1. Nĩatĩa ũũmba gũciũria nyuma ya kwiritana bwega iuku rĩrĩ?

 NWIRITANĨTE ũmma bũbwingĩ bwa Bibiria ta wĩrane bwa Mũrungu bwa mwoyo jwa kenya na kenya, ũmma bwegiĩ akuũ, na wĩrĩgĩĩro bwa kũriũkua, rĩrĩa wĩthĩrĩtwe ũkiiritana iuku rĩrĩ. (Mutumiiria 9:5; Luka 23:43; Johana 5:28, 29; Kugwurirwa 21:3, 4) No wĩthĩrwe nwambĩĩrĩtie gwĩta mĩcemanione ya Akũũjĩ ba Jehova na nĩwĩtĩkĩtie nĩbo bathathaagia  Mũrungu ũrĩa kwagĩrĩte. (Johana 13:35) No wĩthĩrwe nwambĩĩrĩtie gũkũria ũcoore bwa akuĩ mono na Jehova, na no wĩthĩrwe nũtuĩte nũkwenda kũmũtumĩkĩra. Kwou no ũciũrie, ‘Nĩatĩa nandĩ mbuĩri kũthithia kenda ntũmĩkĩra Mũrungu?’

2. Nĩkĩ ntomũrũme Mwithiopia eendaga kũbatithua?

² Ũu nĩu ntomũrũme Mwithiopia ũrĩa waatwĩre ĩgiitene rĩa Jesũ aaciũrĩrie. Ĩgiita rĩna nyuma ya Jesũ kũriũkua, mũritwa wa Jesũ Filipũ naatũmĩrĩĩrie muntũ ũu. Filipũ naamũrikĩthĩĩrie Jesũ nĩwe waarĩ Mesia. Ntomũrũme Mwithiopia naaringĩthĩrue mono nĩ jarĩa aairitanĩre mwanka arauga o rĩo atĩrĩ: “Tega, ruuji tiru ruu? Nimbi igirikia mbatithua?”—Mathithio 8:26-36.

3. (a) Nĩ waatho bũrĩkũ Jesũ aaere athingati baawe? (b) Nĩatĩa muntũ abuĩrĩte kũbatithua?

³ Bibiria ĩritanaga cararũkũ atĩ kethĩra nũkwenda gũtumĩkĩra Jehova, nũbuĩrĩte kũbatithua. Jesũ eerĩre athingati baawe: ‘Iteni, bukaethie antu ba migongo yonthe baee aritwa bakwa, bukibabatithagia.’ (Mathayo 28:19) Kinya Jesũ naabatithĩrue araĩĩka ngerekano. Aatombekerwe buru rũũjĩne, tĩ kũminyĩrua akĩ rũũjĩ mũtwe. (Mathayo 3:16, Kimeru Bible, 2010) Kinya naarua rĩrĩa Mũkristũ akũbatithua, no mwanka atombekwe, kana orokerue buru rũũjĩne.

4. Nĩatĩa kũbatithua gwaku kwonagia bangĩ?

⁴ Rĩrĩa wabatithua, wonagia bangĩ nũkwenda kamma kwaa mũcoore wa Mũrungu na kũmũtumĩkĩra. (Zaburi 40:7, 8) Kwou no ũciũrie, ‘Nĩatĩa mbuĩrĩte kũthithia nĩkenda mbatithua?’

5. (a) No mwanka ũthithie atĩa mbere ya ũbatithua? (b) Nĩkĩ mĩcemanio ya Gĩkristũ ĩrĩ ya bata?

⁵ Mbere ya ũbatithua, no mwaka ũmenye Jehova na Jesũ. Nĩ wambĩrĩrĩtie kũthithia ũu na njĩra ya kwiritana Bibiria. (Thooma Johana 17:3.) Ĩndĩ bũu bũtĩng’ani. Bibiria yugaga no mwanka ‘uujurwe ni umenyo’ bwa wendi bwa Jehova. (Akolosai 1:9) Mĩcemanio ya Akũũjĩ ba Jehova ĩgagũteethia kũgĩa na ngwatanĩro ya akuĩ nkũrũki na Jehova. Kĩu nĩ gĩtũmi kĩmwe kĩa bata kĩa ũũgwe gwĩta mĩcemanione ĩu ũtĩgũtĩĩra.—Ahibirania 10:24, 25.

6. Ũrĩbatara kũmenya Bibiria bũng’ana kenda ũbatithua?

⁶ Jehova atĩkwĩrĩgĩĩra ũmenya mantũ jonthe Bibiriene mbere ya ũbatithua. Ateerĩgagĩĩra ntomũrũme Mwithiopia amenya mantũ jonthe mbere ya abatithua. (Mathithio 8:30, 31) Na tũgeeta na mbere kwiritana bwegiĩ Mũrungu mwanka ũcii. (Mutumiiria 3:11) Ĩndĩ kenda ũbatithua, nũbuĩrĩte noo kũmenya na gwĩtĩkĩĩria mooritani ja mũsingi ja Bibiria.—Ahibirania 5:12.

7. Wiritani bwaku bwa Bibiria bũgũteethetie atĩa?

⁷ Bibiria yugaga: “Gukeethirwa witikio buti o, butiumbika kugwiria Murungu.” (Ahibirania 11:6) Kwou nũkũbatara kwĩthĩrwa na wĩtĩkio mbere ũbatithua. Bibiria ĩtwĩraga antũ bamwe taũnine ya karaaja ya Korintho baaigĩrue ũrĩa athingati ba Jesũ baaritanaga, na rĩu “bareetikia, barabatithua.” (Mathithio 18:8) O ta ũu, wiritani bwaku bwa Bibiria nĩbũgũteethetie kũgĩa wĩtĩkio kĩrĩ Mawĩrane ja Mũrungu, na inya ya kĩgongwana kĩa Jesũ kĩrĩa kĩũmba gũtwonokia kuuma  kĩrĩ meeyia na gĩkuũ.—Joshua 23:14; Mathithio 4:12; 2 Timotheo 3:16, 17.

8. Nĩmbi ĩgatũma wenda kwĩra bangĩ jarĩa wiritanĩte?

⁸ O ũrĩa ũkwiritana Bibiria nkũrũki na kwona ũrĩa ĩgũgũteethia ũtũũrone bwaku, wĩtĩkio bwaku bũkagĩa inya nkũrũki. Ũkeenda kwĩra bangĩ jarĩa ũkwiritana. (Jeremia 20:9; 2 Akorintho 4:13) Ĩndĩ nĩ baaũ ũkeera?

9, 10. (a) Nĩ baaũ ũũmba kwambĩrĩria kwĩra jarĩa wiritanĩte? (b) Nĩatĩa ũbuĩri kũthithia kethĩra nũkwenda gũtũmĩĩria amwe na kĩũthũrano?

⁹ No wende kwĩra antũ ba nja yenu, acoore, atũũri, kana barĩa ũritanagĩria ngũgĩ nabo jarĩa ũkwiritana. Bũu nĩ ũntũ bũbwega, ĩndĩ rĩonthe ũthithie ũu na njĩra ya kĩao na wendo. Nyumene, ũkoomba kwambĩĩria gũtũmĩĩria amwe na kĩũthũrano. Waciigua no ũũmbe kũthithia ũu, no warie na Mũkũũjĩ ũrĩa ũgũkũritana Bibiria ũmwĩre ũrĩngĩenda gũtũmagĩĩria amwe na kĩũthũrano. Kethĩra ũrĩa ũgũkũritana nakwona womba, na nũgũtũũra kũringana na ũritani bwa Bibiria, rĩu bũrĩ amwe bũgacemania na akũrũ baĩrĩ ba kĩũthũrano.

¹⁰ Nĩmbi ĩkaarĩĩrua mũcemanione jũu? Akũrũ bakaaria naagwe kwona kethĩra nũkũmenya na nũgwĩtĩkia mooritani ja mũsingi ja Bibiria, nĩ wathĩkagĩra jarĩa Bibiria yugaga mũtũũrĩrene jwaku jwa o ntukũ, na kethĩra nĩ mma nũkwenda kwaa ũmwe wa Akũũjĩ ba Jehova. Riikana atĩ akũrũ bamenyagĩĩra bonthe kĩũthũranone, kinya ũũgwe, kwou ũgakĩra kwaria nabo. (Mathithio 20:28; 1 Petero 5:2, 3) Nyuma  ya mũcemanio jũu, akũrũ bagakũmenyithia kethĩra no wambĩrĩrie gũtũmĩĩria amwe na kĩũthũrano.

11. Nĩkĩ nĩ ũntũ bwa gĩtũmi mono kũthithia mogarũrũku mbere ya wambĩrĩria gũtũmĩĩria amwe na kĩũthũrano?

¹¹ Akũrũ no bakwĩre nũkũbatara kũthithia mogarũrũku jangĩ mbere wambĩrĩria gũtũmĩĩria amwe na kĩũthũrano. Nĩkĩ nĩ ũntũ bwa gĩtũmi mono kũthithia mogarũrũku jau? Nĩ tontũ rĩrĩa tũkwaria na bangĩ bwegiĩ Mũrungu, tũrũngamagĩĩra Jehova, na no mwanka tũtũũre na njĩra ĩkwonania nĩ tũkũmũtĩĩa.—1 Akorintho 6:9, 10; Agalatia 5:19-21.

12. Nĩkĩ antũ bonthe babuĩrĩte kwirira?

¹² No mwanka ũthithie ũntũ bũngĩ mbere ya ũbatithua. Mũtũmwa Petero aaugĩre: ‘Irireni, bugaruke nikenda meeyia jenu jaangurwa.’ (Mathithio 3:19) Kwirira nĩ kuuga atĩa? Nĩ kuuga kwigua bũthũũku mono tontũ bwa ũthũũku kinya bũrĩku bũrĩa twaathithia. Ngerekano, kethĩra waatũũraga mũtũũrĩre jwa ũthũngĩĩri nũkũbatara kwirira. Na kinya kethĩra ũtũũrone bwaku bunthe nũciũmĩtie buru kũthithia jarĩa jagĩrĩte, no ũkũbatara kwirira, tontũ twinthe nĩtwĩagia na nĩtũbuĩrĩte kũromba Mũrungu atũrekere.—Aroma 3:23; 5:1.

13. ‘Kugaruka’ nĩ kuuga atĩa?

¹³ Nĩ bũng’ani akĩ kwigua bũthũũku nĩũntũ bwa jarĩa ũthithĩtie? Arĩ. Petero aaugĩre kinya nũkũbatara ‘kugaruka.’ Kũũ nĩ kuuga nũkũbatara gũtiga buru mũtũũrĩre jũmũũĩ jwa au mbere na wambĩrĩrie kũthithia jarĩa jagĩrĩte. Ngerekano, thũgaanĩria wĩtĩte gũntũ ũtaakinya kaĩrĩ. Nyuma ya gwĩta karũgendo mma,  ũkamenya ũgwaatia njĩra. Ũũmba kũthithia atĩa? Gũtĩ nkaanja neka ũrũngama, ũkagarũka, na ũkambĩrĩria gwĩta na njĩra ĩrĩa yagĩrĩte. O ta ũu, o ũrĩa ũkwiritana Bibiria womba kwona mũtũũrĩrene jwaku kwĩna mĩtugo kana mantũ ũkũbatara kũthithĩria ũgarũrũku. Ĩthĩrwa na wendi bwa ‘kugaruka’—kũu nĩ kuuga kũthithia mogarũrũku jarĩa jakwendeka—na wambĩrĩrie kũthithia jarĩa jagĩrĩte.

14. Ũũmba kwirita kĩrĩ Mũrungu atĩa?

¹⁴ Ĩtagaaria rĩngĩ rĩa gĩtũmi ũkũbatara kũjũkia mbere ya ũbatithua nĩ kwirita kĩrĩ Jehova. Rĩrĩa wairita kĩrĩ Jehova, wĩkaga wĩrane gũkũrũkĩĩra ĩromba ũka-mũthaathayia wenka, na ũgaĩĩka wendi bwawe bũrĩ ũntũ bwa gĩtũmi nkũrũki ũtũũrone bwaku.—Kuriikanithia Maathana 6:15.

15, 16. Nĩmbi ĩtũmaga muntũ enda kwirita kĩrĩ Mũrungu?

¹⁵ Gwĩka wĩrane gũtumĩkĩra Jehova wenka, nĩ ta gwĩka wĩrane ũgatumĩra ũtũũro bwaku bunthe na muntũ wendete. Ũthũgaanĩria mũthaka akĩgambagia mwarĩ. O ũrĩa mũthaka etaga na mbere kũmenya mwarĩ bwega, namwendaga na akenda kũmũgũra. Kinya kethĩra nĩ ĩtua rĩĩrito, mũthaka eena wendi bwa kũrĩthithia tontũ namwendete.

¹⁶ O ũrĩa ũkwiritana bwegiĩ Jehova, no u ũmwendaga na ũkenda kũthithia bũrĩa bunthe ũkũũmba kenda ũmũtumĩkĩra. Bũũ bũgatũma wenda kũrita ĩromba rĩa kwĩra Jehova ũkamũtumĩkĩra. Bibiria yugaga o muntũ wonthe ũrĩa ũkwenda kũthingata Jesũ no mwanka “airege.” (Mariko 8:34, Kimeru Bible, 2010) Kũu nĩ kuuga atĩa? Nĩ kuuga wĩĩke kwathĩkĩra Jehova mbere ũtũũrone  bwaku. Kĩrĩa Jehova akwenda nĩ kĩa bata nkũrũki ya mairirĩĩria jaaku wengwa na jarĩa wendaga kwiingia.—Thooma 1 Petero 4:2.

17. Nĩkĩ antũ bamwe batiiritaga kĩrĩ Jehova?

¹⁷ Antũ bamwe batiiritaga kĩrĩ Jehova, tontũ bakĩraga no baremwe kwiingia wĩrane bwao bwa kũmũtumĩkĩra. Batĩendaga kũringa Jehova nthĩ, kana boomba kũthũgaania kethĩra batiiritĩte kĩrĩ Jehova, atĩbagambithĩria jarĩa bakũthithia.

18. Nĩmbi ĩgagũteethia gũciinda ũguaa bwa kũringa Jehova nthĩ?

¹⁸ Kwenda Jehova gũgagũteethia gũciinda ũguaa bwa kũmũringa nthĩ. Tontũ nũmwendete, ũkathithia bũrĩa bunthe ũkũũmba kwiingia wĩrane bwaku kĩrĩ we. (Mutumiiria 5:4; Akolosai 1:10) Ũtĩona bũũmi mono kũthithia wendi bwa Jehova. Mũtũmwa Johana aandĩkĩre: “Kwenda Murungu ni atiri, ni kwiingagia maathana jawe; na kwonaga jati jamarito.”—1 Johana 5:3.

19. Nĩkĩ ũtĩbuĩrĩte gũkĩra kwirita kĩrĩ Jehova?

¹⁹ To mwanka wĩthĩrwe ũrĩ ũmũũjũru kenda wirita kĩrĩ Jehova. Atĩĩrĩgagĩĩra tũthithia nkũrũki ya ũrĩa tũũmba. (Zaburi 103:14) Agagũteethia kũthithia ũrĩa kwagĩrĩte. (Isaya 41:10) Ĩrĩgĩĩra Jehova na nkoro yaaku yonthe, “nawe agakuthongomeria njira ciaku.”—Njuno 3:5, 6.

20. Warĩĩkia kwirita kĩrĩ Mũrungu-rĩ, ĩtagaaria rĩrĩa rĩthingatĩte nĩ rĩrĩkũ?

²⁰ Nũkwigua ũkinyĩtie a kwirita kĩrĩ Jehova? Warĩĩkia kwirita kĩrĩ Jehova, nandĩ no ũjũkie ĩtagaaria  rĩrĩa rĩthingatĩte. Nũkũbatara kũbatithua.

21, 22. Nĩatĩa ũũmba ‘kuumbura’ mbere ya mwingĩ wĩtĩkio bwaku?

²¹ Menyithia mũthuranĩri wa kĩama gĩa akũrũ ba kĩũthũrano kĩenu nwiritĩte kĩrĩ Jehova na nũkwenda kũbatithua. Rĩu akooria akũrũ bamwe bakũrũkĩĩre mooritani ja mũsingi ja Bibiria amwe naagwe.  Bakeeja gwĩtĩkĩĩria nũkwagĩra, bagakwĩra no ũbatithue kĩgomanone kĩrĩa kĩthingatĩte kĩa Akũũjĩ ba Jehova. Kĩgomanone, gũkethĩrwa kwĩna rwaria rwa gũtaarĩria ũbatithio nĩ kuuga atĩa. Mwaria akooria barĩa bakwagĩra kũbatithua biũria biĩrĩ bibiũthũ. Gũkũrũkĩĩra gũcookia biũria biu, ũkethĩrwa ‘ukiumbura’ mbere ya mwĩngĩ wĩtĩkio bwaku.—Aroma 10:10.

 ²² Rĩu ũkabatithua. Ũgatombekwa buru rũũjĩne. Ũbatithio bũkoonia bonthe nwiritĩte kĩrĩ Jehova na nandĩ ũrĩ ũmwe wa Akũũjĩ ba Jehova.

23. Kũbatithua ‘riitwene ria Ithe, na ria Mutaana, na ria kirundu gikitheru’ nĩ kuuga atĩa?

²³ Jesũ aaugĩre aritwa baawe barĩngĩbatithua ‘riitwene ria Ithe, na rĩa Mutaana, na ria kirundu gikitheru.’ (Thooma Mathayo 28:19.) Kũu nĩ kuuga atĩa? Nĩ kuuga nũgũtĩĩa waathani bwa Jehova na ngũgĩ ya Jesũ kĩrĩ mworoto jwa Mũrungu, amwe na ũrĩa Mũrungu atumagĩra kĩrundu gĩkĩtheru kwiingia wendi bwawe.—Zaburi 83:18; Mathayo 28:18; Agalatia 5:22, 23; 2 Petero 1:21.

24, 25. (a) Ũbatithio bũrũngamagĩĩra mbi? (b) Nĩmbi tũkaarĩria kĩthoomone kĩa mũthia?

²⁴ Ũbatithio bũrũngamagĩĩra ũntũ bwa gĩtũmi mono. Rĩrĩa watombekwa rũũjĩne, nĩ kuuga ũgũtiga kana ũgũkua kĩrĩ njĩra yaaku ya karaaja ya mũtũũrĩre. Rĩrĩa ũkauma rũũjĩne, ũkambĩrĩria ũtũũro bũbwerũ ũkĩthithagia wendi bwa Mũrungu. Kwonanagia ũgatumĩkĩra Jehova kuuma nandĩ, na gwĩta mbere. Riikana ũtiiritĩte kĩrĩ muntũ, ũthuranĩri, kana ngũgĩ nna. Ũritĩte ũtũũro bwaku kĩrĩ Jehova.

²⁵ Kwirita gwaku gũgagũteethia gũkũria ũcoore bwa akuĩ na Mũrungu. (Zaburi 25:14) Kũũ tĩ kuuga muntũ akoonokua tontũ tu nabatithĩtue. Mũtũmwa Paũlo aandĩkĩre: “Ujuragiirieni wonokio bwenu bugikiraga na kwinaina.” (Afilipi 2:12) Ũbatithio nĩ mwambĩrĩrio akĩ. Ĩndĩ nĩatĩa ũũmba gũkara ũrĩ akuĩ na Jehova? Kĩthoomo kĩa mũthia kĩa iuku rĩrĩ gĩgacookia kĩũria kĩu.