1. Nũũ watweere mwoyo?

 JEHOVA “niwe Murungu uria utuuraga mwoyo.” (Jeremia 10:10) Nĩwe Mũũmbi weetũ, na natweete mwoyo. Bibiria yugaga: “Nigwe woombire into bionthe, na tontu bwa kwenda gwaku niku gwatumire bionthe bikara o, na kinya kuumbwa biroombwa.” (Kugwurirwa 4:11) Jehova eendaga tũtũũra mwoyo. Mwoyo nĩ kĩewa kĩa bata kuuma kĩrĩ we.—Thooma Zaburi 36:9.

2. Nĩatĩa tũũmba kũthithia kenda tũũmbana ũtũũrone?

² Jehova natwejaga kĩrĩa tũkũbatara, ta biakũrĩa na rũũjĩ kenda twĩta na mbere gũtũũra. (Mathithio 17:28) Ĩndĩ nkũrũki, endaga tũgwĩrĩrua ũtũũro. (Mathithio 14:15-17) Nĩtũkũbatara kwathĩkĩra mawaatho ja Mũrungu kenda tũũmbana ũtũũrone.—Isaya 48:17, 18.

3. Jehova aathithĩrie atĩa Kaini arĩkũũraga Abeli?

³ Bibiria ĩtũritanaga mwoyo jwetũ na jwa bangĩ nĩ jwa bata mono kĩrĩ Jehova. Ngerekano, rĩrĩa Kaini mũtaana wa Adamu na Hawa aarĩ na mũthũũro mono kwerekera mũtaanong’ina ũrĩa mũniini Abeli, Jehova nĩ eerĩre Kaini naabataraga kũrigĩĩria mũthũũro jwawe. Ĩndĩ Kaini ataigĩrue na araakanwa nĩ mũthũũro mono “arathunguthira mutano-ng’ina Habili, aramuuraga.” (Kiambiriria 4:3-8) Jehova naakanũkĩrie Kaini tontũ bwa kũũraga Abeli. (Kiambiriria 4:9-11) Kwou mũthũũro na rũmena nĩ ũgwati tontũ no bitweethie ooragani kana aagi kĩao. Muntũ ũrĩa ũkari ũu atĩona mwoyo jwa kenya na kenya. (Thooma 1 Johana 3:15.) Kenda tũgwĩrie Jehova  no mwanka twiritane kwenda antũ bonthe.—1 Johana 3:11, 12.

4. Waatho bũmwe kĩrĩ mawaatho jarĩa Mũrungu aaere Aisraeli bũrĩtũritana atĩa bwegiĩ kĩewa kĩa mwoyo?

⁴ Mangiri ja mĩaka nyumene, Jehova noonanĩrie nĩ oonaga mwoyo jũrĩ jwa bata rĩrĩa aaere Musa Maathana Ĩkũmi. Waatho bũmwe nĩ: “Ukororagana.” (Kuriikanithia Maathana 5:17) Muntũ arĩngĩũragana akĩendaga, kinya we arĩngĩũragwa.

5. Mũrungu oonaga atĩa kũrita ĩu?

⁵ Mũrungu oonaga atĩa kũrita ĩu? Kinya mwoyo jwa mwana ũtĩciari nĩ jwa bata kĩrĩ Jehova. Kĩrĩ Waatho bũrĩa Jehova aaere Aisraeli, Jehova aaugĩte muntũ arĩngĩringa mwekũrũ ũmũrito na mwana ũtĩciari agakua, muntũ ũu aabuĩri kũũragwa. (Thooma Kuuma 21:22, 23; Zaburi 127:3.) Bũu bũrĩtũritana nĩ bũthũũku kũrita ĩu.—Tega Nteto Irĩa irĩ Mũthia, 28.

6, 7. Nĩatĩa twonagia Jehova atĩ nĩtwonaga mwoyo nĩ jwa bata?

⁶ Nĩatĩa tũũmba kwonia Jehova nĩtwonaga ũtũũro bwetũ na bwa bangĩ bũrĩ bwa bata? Nĩ na njĩra ya kũrega kũthithia ũntũ kinya bũrĩkũ bũgwĩka ũtũũro bwetũ kana bwa bangĩ ũgwatine. Kwou tũtĩtumĩra mbaakĩ, kana mĩraa kana ndaawa cia mbogita, tontũ nĩitũthũũkagia na no itũũrage.

⁷ Mũrungu natweete mwoyo na mwĩrĩ jwetũ, na tũbuĩri kũbitumĩra o ta ũrĩa akwenda. Kwou nĩtũbuĩrĩte kũmenyeera bwega mwĩrĩ jwetũ. Twarega tũkethĩrwa tũtĩtheri methone ja Jehova. (Aroma 6:19; 12:1; 2 Akorintho 7:1) Kethĩra tũtĩkwonera mwoyo gĩtũmi, tũtĩũmba kũthaathayia Jehova ũrĩa ũtweete mwoyo. Kinya kethĩra no bwĩthĩrwe bũrĩ bũbũũmũ gũtigana na mĩkarie ĩmĩthũũku, Jehova agatũteethia kethĩra nĩtũgũciũmia tontũ nĩtũkwona mwoyo nĩ jwa bata.

8. Nĩatĩa tũkathithia kwona ũtũũro bwetũ kana bwa bangĩ bũtĩ ũgwatine?

 ⁸ Tũkwiritana mwoyo nĩ kĩewa kĩa bata mono. Jehova nagwĩtĩkia tũkathithia buru ũrĩa tũũmba tũtĩkeeje gũtũma ũtũũro bwetũ kana bwa bangĩ bwĩthĩrwa bũrĩ ũgwatine. Tũthithagia ũu gũkũrũkĩĩra ũrĩa twĩtithagia ngaarĩ, bikibiki, kana bingĩ. Tũciebanagia na mĩcetho ya ũgwati kana ya ndwaa. (Zaburi 11:5) Kinya tũthithagia buru ũrĩa tũkũũmba kenda nja cietũ ciĩthĩrwe na ũkaria. Jehova eerĩre Aisraeli: “Igita riria ugaaka nyomba injeru, ukamirigira kunthe ntere cionthe iguruguru riayo, nikenda muntu kinya uriku akagwa aumite ku, utigatume antu ba gwaku bacokererwa ni tharike untu bwa untu buu.”—Kuriikanithia Maathana 22:8.

9. Nĩatĩa tũbuĩri kũthithĩria nyomoo?

⁹ Kinya ũrĩa tũthithagĩria nyomoo nĩ bwa gĩtũmi kĩrĩ Jehova. Natwĩtĩkagĩĩria kũũraga nyomoo nĩũntũ bwa bĩakũrĩa na nguũ na kinya ĩkienda gũtũũraga. (Kiambiriria 3:21; 9:3; Kuuma 21:28) Ĩndĩ tũtĩthithĩria nyomoo bũthũũku kana gũciũraga tontũ tu bwa mĩcetho.—Njuno 12:10.

10. Nĩatĩa tũkũmenya tharike ĩrũngamagĩĩra mwoyo?

¹⁰ Tharike nĩ ĩntheru kĩrĩ Jehova tontũ tharike ĩrũngamagĩĩra mwoyo. Nyuma ya Kaini kũũraga Abeli, Jehova aamwĩrĩre: “Kaju ka tharike ya mutano-nyakwe nikagunkaira kaumite muthetune.” (Kiambiriria 4:10) Tharike ya Abeli yarũngamagĩĩra mwoyo jwawe, na Jehova nakanũkĩrie Kaini nĩũntũ bwa kũũraga Abeli. Nyuma ya Ĩkondoria rĩa ntukũ cia Nuhu, Jehova noonanĩrie kaĩrĩ tharike ĩrũngamagĩĩra mwoyo. Jehova naaere Nuhu na nja yaawe rũũtha rwa kũrĩa nyama cia nyomoo. Aaugĩre:  “Nyomoo cionthe iria ciumbaga gwitaita iria iri mwoyo nacio ikaa biakuria bienu; o ta uria ndabwere tumiti tunthe turia tuumaga nthi twe biakuria bienu.” Ĩndĩ, kwĩna gĩntũ kĩmwe Jehova aaberĩre batĩkaarĩe: “No-ri, bukeejeni kurijaniria nyomoo iu amwe na mwoyo jwacio, kuuga uu ni kuuga tharike yacio.”—Kiambiriria 1:29; 9:3, 4.

11. Nĩ waatho bũrĩkũ bwegiĩ tharike Mũrungu aaere mũgongo jwa Israeli?

¹¹ Gĩntũ ta mĩaka 800 nyuma ya Jehova kwĩra Nuhu atĩkarĩe tharike, aacookere eera antũ baawe: “Muntu kinya uriku wa aana ba Isiraeli, kana wa ageni baria butuuranitie nabo, ukagwata nyomoo ya maguru jana, kana iria iburukaga ya muthemba juria juumba kuriwa ajothoga-ri, ni gwituura ageetuura tharike yayo nthi, acoke amithike na mithetu.” Aacookere arabeera: ‘Bukororia tharike.’ (Mantu ja Alawi 17:13, 14) Jehova no eendaga antũ baawe boona tharike ĩrĩ ĩntheru. Barĩngĩrĩa nyama ĩndĩ tĩ tharike. Rĩrĩa boraaga nyomoo tontũ bwa biakũrĩa, baabuĩri gwĩtũũra tharike yaayo nthĩ mũthetune.

12. Nĩatĩa Akristũ bonaga tharike?

¹² Mĩaka ĩng’anona nyuma ya gĩkuũ kĩa Jesũ, atũmwa na akũrũ ba kĩũthũrano kĩa Gĩkristũ kũu Jerusalemu nĩ baacemanĩrie kenda batua nĩ mantũ jarĩkũ ja Waatho, jarĩa jaaei Aisraeli jaabateere kũthingatwa nĩ Akristũ. (Thooma Mathithio 15:28, 29; 21:25.) Jehova naabateetherie kũmenya tharike no yaarĩ ya bata kĩrĩ we na no baabuĩri kũmĩona ĩrĩ ĩntheru. Akristũ ba mbere batĩngĩrĩa kana banyua tharike kana barĩa nyama itaariti tharike bwega. Barĩngĩthithia ũu, bwarĩ ũntũ bũthũũku o ta kũthaathayia mĩng’uanano kana kũthũngĩĩra. Kuuma ĩgiita rĩu gwĩta mbere Akristũ ba mma nĩbaaregere  kũrĩjaga kana kũnyua tharike. A naarua? Jehova no endaga twona tharike ĩrĩ ĩntheru.

13. Nĩkĩ tontũ Akristũ baregaga gwĩkĩrwa tharike?

¹³ Ũu-rĩ, nĩ kuuga Akristũ babuĩri kũrega kinya gwĩkĩrwa tharike? Ĩĩ. Jehova naatweere waatho tũkaarĩa kana tũnyua tharike. Ndagitarĩ agakwĩra ũtĩkaanyue ncoobi-rĩ, no wende kwimuntĩĩra yo na cidano mwĩrĩne jwaku? Arĩ ũtĩthithia ũu! Na njĩra o ta ĩu, waatho bwa kũrega kũrĩa kana kũnyua tharike nĩ kuuga tũtĩbuĩri gwĩtĩkĩĩria gwĩkĩrwa tharike.—Tega Nteto Irĩa irĩ Mũthia, 29.

14, 15. Nĩatĩa Akristũ bonaga mwoyo? No barege kwathĩkĩra waatho bwa Mũrungu kenda bareeiya ũtũũro bwao? Taarĩria.

¹⁴ A ndagitarĩ agatwĩra tũgakua twarega gwĩkĩrwa tharike? No mwanka o muntũ athithie ĩtua kethĩra akaathĩkĩra waatho bwa Mũrungu bwegiĩ tharike. Akristũ nĩbatĩĩaga mono kĩewa kĩa Mũrungu kĩa mwoyo, na tũgacwaa njĩra ingĩ cia kũora kenda twĩta na mbere gũtũũra; ĩndĩ tũtĩĩtĩkĩĩria gwĩkĩrwa tharike.

¹⁵ Tũgeragia mono kenda twĩthĩrwa twĩna ũgima bwa mwĩrĩ, ĩndĩ tontũ mwoyo nĩ jwa bata kĩrĩ Mũrungu, tũtĩtĩkĩĩria gwĩkĩrwa tharike. Nĩ ũntũ bwa gĩtũmi kwathĩkĩra Jehova antũ-a kũgeria kwongeera ũtũũro bwetũ, na njĩra ya kũrega kũmwathĩkĩra. Jesũ aaugĩre: “Muntu uria wendaga gutuuria mwoyo jwawe, uu natumaga juure; na uria ugutuma mwoyo jwawe juure ni untu bwakwa, uu akajwona.” (Mathayo 16:25) Tũrĩenda kwathĩkĩra Jehova tontũ nĩtũmwendete. Naijĩ kĩrĩa kĩega buru kĩrĩ twĩ, na twonaga mwoyo jũrĩ jwa bata na jũrĩ jũmũtheru o ta Jehova.—Ahibirania 11:6.

16. Nĩkĩ atumĩkĩri ba Mũrungu bamwathĩkagĩra?

¹⁶ Atumĩkĩri ba Mũrungu eetĩkua nĩbatuĩte kwathĩkĩra  waatho bwawe bwegiĩ tharike. Batĩrĩa kana banyua tharike na batĩĩtĩkĩĩria tharike, ĩrĩ ta ndaawa. a Ĩndĩ bageetĩkĩĩria njĩra ingĩ cia kũrwa na mĩrimo kenda boonokia mwoyo jwao. Nĩbetĩkĩtie Mũũmbi wa ũtũũro na tharike naijĩ bwega kĩrĩa kĩega buru kĩrĩ bo. Nũgwĩtĩkia naijĩ kĩrĩa kĩega buru kĩrĩ gwe?

17. Nĩ njĩra ĩrĩkũ akĩ Jehova eetĩkĩĩrĩtie Aisraeli batumĩra tharike?

¹⁷ Waathone bũrĩa Mũrungu aaere Musa, Jehova eerĩre Aisraeli: “Mwoyo jwa mwiri juri ndene ya tharike; na niyo mbuete iikagwe kithinjirone ya kworoagiria [kana kũrombera ũrekeri] mioyo yenu; nikwithirwa tharike no yooroagiria ni untu bwa mwoyo juria juri ndene yayo.” (Mantu ja Alawi 17:11) Aisraeli barĩngĩĩyia, barĩngĩromba Jehova ũrekeri gũkũrũkĩĩra kũrita kĩgongwana kĩa nyomoo na kũũria mũthĩnjĩrĩ-Mũrungu etũũre ĩmwe ya tharike yaayo kĩthĩnjĩrone kĩrĩ kĩũrũ. Njĩra ĩjĩ nĩyo akĩ Jehova eetĩkĩĩrĩtie Aisraeli batumĩra tharike.

18. Kĩgongwana kĩa Jesũ gĩtũũmbithagia kwona mbi?

¹⁸ Rĩrĩa Jesũ eejĩre nthĩgũrũne naathirĩrie waatho bwa igongwana bia nyomoo, antũ-a bu anenkanĩra kĩgongwana kĩa mwoyo kana tharike yaawe kenda tũrekerwa meeyia. (Mathayo 20:28; Ahibirania 10:1) Tontũ bwa ũrĩa mwoyo jwa Jesũ jwaarĩ jwa bata mono, gũkũrũkĩĩra kĩgongwana kĩawe, Jehova arĩngĩũmba kwaa antũ bonthe kaanya ga gũtũũra kenya na kenya.—Johana 3:16; Ahibirania 9:11, 12; 1 Petero 1:18, 19.

19. No mwanka tũthithie atĩa kenda tũtĩgacookerwe “ni tharike ya muntu kinya umwe”?

 ¹⁹ Tũrĩ na ncũne kĩrĩ Jehova tontũ bwa kĩewa kĩawe gĩa kũrigaria kĩa mwoyo! Na tũrĩenda kwĩra antũ kethĩra bageetĩkia Jesũ bagatũũra kenya na kenya. Nĩtwendete antũ, na tũkathithia jonthe jarĩa tũkũũmba kũbaritana ũrĩa boomba kwona mwoyo. (Ezekieli 3:17-21) Rĩu, o ta mũtũmwa Paũlo, tũkoomba kuuga: “Gutirio ngacokerwa ni tharike ya muntu kinya umwe, kinya akaura. Nikwithirwa ntatirikama ta ndi na uguaa nkibwira mantu jonthe jaria Murungu atwire eendaga jathithue.” (Mathithio 20:26, 27) Twonanagia nĩtũgũtĩĩa mwoyo na tharike mono rĩrĩa tũkwĩra bangĩ bwegiĩ Jehova na ũrĩa mwoyo jũrĩ jwa bata kĩrĩ we.