũrĩthũgaania muntũ kinya ũrĩkũ ũkuĩte nakũthangĩka tontũ bwa meeyia jaawe ja karaaja?

O ũrĩa tũgwĩta na mbere kũmenya Jehova nkũrũki, nou tũgũciũkĩrwa atĩ gũtĩrĩo oomba kũthangĩkia antũ barĩa bakuũte. Thooma Kuriikanithia Maathana 32:4 na 1 Johana 4:8, rĩu bwarĩĩrie biũria bibi:

• Rĩ, no kũũmbĩke Mũrungu ũrĩa ũrĩna nkuma ta ĩria igweti kĩrĩ mĩstaarĩ ĩjĩ, etĩkĩĩria antũ barĩa bakuĩte baĩthua na mwanki?

• Gwe-rĩ, nũkwona teka ũmma bwegie gĩkuũ bũrĩ bwa kũboreria? Nĩkĩ?

 NA NJĨRA ĨNKUĨ

Rĩrĩa muntũ akua, ũtũũro bwawe kabũthiraga. Akuũ batĩthangĩkaga na kinya batĩũmba kũthũũkia barĩa barĩ mwoyo.

Gũcookera

• Nĩatĩa gũkarĩkaga rĩrĩa twakua?

• Nĩatĩa tũgunĩkaga kũmenya ũmma bwegie gĩkuũ?

• Nĩatĩa kũmenya ũmma bwegie gĩkuũ gũtũboragĩria?