Rĩ, no weende kũthithia ũcũnkũũni bũnna kwongeera ũmenyo bwaku bwa Bibiria? Rĩ, kũrĩ ĩandĩko rĩnna, muntũ, gũntũ kana ũntũ ũkwenda kũmenya bũgweeti Bibiriene? Kana ũrathũgaanĩria kethĩra Rũteto rwa Mũrungu no rũgũteethie kũũmbana na ũntũ bũnna bũrĩa bũkũthangĩkagia? Kwou no ũriũngĩre maktaba ya Nyomba ya Ũnene.

Ĩrĩ na into bia kũgũteethia kũthithia ũcũnkũũni. Mbuga, ũtĩ na mauku jonthe ja Akũũjĩ ba Jehova jegiĩ Bibiria jarĩa jonekaga na mũgaambo jwaku. Ĩndĩ maktaba ya Nyomba ya Ũnene ĩrĩ na mauku jamaingĩ jarĩa jaumĩrĩte rua. Kinya no ĩĩthĩrwe na Bibiria mĩthemba ĩmiingĩ, ndiksonarĩ ĩnjega, na mauku jangĩ ja gũgũteetheria. No ũtumĩre maktaba mbere na kinya nyuma ya mĩcemanio. Kethĩra kũrĩ na kompiuta, no ĩthĩrwe na programu ya Watchtower Library. Ĩu nĩ programu ya kompiuta ĩrĩa ĩthagĩrwa na mauku jeetũ jamaingĩ, na njĩra ĩmpũũthũ ya kũthithia ũcũnkũũni kĩrĩ ũntũ bũrĩa ũkwenda, riĩtwa, kana ĩandĩko.

Nĩteethagia aritwa kĩrĩ Mũcemanio jwa Ũtũũro na Ũtungatĩri. No ũtumĩre bwega maktaba ya Nyomba ya Ũnene rĩrĩa ũkũthuranĩra twaanya twaku. Mũtegeeri wa Mũcemanio jwa Ũtũũro na Ũtungatĩri nĩwe ũrũngamagĩĩra maktaba. Nĩwe ũrĩ na ngũgĩ ya kwona atĩ mauku jarĩa jaumĩrĩte rua jarĩ maktabene, na nĩ jabaangi bwega. Mũtegeeri wa cukuru kana ũrĩa bwiritanaga nawe Bibiria, no akwonie ũrĩa ũũmba gũcwaa mantũ jarĩa ũkwenda. Amwe na bũu, gũtĩ mauku jabuĩri kuumagara oome ya Nyomba ya Ũnene. Nĩ tũbuĩri kũmenyeera mauku jau bwega na kũmenyeera tũtĩkajaandĩke.

Bibiria yuugaga kenda tũgĩta “umenyo bwa Murungu,” no mwanka twĩthĩrwe na wendi bwa kũbũcwaa na “wiru ta utonga buria bwithi.” (Njuno 2:1-5) Maktaba ya Nyomba ya Ũnene no ĩgũteethie kwambĩrĩria kũthithia ũcũnkũũni.

• Nĩ into birĩkũ bia kũthithia ũcũnkũũni birĩ maktabene ya Nyomba ya Ũnene?

• Nũũ ũũmba gũgũteethia gũtumĩra maktaba ĩu bwega?