1, 2. (a) Elifasa bona Bildad ese Dirava ta hesiai heniamu karana be ede e herevalaia toma? (b) Edena dalai Iehova ese e hahedinaraia ita ta karamu ḡaudia na e lalodia badamu?

“TAU ta ese ḡau ta Dirava baine henia diba a? Aonega tauna ese sibona ena ḡau e gogomu. Siahu-idoinai Diravana na baine moale, emu kara maoromaoro dainai a? Eiava iena namo baine bada, emu dala idoinai asi kererena ta dainai a?” (Iobu 22:1-3) Nega ta henanadai unu bamodia haeredia o lalodia, a? Matamanai Elifasa, tau Teman ese unu henanadaina Iobu e henia neganai, e laloava haeredia na lasi. Ia bamona Bildad, tau Suhi, danu eto taunimanima ta na dia heḡereḡere Dirava vairanai baine kara maoromaoro.—Iobu 25:4 ba duahia.

² Unu hahegoada taudia koikoidia na e urava bae hahedinaraia Iehova ese ia ta badinaiamu karana na se laloa badamu, bona Dirava vairanai ita na vaitani uloulo eiava biluga na heto. (Iobu 4:19; 25:6) Reana baita laloamu Elifasa bona Bildad na manau karana e hahedinaraia. (Iobu 22:29) Bema ita na ororo ta dorina ai o peleini ta windoana amo baita roha dihomu, taunimanima ese e karamu ḡaukaradia na basita itadia dibamu. To, Iehova ese guba dorivana amo ita ese iena Basileia totona ta karamu ḡaukaradia be unu e lalodia tomamu, a?  Iehova ese Elifasa, Bildad bona Sofara na edia hereva koikoi dainai e gwau henidia, to Iobu be e gwauraia ena “hesiai tauna,” unu amo e hahedinaraia ia ese ita ta karamu ḡaudia na e lalodia badamu. (Iobu 42:7, 8) Una dainai, baita gwau dibamu “tau ta ese ḡau ta Dirava baine henia diba.”

3. Elihu ese Iehova ta hesiai heniamu karana be ede e herevalaia toma, bona ena hereva anina be dahaka?

³ Elihu na ina henanadai e heni neganai Iehova ese na se sisiba henia, ia na eto: “Boma kara maoromaoro, dahaka [Dirava] ba henia? Eiava dahaka oi imamu amo baine abia?” (Iobu 35:7) Elihu ena hereva anina be eda hekwarahi Dirava ena hesiai ḡaukara ai be asi anina, a? Lasi. Iena hereva anina na Iehova na ta enai se tabekaumu. Ia na heḡereḡere vaitani. Ita ese ia na basita hataḡaia diba eiava basita hagoadaia dibamu. To, ta karamu kara namodia, diba, bona goada na Dirava ena amo, bona unu ta ḡaukaralaidiamu daladia na e lalo badamu.

4. Iehova ese ma haida ta bogadia hisimu karadia be ede e lalodia tomamu?

⁴ Iehova ena hesiai taudia ta lalokau henidiamu neganai, ienai una na vaitani Ia ta lalokau heniamu. Hereva Lada-isidia 19:17 na e gwaumu: “Ogoḡami taudia e bogadia hisimu tauna ese Iehova enai e henitorehaimu; Iehova ese ena kara davana do baine henia.” Una siri anina be Iehova ese ogoḡami taudia ta kara namo henidiamu karadia iboudiai be e lalodia badamu, a? Eiava baita gwau dibamu, ḡau iboudiai ihavaradia Diravana ese eda hebogahisi karadia be abitorehai heḡereḡerena e lalodiamu, bona hahenamo namodia amo unu abitorehai davadia e haloumu, a? Oibe, bona una na Ia Natuna vara-edeana ese e hamomokania.—Luka 14:13, 14 ba duahi.

5. Hari ededia henanadai baita herevalaimu?

⁵ Iehova ese peroveta tauna Isaia e boiria Iena hereva baine gwaurai, una ese e hahedinaraia Ia ese abidadama taudia e ḡaukaralaidiamu ena ura ihaḡuḡuruna totona. (Isa. 6:8-10) Isaia na mai ena ura ida una boiboi herevana e abia dae. Hari ina negai, momo na ina hereva, “Lau o ina, a siagu,” e badinaiamu dainai Iehova ena hesiai ḡaukara e karamu. To, reana ta na be henanadaimu: ‘Egu hekwarahi be mai anina, a? Iehova ena hebogahisi dainai ena hesiai ḡaukara na karaiamu neganai, Ia ese ena Hereva ihaḡuḡuruna totona lau be durugu dibamu, a?’ Debora bona Barak edia nega ai e vara ḡaudia ese unu henanadai be haerelaimu.

6. Israel taudia bona Iabin ena tuari oreana edia idau be dahaka?

⁶ Israel taudia na laḡani 20 lalodiai Kanaan Pavapavana Iabin ese “e hahisidia bada.” Hanua taudia na e gariva bae loaloa. Tuari taudia edia roharoha ai, Israel taudia na asi tuari dibadia, asi edia tuari kohu badadia eiava asi edia hekou ḡaudia namodia, to Iabin ena tuari taudia edia tuari kariotadia be 900 bona mai auridia.—Hahe. 4:1-3, 13; 5:6-8. *

7, 8. (a) Iehova ese Barak be dahaka haheḡani e henia? (b) Israel taudia ese Iabin ena tuari oreana be ede e hadarerea toma? (Rau 28 ai laulau ba itaia.)

⁷ To, Iehova ese peroveta hahinena Debora ena amo Barak e haḡania, eto: “Aola, emu tuari oreana na Taboro ororona ai ba haboudia: gerebu-ta bavabidia Napatali iduhuna amo bona Sebulun iduhuna amo. Bena lau ese Sisera, Iabin ena  tuari oreana biaguna, mai ena kariota bona ena tuari taudia ida, baina koia, Kison sinavaina isena ai baine vasi; bona oi imamu ai baina atoa.”—Hahe. 4:4-7.

⁸ Hereva e lasi. Bena ura kwalimu taudia iboudiai na Taboro ororona ai e hebou. Barak na maoromaoro Iehova ena hahediba herevadia iboudiai e badina. (Hahemaoro Taudia 4:14-16 ba duahi.) Taanak ai e tuariva ai, medu-barokona e diho bona gabu ibounai e hakopukopua. Barak ese Sisera ena tuari oreana e hahavadia ela bona Haroset-ha-goim ai, una na 24 kilomita heḡereḡerena. Dala ai Sisera na ena kariota e rakatania bona Sanamim e heau lao, una na reana Kede hanuana badinai. Unuseni ai ia na Iaele, Hebere tau Kene adavana, ena kalaḡa ela, bona Iaele ese e abia dae. Sisera na e hesiku dainai, e mahuta mase. Bena Iaele na mai lalo goadana ida Sisera e hamasea. (Hahe. 4:17-21) Israel inaina vada e darere vaitani! *

9. Hahemaoro Taudia 5:20, 21 ese Sisera ituari henina karana be ede e herevalaia toma?

⁹ Hahemaoro Taudia karoa 4 bona 5 baita stadilaidia hebou na namo, badina karoa ta ai e herevalai sivaraidia na karoa ma ta ese na se herevalaia. Heḡereḡere, Hahemaoro Taudia 5:20, 21 na eto: “Hisiu na guba amo e tuari, edia guba daladia amo Sisera e tuari henia. Kison sinavaina ese e arudia lao.” Una anina be aneru ese e durudia, eiava speis amo nadi o auri momo e moru bena tuari taudia e hamasedia, a? Baibul ese una na se herevalaia. To momokani Dirava ese nega korikori ai bona gabu maorona ai medu barokona e hadihoa dainai unu tuari kariotadia 900 na e hepuni. Hahemaoro Taudia 4:14, 15 ai nega toi Iehova e kwalimu herevana e gwauraia. Unu Israel taudia 10,000 na ta basine gwa diba idia sibodia edia goada amo e kwalimu.

10, 11. “Meroso” be dahaka, bona dahaka dainai e uduguiraia?

¹⁰ To, Israel taudia na e kwalimu neganai, Debora bona Barak ese Iehova ihanamona anena e abia, eto: “Iehova ena aneru e tomamu, Meroso ba uduguiraia, Meroso taudia ba uduguiraidia bada; badina be Iehova iduruna asiema, goada taudia bogaraḡidiai Iehova iduruna asiema.”—Hahe. 5:23.

¹¹ Meroso na e uduguiraia bada dainai, ita na asi dibada ia be dahaka. Reana ia na hanua ta bona una hanua taudia na asie ura bae heduru. Eiava reana Sisera na una hanua ai e heau vareai bona hanua taudia ese ia na asie ḡuia. Edena dalai idia na Iehova ena boiboi asie kamonai? Idia badidia hanuadia amo taunimanima 10 tausen na una tuari totona e hebou. Mani a laloa, Meroso taudia ese una tuari tauna badana e itaia edia hanua ai e heau vareai bona heduru e tahuva. Una na nega namona Iehova ena ura bema karaia bena Iena amo hahenamo bema abi. To, una negai idia na ḡau ta asie karaia. Idia edia kara na Iaele ena lalo goada karana amo na idau, una na gabe sirina ese be hahedinaraiamu.—Hahe. 5:24-27.

12. Hahemaoro Taudia 5:9, 10 ai taunimanima edia kara ena idau be ede e herevalaia toma, bona hari edena dalai una ese ita e durudamu?

¹² Hahemaoro Taudia 5:9, 10 ai, Barak ida e ela taudia bona asie ura baela taudia edia  idau e hahedinarai. Debora bona Barak ese “Israel oreadia e hakaudia” taudia e hanamodia, badina “Israel taudia bogaraḡidia amo e raka lasi mai ura-kwalimudia ida.” Idia na ‘doniki kurokurodia ai e gui’ hekokoroku taudia, bona ‘geda udunadia ai e helai taudia,’ eiava taḡa maurina e ura heniava taudia amo na idau! Unu taḡa maurina e ura heniava taudia na asie ura bae hekwarahi, to Barak ida ‘dala ai e raka taudia’ na mai edia ura kwalimu ida Taboro ororona bona Kison kourana ela bae tuari totona. Una dainai idia na e haḡanidia una kara bae haeroa! Oibe, idia ese Iehova ena ura asie badinaia karana bae laloa dobu na namo. Hari ina negai, asie uramu Dirava ena hesiai ḡaukara bae habadaia taudia ese una kara bae haeroa na ḡau badana.

13. Edena dala ai Ruben, Dan, bona Asere iduhudia edia kara na Sebulun bona Napatali edia kara amo na idau?

¹³ Tuari ela ura kwalimu taudia na Iehova ese ena lohia siahuna e hahedinarai dalana na e itaia. Idia ese ‘Iehova ena kara maoromaoro’ sivaraidia e herevalai neganai, e ita ḡaudia danu e herevalaiva. (Hahe. 5:11) To, Hahemaoro Taudia 5:15-17 ese e hahedinaraia Ruben, Dan, bona Asere iduhudia ese edia kohu, heḡereḡere edia mamoe, laḡatoi, bona wofu na e lalo bada, a Iehova ena ḡaukara na asie laloa bada. To, Sebulun bona Napatali taudia ese Debora bona Barak bae durudia totona “edia mauri inegena asie gari.” (Hahe. 5:18) Unu tame herevalaidia taudia edia kara ena idau amo mai anina bada ḡauna ta tame diba.

14. Hari ina negai edena dalai baita hahedinaraia Iehova ena lohia dalana na ta duruamu?

¹⁴ Hari ina negai, ita na dia tuari korikorina ta ai ta tuarimu, to baita haroro goadagoada amo eda lalo goada karana baita hahedinaraia. Hari Iehova ena orea ai volantia taudia  momo e ura henidiamu, dia guna heḡereḡerena. Tadikaka, taihu bona memero kekeni milion momo na mai edia ura ida sibodia e henimu, ful-taim hesiai ḡaukara idauidau heḡereḡere painia, Betele, Kingdom Hall konstraksen, bona hebouhebou ai bae heduru helaoreana. Bona danu, elda momo ese ini maduna badadia, heḡereḡere Hospital Liaison Committee ḡaukaradia bona hebouhebou iheḡaeḡaelaidia ḡaukaradia e karamu. Namona na ba diba, Iehova ese mai emu ura ida iena ura o karaiamu karana na e laloa badamu, bona basine laloa boiomu.—Heb. 6:10.

15. Edena dala ai baita diba bema eda ura Iehova ena ḡaukara ai na e maraḡimu?

¹⁵ Namona na siboda baita henanadai: ‘Lau be na uramu haida ese ḡaukara kahana badana bae karaia, a? Kohu bona moni momo iabidia karana ese egu hesiai ḡaukara ihabadana karana e kouamu, a? Lau be Barak, Debora, Iaele, bona ura kwalimu taudia 10,000 heḡereḡeredia, mai egu abidadama bona lalo goada ida, egu noho dalana heḡereḡerena ai Iehova ena haheḡani na badinaiamu, a? Bema na uramu tano idauna ta ai moni ḡaukarana baina karaia, lau ese egu ruma bese bona kongrigeisen ediai baine vara ḡauna na lalohadailaiamu bona na ḡuriḡurilaiamu, a?’ *

16. Iehova be dahaka baita henia diba?

¹⁶ Iehova ena lohia siahuna iabi isina ḡaukarana ai e ḡaukaralaidamu karana ese e hahedinaraiamu ia ese ita na e laloda badamu. Diabolo ese tau bona hahine ginigunadia e koidia bena ena lohia dalana e durua dainai, bema ita ese Iehova ena lohia dalana baita badinaiamu, baita hahedinaraiamu Iehova na ta lalokau heniamu bona Satana na ta dadaraiamu. Dirava o abidadama heniamu bona o badinaiamu dainai sibomu o henimu karana na Iehova ese e moalelaiamu. (Her. 23:15, 16) Dirava ese ia o badinaiamu karana amo Satana ena koikoi herevana e haerelaiamu. (Her. 27:11) Una dainai, Iehova o badinaiamu karana na dava bada ḡauna ienai, bona una na e moalelaia badamu.

17. Hahemaoro Taudia 5:31 ese vaira negana be ede e herevalaia toma?

¹⁷ Kahirakahira Iehova ena lohia siahuna e uramu bae badinaia taudia ese tanobada be noholaiamu. Ita na una nega ta nariamu! Debora bona Barak heḡereḡeredia, ane baita abi baitato: “Iehova e, inaimu idoinai unu bae mase toma! A e ura henimumu taudia na dina heḡereḡerena bae tata dae roha.” (Hahe. 5:31) Iehova ese Satana ena tanobada dikana be haoreamu neganai, una hereva anina na be varamu. Aramagedono tuarina baine matama neganai, Dirava ena ura ikarana totona sibodia e heni taudia na basine ḡaukaralaidiamu inai taudia bae hadadaredia. To, una nega ai ita na gabudai baita ginimu, ‘bena Iehova ena kwalimu ita daidai’ baita itaiamu. (2 Sis. 20:17) To una do se vara ai, namona na mai eda lalo goada bona ura bada ida Iehova ena lohia siahuna na dala idauidau ai baita badinaia.

18. Sibomu ba heni karana ese haida be ede baine durudia toma?

¹⁸ Taunimanima na “e raka mai ura-kwalimudia ida dainai, Iehova ba hanamoa!” Debora bona Barak ese una kwalimu anena amo Herea Mikamika Diravana e hanamoa, dia taunimanima o aneru. (Hahe. 5:1, 2) Hari ina negai danu, namona na Dirava ena hesiai ḡaukara ihabadana totona sibomu ba heni, unu amo ma haida ba durudia ‘Iehova bae hanamoa!’