1. Nĩ ĩromba rĩrĩkũ riijĩkene mono tũkaarĩĩria nandĩ?

 MAMIRIONI ja antũ nĩbaijĩ ĩromba rĩrĩa riijĩkene mono rĩĩtagwa, Baaba Weetũ, kana Ĩromba rĩa Mwathani. Jesũ aatumĩĩre ĩromba rĩu kũritana aritwa baawe kũromba. Nĩ mantũ jarĩkũ aagwetere ĩrombene rĩu? Na nĩkĩ rĩrĩ rĩa bata kĩrĩ twĩ naarua?

2. Nĩ mantũ jarĩkũ jathatũ ja gĩtũmi Jesũ aatũritanĩre tũrombage?

² Jesũ aaugĩre: “Rombageni uju atiri, Baaba wetu uria uri Iguru, Riitwa riaku riathurwe [kana, rĩethue rĩĩtheru]; Unene bwaku bwije; Uria wendete gwe buthithague nthi iji, Ta uria buthithagua kuu Iguru.” (Thooma Mathayo 6:9-13.) Nĩkĩ Jesũ aatũritanĩre tũrombage mantũ jau jathatũ?—Tega Nteto Irĩa irĩ Mũthia, 20.

3. Nĩmbi tũkũbatara kũmenya yegiĩ Ũnene bwa Mũrungu?

³ Nĩ twiritanĩte riĩtwa rĩa Mũrungu nĩ Jehova. Na nĩ twarĩrĩĩtie wendi bwa Mũrungu kĩrĩ antũ na nthĩgũrũ nĩmbi. Ĩndĩ nĩatĩa Jesũ aaugaga rĩrĩa aaugĩre: “Unene bwaku bwije”? Tũkairitana Ũnene bwa Mũrungu nĩmbi, bũkathithia atĩa, na ũrĩa bũkatheria riĩtwa rĩa Mũrungu.

4. Ũnene bwa Mũrungu nĩmbi, na nũũ Mũnene wabu?

⁴ Jehova aarũngĩkĩre thirikarĩ ya ĩgũrũ na arathuura Jesũ aa Mũnene waayo. Bibiria ĩĩtaga thirikarĩ ĩu Ũnene bwa Mũrungu. Jesũ nĩwe “Mwathani wa aathani na Munene wa anene.” (Kugwurirwa 17:14) Jesũ arĩ na  inya ya kũthithia mantũ jameega nkũrũki ya mũnene wa nthĩgũrũ kinya ũrĩkũ, na inya yaawe ĩkũrũkĩte ya aathani bonthe ba antũ baringanĩĩri amwe.

5. Thirikarĩ ya Mũrungu ĩkaathana kuuma kũ? Nĩmbi ĩkaatha?

⁵ Ntukũ mĩrongo ĩna nyuma ya Jesũ kũriũkua, naacookere ĩgũrũ. Nyumene, Jehova naamũthuurĩre aa Mũnene wa Ũnene. (Mathithio 2:33, Kimeru Bible, 2010) Ũnene bwa Mũrungu bũkaatha nthĩgũrũ kuuma ĩgũrũ. (Kugwurirwa 11:15) Nĩkĩo Bibiria ĩĩtaga Ũnene bwa Mũrungu ‘Unene bwa iguru.’—2 Timotheo 4:18.

6, 7. Nĩmbi ĩtũmaga Jesũ aagĩra nkũrũki ya mũnene kinya ũrĩkũ wa kĩnthĩgũrũ?

⁶ Bibiria yugaga Jesũ nĩ ũmũnene nkũrũki ya mũnene wa nthĩgũrũ kinya ũrĩkũ tontũ “atikorocoka gukua kairi.” (Aroma 6:9) Aathani bonthe ba nthĩgũrũ nĩ bakujaga nyumene, ĩndĩ Jesũ atĩkorokua. Mawega jonthe jarĩa Jesũ agatũthithĩria jagatũũra kenya na kenya.

⁷ Ũroria bwa Bibiria bugaga Jesũ akethĩrwa arĩ Mũnene ũrĩ na ĩota na kĩao: ‘Kirundu kia Mwathani gigakara iguru riawe, nakio ni kirundu kia uume, na kia umenyo, kirundu kia ugambi na inya, kirundu gia kirira na gia gukira Mwathani. Nawe buria bukamugwiragia ni gukira Mwathani. Na atitua kugambithanagia ni untu bwa jaria oonete na metho jawe, na ningi atitua kwonanagiiria ni untu bwa jaria aigitue na matu jawe; indi akagambagira nkia uria kwagirite.’ (Isaya 11:2-4) Wenda kwĩthĩrwa wĩna mũnene ũkari ũu?

8. Nĩatĩa tũkũmenya Jesũ atĩathana arĩ wenka?

⁸ Mũrungu nataarĩte antũ bamwe baathana amwe na Jesũ thirikarĩne ya ĩgũrũ. Ngerekano, mũtũmwa  Paũlo eerĩre Timotheo: “Twoomĩĩria mĩthangĩko, tũkaathana amwe nawe.” (2 Timotheo 2:12, Kimeru Bible, 2010) Nĩbang’ana bakaathana amwe na Jesũ?

9. Nĩ bang’ana bakaathana amwe na Jesũ? Nĩrĩ Mũrungu aambĩrĩĩrie kũbathuura?

⁹ Ta ũrĩa twairitanĩre Kĩthoomone kĩa 7, mũtũmwa Johana noonerue kĩoneki kĩa Jesũ arĩ Mũnene ĩgũrũ amwe na anene bangĩ 144,000. Bau 144,000 nĩ baaũ? Johana arĩtaarĩĩria “baandiki riitwa [rĩa Jesũ] na ria Ithe ireerene biao.” Na arĩongeera: “Nabo nibo bathingatanaga na Gaturume [nĩko Jesũ] o kunthe kuria geetaga. Na nibo baakuurirwe baraathuranwa na kirindi.” (Thooma Kugwurirwa 14:1, 4.) Bau 144,000 nĩ Akristũ etĩkua barĩa Mũrungu athuurĩte “baathaga nthiguru” amwe na Jesũ. Bakua, bariũkagua batũũra ĩgũrũ. (Kugwurirwa 5:10) Kuuma ĩgiita rĩa atũmwa, Jehova ethĩrĩtwe akĩthuura Akristũ etĩkua bae bamwe ba gĩkundi kĩu kĩa anene 144,000.

10. Nĩkĩ nĩ wendo Jehova kũthuura Jesũ amwe na barĩa 144,000 baatha antũ?

¹⁰ Jehova natũmakagĩra mono mwanka nathithĩtie mũbango kenda antũ baathana amwe na Jesũ. Jesũ akethĩrwa arĩ mũnene ũmwega tontũ natwijĩ bwega. Naijĩ kwaa muntũ na kũthangĩka nĩ kuuga atĩa. Paũlo aaugĩre Jesũ naijĩ ũrĩa twigagua “ti uria uremekua ni gutwigiirua kiao, tontu We aragerua mantune jonthe o ta batwi.” (Ahibirania 4:15; 5:8) Kinya barĩa 144,000 nĩbaijĩ kwaa muntũ nĩ kuuga atĩa. Na nĩ barũĩte na kwĩthĩrwa batĩũjũri na mbajua. Kwou no twĩtĩkie buru Jesũ na barĩa 144,000 bakamenya tĩ ũrĩa twigagua akĩ, ĩndĩ kinya mathĩĩna jarĩa twĩnajo.

11. Nĩ bonthe ĩgũrũ baathithagia rĩonthe wendi bwa Mũrungu?

¹¹ Nĩkĩ Jesũ aaritanĩre aritwa baawe barombage wendi bwa Mũrungu bũthithague nthĩ ta ũrĩa bũthithagua ĩgũrũ? Twairitanĩre Kĩthoomone kĩa 3, Shaitani Nkoma naareganĩre na Jehova. Jehova naarekererie Shaitani arĩkwaa mũregani amwe na araĩka barĩa batĩ etĩkua, kana irundu bithũũku, bakara ĩgũrũ ĩgiita rĩna. Kwou tĩ bonthe ĩgũrũ baathithagia wendi bwa Mũrungu. Kĩthoomone kĩa 10, tũkairitana nkũrũki bwegiĩ Shaitani na irundu bithũũku.

12. Nĩ mantũ jarĩkũ jaĩrĩ ja gĩtũmi mono jataarĩrĩtue kĩrĩ Kugwurirwa 12:10?

¹² Bibiria yonanagia kagiita gaakai nyuma ya Jesũ kwethua Mũnene wa Ũnene bwa Mũrungu, arĩngĩrwa na Shaitani. (Thooma Kugwurirwa 12:7-10.) Mũstaarĩ jwa 10 nĩjũgũtaarĩria mantũ jaĩrĩ ja gĩtũmi mono. Kwambĩrĩria kwathana kwa Ũnene bwa Mũrungu Jesũ Kristũ arĩ Mũnene, na Shaitani kwarũkua nthĩgũrũne kuuma ĩgũrũ. O ta ũrĩa tũkairitana, mantũ jaja nĩjakarĩkĩte.

13. Nĩatĩa gwakarĩkĩre ĩgũrũ rĩrĩa Shaitani aarũkĩrue?

¹³ Bibiria nĩtaaragĩĩria gĩkeno kĩa araĩka etĩkua nyuma ya Shaitani na irundu bithũũku kwarũkua kuuma ĩgũrũ. Tũrĩthooma: “Tontu buu bwi Iguru gwirueni, o na kinya bwi baria butwire ku.” (Kugwurirwa 12:12) Nandĩ ĩgũrũ kwĩna thĩĩrĩ buru na ngwatanĩro tontũ bonthe kũu nĩ bakũthithia wendi bwa Mũrungu.

14. Nthĩgũrũne gũkari atĩa tontũ Shaitani naarũkĩrue kuuma ĩgũrũ?

¹⁴ Ĩndĩ ũtũũro nthĩgũrũne nĩ mwanya mono. Mantũ ja kũmakania nĩ jagwataga antũ “nikwithirwa  Nkoma iria nthuuku” nĩenamĩre ĩrĩ “na muthuuro juria munene, tontu bwa uria ikumenya ati no kagiita gaakai iri nako.” (Kugwurirwa 12:12) Shaitani arĩ na marũrũ. Naarũkĩrue kuuma ĩgũrũ na naijĩ akathirua rua. Athithagia jarĩa jonthe akũũmba kenda areta thĩĩna, ũrũrũ, na mĩthangĩko kunthe nthĩgũrũne.

15. Wendi bwa Mũrungu nĩmbi kĩrĩ nthĩgũrũ?

¹⁵ Ĩndĩ wendi bwa Mũrungu kĩrĩ nthĩgũrũ bũtĩgarũkĩte. No endaga antũ baboojũru batũũra kenya na kenya paradiso nthĩgũrũne. (Zaburi 37:29) Kwou nĩatĩa Ũnene bwa Mũrungu bũkathithia ũntũ bũu?

16, 17. Nĩmbi Danieli 2:44 ĩgũtwĩra ĩĩgiĩ Ũnene bwa Mũrungu?

¹⁶ Ũroria kĩrĩ Danieli 2:44 buugaga: “Matukune ja anene bau, Murungu wa Iguru akarikia unene buria butikaritharua kinya ri, ningi butikajukua ni antu bangi. Indi unene buu bukathethera monene jau jangi na bukajathiria buru, buu bungwa bukarungama o kenya na kenya.” Nĩmbi ũroria bũũ bũgũtũritana bwegiĩ Ũnene bwa Mũrungu?

¹⁷ Mbere, bũrĩtwĩra Ũnene bwa Mũrungu bũrĩngĩambĩrĩria kwathana “matukune ja anene bau.” Kũũ nĩ kuuga Ũnene bwa Mũrungu bũrĩngĩambĩrĩria kwathana moonene jangĩ jarĩ o nthĩgũrũne. Bwa jaĩrĩ, bũrĩtwĩra Ũnene bwa Mũrungu bũrĩngĩathana kenya na gũtĩrĩo bũrĩngĩgarũrwa nĩ thirikarĩ ĩngĩ. Na bwa jathatũ, kũrĩngĩthĩrwa na ndwaa gatĩgatĩ ka Ũnene bwa Mũrungu na thirikarĩ cia nthĩgũrũ ĩjĩ. Ũnene bwa Mũrungu bũrĩngĩciinda na kwaa thirikarĩ ĩrĩa yonka ĩkwatha nthĩgũrũ. Rĩu antũ bakethĩrwa na thirikarĩ ĩnjega buru ĩrĩa batethĩrwa nayo.

18. Ndwaa ya mũthia gatĩgatĩ ka Ũnene bwa Mũrungu na thirikarĩ cia nthĩgũrũ ĩjĩ, ĩĩtagwa atĩa?

 ¹⁸ Nĩatĩa Ũnene bwa Mũrungu bũkajũkia waathani bwa nthĩgũrũ? Mbere ya ndwaa ya mũthia ĩgwĩtwa Amagedoni, irundu bithũũku bikaĩĩria “anene ba migongo yonthe ya nthi, bikiboothuranagia nikenda beeja nduene ya ntuku iria nene ya Murungu, uria Mweneinya yonthe.” Thirikarĩ cia nthĩgũrũ ikarwaa na Ũnene bwa Mũrungu, ĩndĩ Ũnene bwa Mũrungu bũgaciinda.—Kugwurirwa 16:14, 16; tega Nteto Irĩa irĩ Mũthia, 10.

19, 20. Nĩkĩ tũkũbatara Ũnene bwa Mũrungu bwatha nthĩgũrũ?

¹⁹ Nĩkĩ tũkũbatara Ũnene bwa Mũrungu? Kwĩna itũmi ta bithatũ. Bwa mbere, twĩ tũrĩ eeyia, kwou nĩtwajagua na nĩtũkujaga. Ĩndĩ Bibiria yugaga waathanine bwa Ũnene bwa Mũrungu, tũgatũũra kenya na kenya. Nĩ mma kinya, Johana 3:16 yugaga: “Tontu bwa uria Murungu eendere kirindi kia nthiguru, naaritire Mutanowe-wa-mumwe, nikenda muntu kinya uriku uria ukamwitikia atikeeje kuura, indi eeje agite mwoyo jwa kenya na kenya.”

²⁰ Gĩtũmi kĩa biĩrĩ tũkũbatara Ũnene bwa Mũrungu, nĩ tontũ tũthiũrũkĩtwe nĩ antũ bathũũku. Babaingĩ nĩ baĩranagia, bakarongoa na nĩ amaramari. Gũtĩu tũũmba kũthithia tũbeberia, ĩndĩ Mũrungu akoomba. Barĩa batĩtigaga kũthithia mantũ jamathũũku bakathirua ĩgiita rĩa Amagedoni. (Thooma Zaburi 37:10.) Gĩtũmi kĩa bithatũ, tũkũbatara Ũnene bwa Mũrungu nĩ tontũ thirikarĩ cia antũ nĩ ciĩthĩrĩtwe itĩna inya, itĩna kĩao, na irĩ na nkukumano. Itĩna wendi bwa gũteetheria antũ baathĩkĩra Mũrungu. Bibiria yugaga, “muntu  agitaga na inya ya kwatha muntu ungi kenda amuthuukia.”—Mutumiiria 8:9.

21. Nĩatĩa Ũnene bũgatigĩĩra wendi bwa Mũrungu bũkũthithua nthĩgũrũne?

²¹ Nyuma ya Amagedoni, Ũnene bwa Mũrungu bũgatigĩĩra wendi bwa Mũrungu bũkũthithua nthĩgũrũne. Ngerekano, bũkeebia Shaitani na irundu biawe bithũũku. (Kugwurirwa 20:1-3) Nyumene, gũtĩwe ũkaajua kana akua. Nĩũntũ bwa ĩkũũri, antũ etĩkua bonthe bakomba gũtũũra kenya na kenya Paradiso. (Kugwurirwa 22:1-3) Ũnene bũkatheria riĩtwa rĩa Mũrungu. Kũũ nĩ kuuga atĩa? Nĩ kuuga rĩrĩa thirikarĩ ya Mũrungu ĩkaatha nthĩgũrũ, antũ bonthe bagatĩĩa riĩtwa rĩa Jehova.—Tega Nteto Irĩa irĩ Mũthia, 21.

22. Nĩatĩa tũkũmenya Jesũ ataeere Mũnene rĩrĩa aarĩ nthĩgũrũne kana akũriũkua o rĩo?

²² Jesũ aaritanĩre aritwa baawe kũromba: “Unene bwaku bwije.” Kwou gũtaarĩ nkaanja Ũnene bwa Mũrungu bũrĩngĩĩja ĩgiita rĩarĩ mbere. Jehova arĩngĩamba kũrũngĩka thirikarĩ yaawe na kwethia Jesũ Mũnene waayo. Jesũ-rĩ, ka eetherue Mũnene o rĩo agũcooka ĩgũrũ? Arĩ, naabataraga gweteera. Kagiita kang’anona  nyuma ya Jesũ kũriũkua, Petero na Paũlo nĩboonanĩrie cararũkũ ũntũ bũu rĩrĩa boonanĩrie ũroria bwa Zaburi 110:1, bwegiĩ Jesũ. Kĩrĩ ũroria Jehova ariuga: “Kara njarene yakwa ya urio, Mwanka riria nkaethia anthu baku gikinyithio kia makinya jaku.” (Mathithio 2:32-35; Ahibirania 10:12, 13) Jesũ aarĩ eteere ĩgiita rĩng’ana atĩa mbere ya Jehova amweethia Mũnene?

23. (a) Nĩrĩ Jesũ aambĩrĩĩrie kwathana arĩ Mũnene wa Ũnene bwa Mũrungu? (b) Nĩmbi tũkairitana kĩthoomone kĩrĩa kĩthingatĩte?

²³ Mĩaka ĩmiingĩ mbere ya 1914, gĩkundi kĩa Akristũ baarĩ na nkoro injega nĩbaciũkĩrĩtwe mwaka jũu jũrĩngĩĩthĩrwa jũrĩ jwa gĩtũmi ũroriene bwa Bibiria. Mantũ jarĩa jakarĩkĩte nthĩgũrũne kuuma 1914, nĩjonanĩtie bataatĩtie. Jesũ aambĩrĩĩrie kwathana arĩ Mũnene mwakene jũu. (Zaburi 110:2) Kagiita gaakai nyuma ya au, Shaitani naarũkĩrue nthĩgũrũne na nandĩ “no kagiita gaakai” arĩ nako. (Kugwurirwa 12:12) Kĩthoomone kĩrĩa kĩthingatĩte, tũkoona nkũrũki mantũ jarĩa jakwonania tũrĩtũũra ĩgiitene rĩu. Kinya tũkairitana atĩ ĩgiita rĩtĩ kũraaja Ũnene bwa Mũrungu bũgatigĩĩra wendi bwawe nĩbũkũthithua nthĩgũrũne.—Tega Nteto Irĩa irĩ Mũthia, 22.