KĨTHOOMO KĨA 42
Nĩatĩa Bibiria Yugaga Bwegie Ngũrano na Kwĩthĩrwa Ũtĩgũri Kana Ũgũrana?
Gũntũ kũmwe, antũ betĩkĩtie muntũ atĩũmba kwĩthĩrwa na kũgwĩrua tinga agũrwe kana agũrane. Amwe na bũu, tĩ bonthe barĩa barĩ ngũranone bethagĩrwa na kũgwĩrua, na tĩ bonthe barĩa batĩ ngũranone batĩthagĩrwa bagwĩrĩtue. Ũmma nĩ atĩ Bibiria yugaga ngũrano na kwĩthĩrwa ũtĩ ngũranone, bionthe nĩ biewa.
1. Kũrĩ na baita irĩkũ imwe cia kwĩthĩrwa ũtĩ ngũranone?
Bibiria yugaga atĩ muntũ ũrĩa ũkagũrana nĩ “bwega athithagia,” na muntũ ũrĩa ũtagũrana kana agũrwa nĩ “bwega nkuruki athithagia.” (Thooma 1 Akorintho 7:32, 33, 38.) Nĩ na njĩra irĩkũ muntũ akethĩrwa atĩgũri kana agũrana “athithagia bwega nkuruki”? Akristũ barĩa batĩ ngũranone, batĩthũgaanagĩria mobatũ jarĩa barĩa bagũrene bathũgaanagĩria. Tontũ bũu, nĩbethagĩrwa na kaanya gakaingĩ nkũrũki. Ngerekano, bamwe baao nĩ bombĩte kwongeera ũtungatĩri bwao na njĩra ya kũthamĩra nthĩ ingĩ, nĩkenda batũmĩĩria nkuma ĩnjega. Ũntũ bwa gĩtũmi nkũrũki nĩ atĩ bomba gũtumĩra ĩgiita rĩringĩ nkũrũki kũthengeera Jehova.
2. Kũrĩ na baita irĩkũ imwe cia kũgũrana kĩwaatho?
Barĩa barĩ ngũranone, kinyabo nĩbagunĩkaga na njĩra ya mwanya. Bibiria yugaga “ni kaba antu bairi nkuruki ya umwe.” (Mutumiiria 4:9) Na bũũ nĩ ũntũ bwa mma, mono mono kĩrĩ Akristũ barĩa batumagĩra moritani ja Bibiria ngũranone yaao. Antũ barĩa bagũrene kĩwaatho nĩbekaga mũciĩtio jwa kwendana, gũtĩĩana, na kũmenyanĩĩra rĩonthe. Ta maumĩĩra, nĩbaigagua barĩ na ũkaria nkũrũki ya barĩa bakaraga amwe batĩgũrene kĩwaatho. Kinya aana baao nĩbaigagua barĩ na ũkaria nkũrũki.
3. Nĩatĩa Jehova onaga ngũrano?
Rĩrĩa Jehova ambĩrĩrie ngũrano ya mbere, augĩre: “Ni untu buu muntu agatigana na ithe na ng’ina, agwatanage na mukowe.” (Kiambiriria 2:24) Jehova endaga mũkũrũ na mwekũrũ barĩa bagũrene bendane na bethĩrwe amwe ũtũũrone bwao bunthe. Netĩkagĩĩria antũ batigana buru akĩ rĩrĩa ũmwe athũngĩĩra. Ũntũne ta bũu, Jehova naejaga ũrĩa ũatĩrĩtue kaanya ga kũthuura kethĩra batigane buru. a (Mathayo 19:9) Jehova atĩtĩkĩrĩĩtie Akristũ batonya ngũranone ya aka babaingĩ.—1 Timotheo 3:2.
ĨNJA NKŨRŨKI
Iritane ũrĩa ũũmba kwĩthĩrwa na kũgwĩrua —na ũrĩa ũũmba gũtũma Jehova agwĩrua— wĩthĩrwe ũrĩ ngũranone kana ũtĩ kĩrĩyo.
4. Tumĩra bwega kĩewa gĩa kwĩthĩrwa ũtĩ ngũranone
Jesũ noonaga muntũ kwĩthĩrwa atĩ ngũranone, nĩ kĩewa. (Mathayo 19:11, 12) Thooma Mathayo 4:23, rĩu bwarĩĩrie kĩũria gĩkĩ:
-
Nĩatĩa Jesũ aatumĩĩre kĩewa gĩa kwĩthĩrwa atĩgũrene, gũtumĩkĩra Ĩthe na gũtetheeria bangĩ?
Akristũ kĩnya bo boomba kũgwĩrĩrua gũtumĩra kaanya kaao ga kwĩthĩrwa batĩ ngũranone o ta ũrĩa Jesũ aathithĩrie. Tega VIDIO, rĩu bwarĩĩrie kĩũria gĩkĩ kĩthingatĩte.
-
Nĩ na njĩra irĩkũ injega barĩa batĩ ngũranone bomba gũtumĩra kaanya kaao?
Ũramenya?
Bibiria ĩtĩgwetete mĩaka ĩrĩa muntũ abuĩrĩte kwĩthĩrwa arĩ nayo agĩtonya ngũranone. Amwe na bũu, Bibiria nĩĩkagĩra inya antũ babeethĩ beteere mwanka ‘bakurukithie’ ĩgiita rĩa wĩĩthĩ bwao, rĩrĩa mairirĩria ja kũmenyana kĩmwĩrĩ joomba kũbaangaratania bakathithia matua jatĩbui.—1 Akorintho 7:36.
5. Thuura ũrĩa bũkagũrana nawe na njĩra ya ũũme
Kũthuura muntũ ũrĩa bũkagũrana nawe nĩ rĩmwe rĩa ĩtua rĩa gĩtũmi nkũrũki rĩrĩa ũkorothithia. Thooma Mathayo 19:4-6, 9, rĩu bwarĩĩrie kĩũria gĩkĩ:
-
Nĩkĩ Mũkristũ abuĩrĩte kũjũkia kaanya kũthũgaania bwega mbere ya gũtua ĩtua rĩa gũtonya ngũranone?
Bibiria yoomba gũgũtethia kũmenya nĩ nkuma irĩkũ ũbuĩrĩte gũtega kĩrĩ ũrĩa ũkwenda bũgũrana nawe. Nkũrũki ya mantũ jonthe, cwaa muntũ wa kũgũrana nawe ũrĩa wendete Jehova. b Thooma 1 Akorintho 7:39 na 2 Akorintho 6:14. Rĩu bwarĩĩrie biũria bibi:
-
Nĩkĩ tũbuĩrĩte kũgũrana na Mũkristũ ũrĩa twĩtĩkĩtie ũmwe nawe?
-
Ũrĩthũgaania nĩatĩa Jehova oomba kwigua tũkeja kũgũrana na muntũ ũtĩmwendete?
Ntigiri na ndwegwa ikeja kũthekwa gĩcookine kĩmwe, ikainyanĩĩria. O ũu, Mũkristũ akeja kũgũrana na muntũ ũtĩtĩkĩtie akagwatwa nĩ mathĩĩna jamaingĩ.
6. Ona ngũrano o ta ũrĩa Jehova amĩonaga
Karaaja kĩrĩ mũgongo jwa Israeli, antũ arũme bamwe nĩbatiganaga buru na ekũrũ baao nĩ ũntũ bwa tũmantũ tũniini. Thooma Malaki 2:13, 14, 16, rĩu bwarĩĩrie kĩũria gĩkĩ:
-
Nĩkĩ Jehova athũũraga rĩrĩa antũ bagũrene batigana buru tontũ bwa itũmi bingĩ bitĩ ũthũngĩĩri?
Ũthũngĩĩri na gũtigana buru nĩbiretagĩra muntũ ũrĩa ũtĩna ĩatia, ona kinya aana kũthangĩka gũkũnene
Tega VIDIO, rĩu bwarĩĩrie kĩũria gĩkĩ kĩthingatĩte.
-
Ũkeja kwĩthĩrwa ũgũrene na muntũ ũtĩendete Jehova, ũũmba kũthithia atĩa nĩkenda ngũrano yaaku ĩthĩrwa na kũgwĩrua?
7. Thingata mawaatho ja Jehova jegie ngũrano
Muntũ oomba kũbatara gũciũmia mono nĩkenda atumĩra mawaatho ja Jehova jegie ngũrano. c Ĩndĩ Jehova natharimaga barĩa bathithagia ũu. Tega VIDIO.
Thooma Ahibirania 13:4, rĩu bwarĩĩrie biũria bibi:
-
Rĩ, ũrĩthũgaania nĩ ũntũ bũmbĩka kũthingata mawaatho ja Jehova jegie ngũrano? Nĩkĩ ũkuuga ũu, na nĩkĩ ũtĩgwĩtĩkĩĩria?
Jehova arĩrĩgĩĩra Akristũ bandĩkithie ngũrano ciao na kinya bandĩkithie rĩrĩa batigana buru, tontũ kĩrĩ nthĩgũrũ inyingĩ thirikarĩ ciendaga antũ bathithia ũu. Thooma Tito 3:1, rĩu bwarĩĩrie kĩũria gĩkĩ:
-
Ũkeja kwĩthĩrwa ũgũri kana ũgũrene-rĩ, ũrĩna mma ngũrano yaaku nijĩkene kĩwaatho nĩ thirikarĩ?
MUNTŨ NO AŨRIE: “Nĩkĩ tũgũrane? Ka muntũ mũrume na muntũ mũka batĩũmba gũkarania amwe batĩgũrene?”
-
Ũũmba gũcookia atĩa?
NA NJĨRA ĨNKUĨ
Kwĩthĩrwa ũrĩ ngũranone kana kwĩthĩrwa ũtĩ kĩrĩyo bionthe nĩ biewa kũũma kĩrĩ Jehova. Mantũ jau jo jaĩrĩ jagatũretera kũgwĩrua na kũng’anĩrwa kethĩra tũkajatumĩra kũringana na wendi bwa Jehova.
Gũcookera
-
Nĩatĩa muntũ oomba gũtumĩra bwega ĩgiita rĩawe rĩrĩa atĩ ngũranone?
-
Nĩkĩ Bibiria ĩtwĩraga tũgũrane na Mũkristũ ũrĩa twĩtĩkĩtie ũmwe nawe?
-
Nĩ gĩtũmi kĩrĩkũ Bibiria yugaga nĩkĩo akĩ kĩũmba gũtũma antũ batigana buru kĩwaatho?
CŨNKŨŨNA
Kũgũrana “ndene ya Mwathani” nĩ kuuga atĩa?
“Bĩũria Kuuma Kĩrĩ Athoomi Beetũ” (Mnara wa Mlinzi, Julaĩ 1, 2004)
Tega vidio ijĩrĩ inkuĩ irĩa ciũmba gũgũtetheria gũtua matua jameega jegie, ngambanio, na ngũrano.
Iritane nĩkĩ mũtaana-wa-baaba ũmwe akuuga atĩ mantũ jarĩa Jehova amũthithĩrĩtie nĩ jagĩtũmi nkũrũki ya jarĩa aatiganĩre najo.
Nĩ mantũ jarĩkũ muntũ abuĩrĩte kũthũgaanĩria mbere ya gũtua ĩtua rĩa kwathũkana kana gũtigana buru?
“Tĩĩa ‘Barĩa Mũrungu Agwatithanĩtie’” (Mnara wa Mlinzi, Dicemba 2018)
a Tega nteto cia mũthia 4 ciegie kwathũkana rĩrĩa ũthũngĩĩri bwathithua.
b Kũringana na mawĩthĩre ja gũntũ kũmwe, aciari nĩbo bathuuragĩra aana baao muntũ wa kũgũrana nabo. Ũntũne ta bũu, aciari barĩ na wendo ũntũ bũrĩa bakathũgaanĩria bũrĩ bwa mbere nĩ, kethĩrwa muntũ ũu nendete Jehova, antũa kũthũgaanĩria mbeca kana ĩgweta rĩa muntũ ũu.
c Ũkeja kwĩthĩrwa ũgĩkaranagia na muntũ bũtĩgũrene nawe, nĩgwe ũkathuura kethĩra bũgatigana kana bũkagũrana nawe.
