Mũrungu nagwataga ũgeni antũ ba mĩgongo yonthe bamũthengeere na njĩra ya maromba. (Zaburi 65:2) Ĩndĩ, atĩthikagĩĩra kana etĩkĩĩria maromba jonthe. Ngerekano, no arigĩĩrie maromba ja muntũmũrũme ũrĩa ũthangĩkagia mwekũrũ waawe. (1 Petero 3:7) Rĩrĩa Aisraeli bamenyeerie kũthithia mantũ jamathũũku, Mũrungu naaregere kwigua maromba jao. Nĩ mma, maromba nĩ kaanya ka bata mono. Ĩndĩ, Mũrungu agetĩkĩĩria kinya maromba ja antũ amaramari kethĩra bakairira.—Thooma Isaya 1:15; 55:7.

Maromba nĩ njĩra ĩmwe ya ũthaathayia bwetũ, kwou tũbuĩrĩte kũromba akĩ, Mũũmbi wetũ Jehova. (Mathayo 4:10; 6:9) Tontũ tũrĩ eeyia, tũbuĩrĩte kũromba riĩtwene rĩa Jesũ, nĩkwĩthĩrwa naakuĩre nĩũntũ bwa meeyia jeetũ. (Johana 14:6) Jehova atĩendaga tũcookera maromba jarĩa twĩkĩrĩte mathũganione kana jaandĩki. Endaga tũmũromba kuuma nkorone cietũ.—Thooma Mathayo 6:7; Afilipi 4:6, 7.

Mũũmbi weetũ naigagua kinya maromba ja kwarua na nkoro. (1 Samweli 1:12, 13) Mũrungu atũũragia tũmũrombe magiita jonthe, ta rĩrĩa tũkĩmaama, twokĩĩra, tũkĩrĩa irio kana kinya rĩrĩa tũrĩna mathĩĩna.—Thooma Zaburi 55:22; Mathayo 15:36.

Kũthengeera Mũrungu tĩ ũntũ bũbũũthũ, tontũ tũtũraanagia na antũ batĩĩtĩkĩtie Mũrungu na bamaragia wĩrane bwawe bwa kũreeta thĩĩrĩ nthĩgũrũne. (2 Timotheo  3:1, 4; 2 Petero 3:3, 13) Kwoũ, nĩtũbataraga ngwatanĩro ya eetĩkia bangĩ, nĩkenda tũũmanagĩĩrie amwe.—Thooma Ahibirania 10:24, 25.

Kũgwatanĩra amwe na antũ barĩa bendeete Mũrungu, nĩgũtũteethagia kũthengeera Mũrungu. Mĩcemanio ya Akũũjĩ ba Jehova nĩtwejaga kaanya ka bata mono kagũtũma tũteetheka nĩ wĩtĩkio bwa bangĩ.—Thooma Aroma 1:11, 12.

Ũũmba kũthengeera Jehova na njĩra ya kũthũganĩria nkũrukĩ mantũ jarĩa wiritanĩte kuuma Rũtetone rwawe. Thũganĩria mathithio, mataaro na mawĩrane jaawe. Kũthũgania na njĩra ya maromba nĩgũkũragia nkaatho ndeene ya nkoro cietũ, nĩũntũ bwa wendo bwa Mũrungu na ũũme bwawe.—Thooma Joshua 1:8; Zaburi 1:1-3.

Womba kũthengeera Mũrungu, kethĩra akĩ ũkamwĩtĩkia na ũmwĩrĩgĩĩre. Wĩtĩkio bũkari ta gĩntũ kĩrĩ mwoyo gĩkũbatara kũrerwa. No mwanka wĩte na mbere kũrera wĩtĩkio bwaku na njĩra ya kũthũganĩria itũmi bia wĩtĩkio bwaku.—Thooma Mathayo 4:4; Ahibirania 11:1, 6.

Jehova namenyagĩĩra barĩa bamwendeete. No abakarie kuuma kĩrĩ ũntũ bunthe bũrĩa bũũmba kũthũũkia wĩtĩkio bwao, na wĩrĩgĩĩro bwao bwa mwoyo jwa kenya na kenya. (Zaburi 91:1, 2, 7-10) Natũkaanagia njĩra cia mũtũũrĩre irĩa ciũmba kũthũũkia ũgima bwa mwĩrĩ na gũtũma twaga kũgwĩrua. Jehova atũritanaga njĩra ĩnjega ya mũtũũrĩre.—Thooma Zaburi 73:27, 28; Jakubu 4:4, 8.