Kiugo Betheli nĩ riĩtwa rĩa Kĩhibirania rĩa kuuga “nyomba ya Murungu.” (Kiambiriria 28:17, 19,) Riĩtwa rĩu nĩrĩkwaagĩra mĩako ĩrĩa Akũũjĩ ba Jehova baakĩĩte nthĩgũrũne yonthe arĩa ngũgĩ ya gũtũmĩĩria ĩtongagĩĩrua na ĩkagwatwa mbaru. Kĩama kĩrĩa Gĩtongagĩĩria gĩtumĩkaga obicine ĩrĩa nene ya nthĩgũrũ yonthe New York, U.S.A., na nĩ kĩrũngamĩrĩte ngũgĩ ya obici cia ndwang’ĩ cia nthĩgĩrũ inyiingĩ. Barĩ gĩkundi, barĩa batumĩkaga kĩrĩ obici iu betagwa nja ya Betheli. O ta nja, batũũraga amwe, bakarita ngũgĩ amwe, bakarĩĩra irio amwe, na bakairitana Bibiria amwe barĩ na ũrũmwe.—Zaburi 133:1.

Nĩ gũntũ kwa mwanya arĩa antũ bairitĩrĩte gũtumĩka ta nja ĩmwe. Kĩrĩ Betheli cionthe, kũrĩ na Akristũ antũ-arũme na antũ-aka barĩa bairitĩte kũthithia wendi bwa Mũrungu na gũtumĩka nĩũntũ bwa mantũ ja Ũnene ĩgiita rĩonthe. (Mathayo 6:33) Gũtĩ-we kĩrĩ bo ũrĩagwa mũcaara, ĩndĩ nĩ baejawa nyomba na biakũrĩa, na mbeca inkai cia kũrũngamĩĩra moobatu jaao. O muntũ wonthe arĩ ngũgĩ ĩrĩa aegi Betheli, ta obicine, rĩĩkone, kana gũntũ gwa kũrĩĩra. Bamwe batumĩkaga gũcaba kana kũthithia mauku, kũtheria nyomba, kũũra nguũ, kũmenyeera into kana mantũ jangĩ.

Nĩ gũntũ kũrĩ ngũgĩ inyiingĩ cia kũgwata mbaru gũtũmĩĩria Ũnene. Mworoto jũmwe jwa Betheli cionthe nĩ gũtũma ũmma bwa Bibiria bũkinyĩra antũ babaingĩ ũrĩa kũũmbĩkĩka. Broshua ĩjĩ nĩ ngerekano ĩmwe ya ũntũ bũu. Yaandĩkĩrwe gũkũrũkĩĩra ũrũngamĩĩri bwa Kĩama kĩrĩa Gĩtongagĩĩria, yaatũmwa na njĩra ya mĩtambo ya kompiuta kĩrĩ ikundi bibiingĩ bia ũtaũri nthĩgĩrũne yonthe, yacabĩrwa Betheli inyiingĩ cia gũcaba, na yaatũmwa kĩrĩ biũthũrano nkũrũki ya 110, 000. Kĩrĩ o ĩtagaaria rĩonthe ũntũne bũbũ, nja ya Betheli nĩejanaga ũteethio bwa bata kĩrĩ kũgwata mbaru ngũgĩ ĩjĩ ya mpwĩ kĩrĩ cionthe—gũtũmĩĩria nkuma ĩnjega.—Mariko 13:10.

• Nĩ baaũ batumĩkaga Betheli, na nĩatĩa bamenyagĩĩrwa?

• Nĩ ngũgĩ ĩrĩkũ ya mpwĩ ĩgwatagwa mbaru nĩ ngũgĩ irĩa iritagwa Betheli ciothe?