KĨTHOOMO KĨA 35

Ũrĩa Tũũmba Gũtua Matua Jameega

CHETHA

Twinthe nĩtũbataraga gũtua matua. Jamaingĩ ja matua jarĩa tũthithagia, joomba kwĩthĩrwa na maumĩĩra jameega kana jamathũũku kĩrĩ tuĩ na kĩrĩ ũcoore bwetũ na Jehova. Ngerekano, no mwanka tũthuure nĩkũ tũgatũũra, ũrĩa tũkaingia mobatũ jeetũ, kana kethĩra tũkagũrwa kana tũgũrane. Rĩrĩa twatua matua jameega, twomba kwĩthĩrwa na ũtũũro bũrĩna kũgwĩrua na tũkagwĩria Jehova.

1. Nĩatĩa ũũmba gũtumĩra Bibiria ĩgũtethia gũtua matua jameega?

Mbere ya ũtua ĩtua, romba Jehova agũtethie na ũcũnkũũne Bibiria nĩkenda wona ũrĩa yugaga bwegie ũntũ bũu. (Thooma Njuno 2:3-6.) Kĩrĩ mantũ jamwe, Jehova natwejaga waatho bwa ĩmwe kwa ĩmwe bwa kũthingatĩĩra. Ũntũne ta bũu, ĩtua rĩrĩa rĩega nkũrũki ũũmba kũthithia nĩ kwathĩkĩra jarĩa augĩte.

A gũkeja kwĩthĩrwa gũtĩ na waatho bwa ĩmwe kwa ĩmwe kuuma kĩrĩ Bibiria bwa gũkwĩra ũrĩa ũbuĩrĩte kũthithia? Kinya rĩrĩa gũtĩna waatho ta bũu, Jehova agagũtongeeria “o na njira iria ubwirite gwitagira.” (Isaya 48:17) Nĩatĩa akathithia ũu? Natwete moritani ja Bibiria jarĩa joomba gũgũtongeeria. Moritani ja Bibiria nĩ mma cia mũsingi irĩa igwũraga mathũgaanio ja Mũrungu na ũrĩa onaga mantũ. Kaingĩ nĩtwiritanaga ũrĩa Mũrungu aigagua bwegie ũntũ bũnna, rĩrĩa twathooma jarĩa jandĩki Bibiriene. Rĩrĩa twamenya maoni ya Jehova jegie ũntũ bunna, twomba gũtua matua jarĩa jakamũgwĩria.

2. Nĩ mantũ jarĩkũ ũbũĩrĩte kũthũgaanĩĩria mbere ya ũtua ĩtua?

Bibiria yugaga: “muntu umuciuku araithagiiria mono njira iria eetaga nacio.” (Njuno 14:15) Ũu nĩkuuga mbere ya tũtua ĩtua, nĩtũbuĩrĩte kũjũkia kaanya kũthũgaanĩria jarĩa tũkathuura. Rĩrĩa ũkũthũgaanĩria o ũntũ bũnthe, ciũrie: ‘Nĩ ũritani bũrĩkũ bwa Bibiria mpũmba gũtumĩra? Kĩrĩ jaja ndathuura-rĩ, nĩ bũrĩkũ bũgampa thĩĩrĩ ya mathũgaanio? Ĩtua rĩakwa rĩkethĩrwa na maumĩĩra jarĩkũ kĩrĩ bangĩ? Na ũntũ bwa gĩtũmi nkũrũki-rĩ, bũgatũma Jehova agwĩrua?’—Kuriikanithia Maathana 32:29.

Jehova nĩwe ũrĩna waatho bwa gũtwĩra jarĩa meega na jarĩa maaĩ. Rĩrĩa twamenya bwega mawaatho jaawe na moritani ja Bibiria na twathuura kũjathingata, nĩtwĩthagĩrwa tũkĩmenyerithagia thamiri yeetũ mantũ jameega. Thamiri nĩ ũũmbi bwetũ bwa nkorone bwa kwathũrana weega na ũũĩ. (Aroma 2:14, 15) Thamiri ĩmenyerithĩtue bwega ĩgatũtetheeria gũtua matua jameega.

ĨNJA NKŨRŨKI

Iritane ũrĩa tũtethagua nĩ moritani ja Bibiria na thamiri yeetũ gũtua matua.

3. Ĩtĩkĩĩria Bibiria ĩgũtongeerie

Nĩatĩa moritani ja Bibiria joomba gũtũtongeeria rĩrĩa tũgũtua matua? Tega VIDIO, rĩu bwarĩĩrie biũria bibi bithingatĩte.

VIDIO: Tongeerua Nĩ Moritani Ja Bibiria (5:54)

Ũciathi bwa kũthuura nĩmbi?
Nĩkĩ Jehova aatwere ũciathi bwa kũthuura?
Nĩmbi atwete bia gũtũtethia gũtumĩra ũciathi bwetũ bwa kũthuura na njĩra ĩnjega?

Kenda wona ngerekano ĩmwe ya ũritani bwa Bibiria, thooma Aefeso 5:15, 16. Rĩu bwarĩĩrie ũrĩa ũrĩngĩtumĩra bwega ‘igiita riaku riria riagirite’ kĩrĩ . . .

kũmenyeria kũthooma Bibiria.
kwaa mũkũrũ kana mwekũrũ ũmwega ngũranone yaaku, kwaa mũciari ũmwega, mũtaana kana mwarĩ ũmwega.
gwĩta mĩcemanione ya kĩũthũrano.

4. Menyerithia thamiri yaaku gũtua matua jameega

Rĩrĩa Maandĩko jakwonania waatho bwa ĩmwe kwa ĩmwe bwegie ũntũ bũnna, bũkethĩrwa bũrĩ bũbũũthũ kũthuura na njĩra ĩnjega. Ĩndĩ a gũkeja kwĩthĩrwa gũtĩ na waatho ta bũu bwa ĩmwe kwa ĩmwe? Tega VIDIO, rĩu bwarĩĩrie kĩũria gĩkĩ kĩthingatĩte.

VIDIO: “Ĩthĩrwa na Thamiri Ĩnjega” (5:13)

Kĩrĩ vidio, nĩ matagaaria jarĩkũ mwarĩ-wa-baaba aajũkĩrie nĩkenda amenyerithia thamiri yaawe gũtua ĩtua rĩrĩa rĩrĩngĩgwĩria Jehova?

Nĩkĩ tũtĩbuĩrĩte kũromba bangĩ batũtuĩre matua jeetũ? Thooma Ahibirania 5:14, rĩu bwarĩĩrie biũria bibi:

Kinya kethĩra no twone bũrĩ bũbũũthũ kũromba bangĩ batũtuĩre matua, tũbuĩrĩte kwĩthĩrwa na ũũmbi bwa kwathũrana mantũ jarĩkũ twingwa?
Nĩmbi biũmba gũgũtethia kũmenyerithia thamiri yaaku na gũgũtethia gũtua matua jameega?

O ta mapu, thamiri yeetũ nĩtũtongagĩĩria kũthithia matua ũtũũrone

5. Tĩĩa thamiri cia bangĩ

O muntũ akathithia ĩtua rĩrĩ mwanya na bangĩ. Nĩatĩa tũũmba kwonania nĩtũgũtĩĩa thamiri cia bangĩ? Thũgaanĩria mantũ jaja jaĩrĩ:

Ũntũ bwa 1: Mwarĩ-wa-baaba wendete kwigemia, athamĩra kĩũthũrano kĩrĩa arĩ-ba-baaba babaingĩ bacumbũkaga rĩrĩa bona bangĩ baigemetie na njĩra ta ĩu.

Thooma Aroma 15:1 na 1 Akorintho 10:23, 24, rĩu bwarĩĩrie biũria bibi:

Kũringana na mĩstaarĩ ĩu, mwarĩ-wa-baaba ũu no athuure kũthithia atĩa? Nĩatĩa ũkathithia ũkeja kwĩthĩrwa amwe na muntũ ũrĩa thamiri yaawe ĩkũmũkania kũthithia ũntũ bũrĩa thamiri yaaku ĩgũgwĩtĩkĩria kũthithia?

Ũntũ bwa 2: Mũtaana-wa-baaba akamenya atĩ Bibiria ĩtĩmenagĩĩria ũtumĩri bũũkai bwa ncobi, ĩndĩ akathuura kũrega kũmĩtumĩra. Akagwatwa ũgeni kĩathone na akona ataana-ba-baaba bangĩ bagĩtumagĩra ncobi.

Thooma Mutumiiria 7:16 na Aroma 14:1, 10, rĩu bwarĩĩrie biũria bibi:

Kũringana na mĩstaarĩ ĩu, nĩatĩa mũtaana-wa-baaba ũu omba kũthuura kũthithia? Nĩatĩa ũũmba kũthithia ũkeja kwona muntũ ũngĩ akĩthithagia ũntũ bũrĩa thamiri yaaku ĩkũrigagĩĩria kũthithia?

Nĩ matagaaria jarĩkũ joomba gũgũtetheria kũthithia matua jameega?

1. Romba Jehova agũtetheerie kũmenya jarĩa ũkathithia. —Jakubu 1:5.

2. Thithia ũcunkũũni kĩrĩ Bibiria na mauku jegie Bibiria kenda wona moritani jagũtumĩra. Kinya no waranĩrie na Akristũ bagimaru gĩkĩrundu.

3. Thũgaanĩĩria maumĩĩra jarĩa ĩtua rĩaku rĩkethĩrwa najo kĩrĩ thamiri yaaku na cia barĩa bangĩ.

ANTŨ BAMWE BAUGAGA: “Ũrĩna ũciathi bwa kũthithia o ũrĩa ũkenda, ĩtĩkũmakania ũrĩa antũ bangĩ bakwona mantũ jau.”

Nĩkĩ tũbuĩrĩte kũthũgaanĩrĩa ũrĩa Mũrungu akwona mantũ, na kinya ũrĩa antũ bangĩ bakũjoona?

NA NJĨRA ĨNKUĨ

Tũtujaga matua jameega rĩrĩa twamenya ũrĩa Jehova akwigua bwegie ũntũ bũnna, na rĩrĩa twathũgaanĩria kethĩra mathithio jeetũ jagatethia bangĩ kana jakabathũũkia.

Gũcookera

Nĩatĩa ũũmba gũtua matua jarĩa jakagwĩria Jehova?
Nĩatĩa ũũmba kũmenyerithia thamiri yaaku?
Nĩatĩa ũũmba kwonania nũgũtĩĩa thamiri cia bangĩ?

Kĩthoomo gĩkĩ kĩathira tarĩki

Mworoto

Thũgaanĩria bwegie ĩtua rĩrĩa ũkabatara gũtua ĩgiita rĩtĩ kũraaja. Tumĩra matagaria jathatũ jarĩa jarĩ kĩrĩ kathandũkũ, “ Nĩ Matagaria Jarĩkũ Joomba Gũgũtetheeria Kũthithia Matua Jameega?”

Ũntũ bũngĩ:

Mworoto jwaku jũngĩ