KĨTHOOMO KĨA 37
Jarĩa Bibiria Yugaga Jegie Ngũgĩ na Mbeca
Kwĩrĩo waigua uunĩki nkoro nĩũntũ bwa kwangaĩkĩra ngũgĩ na mbeca? No bwĩthĩrwe bũtĩ bũbũũthũ kwingia mobatũ jeetũ na kwaa Jehova ũthathayia bũrĩa akũbatara. Bibiria nĩtwejaga motaaro jameega jarĩa joomba gũtũtethia.
1. Nĩatĩa Bibiria yugaga bwegie ngũgĩ?
Mũrungu nendaga tũgwĩrĩrua ngũgĩ cietũ. Bibiria yugaga “guti untu bungi muntu athithikia nkuruki . . . ya kwigwiragia na nkoro ni untu bwa ngugi ciawe.” (Mutumiiria 2:24) Jehova naritaga ngũgĩ na wĩru. Rĩrĩa twaigerekania nawe na njĩra ya kũrita ngũgĩ na wĩru, nĩtũmũgwĩragia na tũkaigua tũrĩ na kũngˈanĩrwa.
Ngũgĩ nĩ ya gĩtũmi. Ĩndĩ gũtĩrĩo tũbuĩrĩte kũrekeeria yĩthĩrwa ĩrĩ ya gĩtũmi nkũrũki ya ũthathayia bwetũ kĩrĩ Jehova. (Johana 6:27) Atwĩrĩte atĩ twamwĩĩka mbere, agatwingĩria mobatũ jeetũ.
2. Nĩatĩa Bibiria yugaga bwegie mbeca?
Kinya kethĩra Bibiria nĩ yugaga atĩ ‘mbeca niciiganagira’ kana nĩ ũkaria, nĩcookaga ĩkarita mũkaana atĩ mbeca itĩũmba gũtũretera kũgwĩrua. (Mutumiiria 7:12) Kwou, nĩtwĩkagĩra inya tũtĩkende mbeca ĩndĩ ‘tungˈanwe ni into biria turi nabio.’ (Thooma Ahibirania 13:5.) Rĩrĩa twangˈanĩrwa nĩ into birĩa tũrĩ nabio, nĩtwebanaga na mogwati jarĩa jaumanagia na kwenda into bibingĩ rĩonthe. Kinya nĩtũciebanagia na marandũ jatĩna gĩtũmi. (Njuno 22:7) Na nĩtũciebanagia na ũgwati bwa gũcetha karata na kũthingatĩĩra mĩtego ya wayia ya ũtonga bwa mpwĩ.
3. Nĩatĩa tũũmba kwonania ũtugani rĩrĩa tũgũtumĩra mbeca?
Jehova nĩ Mũrungu mũtugani, na nĩtwigerekanagia nawe rĩrĩa twonania ũtugani gũkũrũkĩĩra “kwejana into” bietũ. (1 Timotheo 6:18) Twomba kwonania ũtugani rĩrĩa tũgũtumĩra mbeca cietũ kũgwata mbaru kĩũthũrano na gũtetheeria barĩa barĩ na ũbatu, mono mono barĩa tũthathaayia nabo. Jehova nagwĩragĩrua nkũrũki mwerekera jwetũ jwa kwejana, na tĩ mũngˈana jwa birĩa tũkwejana. Rĩrĩa twaejana kuuma nkorone, Jehova akagwĩrua ona kinya batuĩ.—Thooma Mathithio 20:35.
ĨNJA NKŨRŨKI
Iritane bwegie moguni jarĩa twonaga tontũ bwa kwĩthĩrwa na mwonere jũmwega jwegie ngũgĩ na kwĩthĩrwa na kũngˈanĩrwa.
4. Tĩĩa Jehova gũkũrũkĩĩra ngũgĩ irĩa ũkũrita
Ũcoore bwetũ amwe na Jehova nĩbũbuĩrĩte gũtũtethia kwĩthĩrwa na mwonere jũmwega jwegie ngũgĩ. Tega VIDIO, rĩu bwarĩĩrie biũria bibi bithingatĩte.
-
Kĩrĩ vidio, nĩmbi biakũgwĩria bwegie mwerekera jwa Jason na mĩĩtĩre yaawe ngũgĩne?
-
Nĩatĩa aathithĩrie nĩkenda ethĩrwa na mwonere jũmwega jwegie ngũgĩ?
Thooma Akolosai 3:23, 24, rĩu bwarĩĩrie kĩũria gĩkĩ:
-
Nĩkĩ bũrĩ ũntũ bwa gĩtũmi kwĩthĩrwa na mwonere jũmwega jwegie ngũgĩ?
Ngũgĩ nĩ ya gĩtũmi. Ĩndĩ tũtĩbuĩrĩte gwĩtĩkĩĩria ngũgĩ ĩjũkia kaanya ka gĩtũmi nkũrũki ya ũthathayia bwetũ kĩrĩ Jehova
5. Nĩtũgunĩkaga tontũ bwa kwĩthĩrwa na kũngˈanĩrwa
Babaingĩ nĩbageragia kũgĩa na mbeca inyingĩ ũrĩa kũmbĩkĩka. Ĩndĩ Bibiria nĩtwĩkagĩra inya kwĩthĩrwa na mwonere jũrĩ mwanya. Thooma 1 Timotheo 6:6-8, rĩu bwarĩĩrie kĩũria gĩkĩ:
-
Nĩatĩa Bibiria ĩtwĩkagĩra inya kũthithia?
Kinya kethĩra tũtĩ na into bibingĩ, twomba kwĩthĩrwa na kũgwĩrua. Tega VIDIO, rĩu bwarĩĩrie kĩũria gĩkĩ kĩthingatĩte.
-
Nĩmbi bitũmĩte nja iu ciĩthĩrwa na kũgwĩrua, amwe na kwĩthĩrwa na mbeca inkai?
A tũkeja kwĩthĩrwa na into bibingĩ ĩndĩ tũkethĩrwa nĩtũkwirirĩria kwona bibingĩ nkũrũki? Jesũ naaritĩre ngerekano ya gũtwonia ũgwati bwa kũthithia ũu. Thooma Luka 12:15-21, rĩu bwarĩĩrie kĩũria gĩkĩ:
-
Nĩmbi wairitana kuumania na ngerekano ya Jesũ?—Tega mũstaarĩ jwa 15.
Thooma na ũringithanie Njuno 10:22 na 1 Timotheo 6:10. Rĩu bwarĩĩrie biũria bibi:
-
Ũrĩthũgaania nĩmbi bia gĩtũmi nkũrũki? Nĩkwĩthĩrwa na ũcoore amwe na Jehova kana nĩkwĩthĩrwa na mbeca inyingĩ? Nĩkĩ ũgũcookia ũu?
-
Nĩ mathĩĩna jarĩkũ jaumanagia na kũthingatĩĩra mbeca?
6. Jehova agatwingĩria mobatũ jeetũ
Mathĩĩna jegie ngũgĩ na mbeca joomba kũgeria wĩtĩkio bwetũ kĩrĩ Jehova. Tega VIDIO kenda wona ũrĩa tũũmba kũthithia rĩrĩa twakũrũkĩĩra kĩgerio kĩu, rĩu bwarĩĩrie biũria bibi bithingatĩte.
-
Kĩrĩ vidio, nĩ mathĩĩna jarĩkũ mũtaana-wa-baaba aakũrũkĩrĩre?
-
Nĩatĩa aathithĩrie nĩkenda arwa na thĩĩna ĩu na njĩra ĩnjega?
Thooma Mathayo 6:25-34, rĩu bwarĩĩrie kĩũria gĩkĩ:
-
Nĩatĩa Jehova eranĩte akathithĩria barĩa beekaga mantũ jaawe mbere?
ANTŨ BAMWE BAUGAGA: “No mwanka ndite ngũgĩ nĩkenda menyeera nja yaakwa. Ntĩũmba gwĩta mĩcemanione ya kĩũthũrano o kiumia.”
-
Nĩ ĩandĩko rĩrĩkũ rĩgũkũrikithĩria atĩ gwĩka ũthathayia bwa Jehova mbere rĩonthe nĩrĩo ĩtua rĩrĩa rĩega nkũrũki?
NA NJĨRA ĨNKUĨ
Nĩtũkũbatara ngũgĩ na mbeca, ĩndĩ gũtĩrio tũbwĩrĩte kũrekeeria bitwangaratania tũtĩgatumĩkĩre Jehova.
Gũcookera
-
Nĩmbi biũmba gũgũtethia kwĩthĩrwa na mwonere jũmwega jwegie ngũgĩ?
-
Nĩatĩa kwĩthĩrwa na kũngˈanĩrwa kũũmba gũkũguna?
-
Nĩatĩa ũũmba kwonania atĩ nũgwĩtĩkia wĩrane bwa Jehova bwa kũmenyeera antũ baawe?
CŨNKŨŨNA
Cũnkũũna kethĩra Bibiria nĩyonanagia mbeca nĩ inthũũku
“Rĩ, Mbeca Nĩcio Kaumo ka Mantũ Jonthe Jamathũũku?” (Thooma intanetine)
Iritane nĩ njĩra ĩrĩkũ ya kwejana ĩgwĩragia Mũrungu.
Rĩ, gũcetha karata no gũtũthũũkie?
“Ũrĩa Bibiria Yugaga Bwegie Gũcetha Karata” (Amkeni!, Machi 2015)
Ona nĩmbi biatetherie muntũ mũrũme ũrĩa waarĩ mũcethi wa karata na mwamba kũgarũra ũtũũro bwawe.
“Nĩndendete Mĩcetho ya Kũũgĩa na Mbarathi” (Mnara wa Mlinzi, Novemba 1, 2011)
