Dictionary momo ai “ta sibona baine karaia gwauhamatana (oath) na e gwauraia ta na mai ena momokani ida taunimanima vairadiai, Dirava ladana ai e gwauraiamu gwauhamatana.” Una gwauhamata na bae gwauraia eiava bae torea diba.

Reana haida na be lalomu ta sibona baine karaia gwauhamatana na kerere badina Iesu na e gwa: “Basio gwauhamata . . . Emu hereva ba gwaurai: ‘Oibe,’ oibe, bona ‘Lasi,’ lasi. Ini e hereamu herevana na tau dikana ena amo.” (Mat. 5:33-37) Iesu na mai dibana Mose ena Taravatu lalonai gwauhamata idauidau danu e gwauraidia bona Dirava ena abidadama hesiai taudia haida na Dirava ladanai gwauhamata haida e kara. (Gen. 14:22, 23; Eso. 22:10, 11) Bona mai dibana Iehova sibona danu gwauhamata haida e kara. (Heb. 6:13-17) Una dainai ta dibamu Iesu ena hereva anina na, dia se gwa basita gwauhamata. To, ia ese gwauhamata asi anidia basita kara na namo e herevalaia. Namona na baita diba ta karamu gwauhamatadia na hehelaḡa bona baita haḡuḡurudia na mai anina bada. Baita gwaurai ḡaudia na baita hamomokanidia.

Una dainai, dahaka ba kara na namo bema Dirava ladanai gwauhamata ta bo karaiamu? Ḡau ginigunana na, emu gwauhamata heḡereḡerena ba kara. Bema o daradaramu gwauhamata ta ba karaia eiava lasi, namona na basio karaia. Dirava ena Hereva na e gwa: “Basioma gwau hamata be namo, a ba gwau hamata bena anina basio karaia na dika.” (Koh. 5:5) Bena ba lalo, bo karaiamu gwauhamatana ese Baibul ena hahekau herevadia be utumu eiava, bena lalomu mamina heḡereḡerena ba kara. Ba badina Baibul ena hahekau herevadia haida be dahaka?

Gwauhamata haida na Dirava ena ura heḡereḡerena. Heḡereḡere, Iehova ena Witnes taudia na e headavamu neganai e gwauhamata hehenimu. Headava neganai e gwauraimu herevadia na ta sibona ese e karaiamu gwauhamatana heḡereḡerena. Headava tauna bona hahinena na Dirava bona taunimanima vairadiai e gwauhamatamu, “edia mauri dinadia iboudiai lalodiai” bae helalokau heheni, bae heura-heheni, bona bae hemataurai heheni. (Headava taudia haida ese edia headava gwauhamatana ai dia unu hereva iboudiai e gwauraimu, to sibodia edia gwauhamata herevadia na Dirava vairanai e gwauraimu.) Bena headava e hakauamu tauna ese e gwauraidiamu headava tauna bona hahinena, bona edia headava na baine mia ela bona edia mauri dinadia iboudiai lalodiai. (Gen. 2:24; 1 Kor. 7:39) Una na maoro, bona Dirava ena ura heḡereḡerena.

Ta sibona ese baine kara gwauhamatadia haida na dia Dirava ena ura heḡereḡerena. Kristen tauna korikorina na basine gwauhamatamu, ena hanua dainai baine tuari eiava baine gwauhamata ena abidadama Dirava enai baine negea. Unu  be kara tomamu neganai, Dirava ena haheḡani be utuamu. Kristen taudia na “dia tanobada ena,” dainai tanobada taudia edia hepapahuahu eiava edia heiriheiri lalodiai na basita vareai.​—Ioa. 15:19; Isa. 2:4; Iak. 1:27.

Ta sibona ese baine kara gwauhamatadia haida na lalomamina heḡereḡerena ai e karamu. Nega haida, gwauhamata ta do asita karaia neganai, Iesu ena sisiba danu baita laloa “Kaisara ena, Kaisara ba henia; Dirava ena, Dirava ba henia.”​—Luka 20:25.

Heḡereḡere, Kristen tauna ta na citizen eiava passport totona e apply to e hadibaia hanua baine badinaia totona gwauhamata ta baine karaia guna. Bema una hanua ai gwauhamata baine karaia neganai Dirava ena taravatu ta baine utua, lalona mamina heḡereḡerena una gwauhamata na basine karaiamu. To gavamani ese gwaumaoro baine henia diba, baine gwaurai gwauhamata herevadia baine haidau diba, unu amo lalona mamina na basine hadikaia.

E haidaua gwauhamatana be gwauraiamu neganai, ia ese Roma 13:1 ena hahekau herevana be badinaiamu, e gwa: “Taunimanima iboudiai ese lohia bae matauraidia.” Una dainai baine gwa diba Dirava ena taravatu na se utua badina una na Dirava ese Kristen tauna e haḡania baine karaia ḡauna.

Danu laloda mamina heḡereḡerena baita kara diba bema gwauhamata ta ta karaiamu neganai ḡau ta baita ḡaukaralaia eiava kara ta baita karaia. Idaunegai Roma taudia bona Skute taudia e gwauhamatava neganai edia dare e dogodiataova, unu amo e hahedinaraiava edia gwauhamata na bae abia dae diba badina tuari diravana ladana ai e gwauhamatava dainai. Grik taudia be e gwauhamatava neganai imadia ta na e abi isiva. Idia na e laloava siahu diravana ta ese e gwauraiva ḡaudia, e karava ḡaudia bona unu gwauhamata e karava taudia na e itava.

Mai dibada Iehova ena hesiai tauna ta ese tomadiho koikoi ḡauna ta na basine ḡaukaralaiamu ena gwauhamata baine karaia totona. To bema oi na kota lalonai, bae hamaoromu Baibul ai ba daukau bena ba gwauhamata hereva momokani mo ba gwaurai, be ede bamona? Bema una e varamu, reana una ba karaia diba, badina Baibul ese e hahedinaraiamu abidadama taudia na ḡau haida e kara edia gwauhamata e gwaurai neganai. (Gen. 24:2, 3, 9; 47:29-31) To namona na ba helalotao bema gwauhamata unu bamodia o karamu, oi na Dirava vairanai o gwauhamatamu dainai hereva momokani mo ba gwaurai na mai anina bada. Namona na ba heḡaeḡae bae henimu henanadaidia iboudiai na mai momokanimu ida ba haerelai.

Ita ese eda hetura karana Iehova ida na ta laloa badamu dainai, namona na bae noida baita kara gwauhamatadia na baita lalodia namonamo bona baita ḡuriḡurilaidia, unu amo laloda mamina basita hadikaia eiava Baibul ena hahekau herevadia basita utudia. Bema lalomu o hadaiamu gwauhamata ta ba karaia, namona na ba hamomokania.​—1 Pet. 2:12.