Una baine vara neganai, tau na de headava lou dainai kongrigeisin ese headava gunana na bae laloa de doko bona bae abia dae ina headava matamatana na maoro. Unu ta gwau tomamu badina baita lalopararalaia totona, namona na Iesu ese hekoho bona headava lou karana e herevalaiamu dalana aita laloa.

Mataio 19:9 ai e hetore heḡereḡerena, Iesu ese headava baine doko badina maorona e gwauraia. Ia na e gwa: “Adavana se heuda hanai to baine hadihoa bona hahine ta ma baine adavaia tauna na heuda-hanai tauna.” Iesu ena hereva amo, ta dibamu (1) heuda-hanai karana na Baibul ese e gwauraia headava baine doko badina maorona bona (2) bema tau ta na dia Baibul ese e gwauraia badina dainai adavana baine rakatania bena hahine ma ta baine adavaia, ia na de heuda-hanai. a

Iesu ena hereva anina be bema tau ta na baine heuda-hanai bona adavana baine kohoa, Baibul ese ia baine headava lou karana be se taravatuamu, a? Lasi. Headava lalonai heuda-hanai e varamu neganai, se kerere tauna ese baine abia hidi adavana baine gwauatao eiava lasi. Bema hahine ese tau basine gwauatao bona taravatu heḡereḡerena bae hekoho, edia hekoho dalana baine maoro murinai idia ta ta na mai edia maoro bae headava lou diba.

To danu, reana se kerere tauna na mai kudouna idoinai ida be uramu ena headava baine hesiriu, una dainai mai ena ura ida adavana ena dika na be gwauataomu. To bema heuda-hanai tauna ese adavana ena ura basine abia dae bona sibona ese edia heavada ikohona dalana baine karaia, be ede bamona? Hahine na e uramu adavana ena dika baine gwauatao bona edia headava na dounu bae hesiriu dainai, Baibul ena hereva heḡereḡerena tau baine headava lou na kerere. Bema baine ura dika bona dia Baibul ena dala heḡereḡerenai ma ta baine adavaia, ia na da ma e heuda-hanai lou, badina Baibul ese e hahedinaraia ia baine headava lou na kerere, una dainai kongrigeisin ena hahemaoro komiti ese una kaha na bae hetahulaia.​—1 Kor. 5:1, 2; 6:9, 10.

Bema tau ta na Baibul ena taravatu heḡereḡerena baine headava lou na kerere, kongrigeisin taudia ese ena headava gunana bona headava matamatana be ede bae laloa toma? Baibul ena taravatu heḡereḡerena headava gunana be dounu mia, eiava? Se kerere tauna ese adavana gunana ena dika dounu baine gwauatao eiava dounu baine dadaraia diba, a? Headava matamatana be bae laloa heuda-hanai karana, a?

Guna ta laloava, bema se kerere tauna na do mauri, do se headava lou, bona se heuda-hanai, kongrigeisin ese una headava iharuana na bae laloa heuda-hanai karana. To, Iesu ese headava ikohona bona headava lou karana e herevalaia neganai, ia ese se kerere tauna na se herevalaia. To, e gwa bema ta na dia Baibul ena  hereva heḡereḡerena ai ena headava baine hadokoa bena ma baine headava lou, ia na de heuda-hanai. Una baine vara neganai, una hekoho bona headava lou karana, Iesu ese e gwauraia heuda-hanai karana, ese headava ginigunana na de hadokoa.

Hekoho bona headava lou karana ese headava ginigunana baine hadokoa neganai, asi ena kerere tauna ese adavana gunana baine gwauatao eiava baine dadaraia na asi anina. Una dainai, ia ese una abia hidi aukana adavana gunana baine gwauatao eiava baine dadaraia karana na da basine karaia. Bona kongrigeisin na basie nari ela bona se kerere tauna baine mase, baine headava lou, eiava bema baine heuda-hanai neganai una headava matamatana bae abia dae. b

Ataiai tame herevalaia haheitalaina ai, tau na e heuda-hanai dainai edia headava na e hadokoa. To bema tau na basine heuda-hanai to adavana baine kohoa bona ma baine headava lou, be ede bamona? Eiava bema tau na adavana ida bae hekoho murinai, baine heuda-hanai bena baine headava lou una negai adavana gunana ese ena dika baine gwauatao, be ede bamona? Unu iboudiai lalodiai, Baibul ena hereva heḡereḡerena hekoho bona headava lou karana na heuda-hanai karana dainai, headava gunana na de doko. Taravatu heḡereḡerena headava matamatana na da maoro. Una na The Watchtower November 15, 1979, rau 32 ena hereva heḡereḡerena, “hari tau na da headava matamatana e karaia dainai ia ese una headava na basine hadokoa bona adavana gunana na ma basine lou henia; headava gunana na hekoho, heuda-hanai bona headava lou karana ese de hadokoa.”

Ina laloparara matamatana ese headava ena helaḡa karana na se hamaraḡiamu eiava heuda-hanai ena dika na se hamaraḡiamu. Bema tau ta na dia Baibul ese e gwauraia badina dainai adavana baine kohoa bona ma baine headava lou neganai, ia na hahemaoro komiti ese heuda-hanai dainai bae hahemaoro henia diba. (Bema baine adavaia hahinena na Kristen taihu ta, ia danu heuda-hanai dainai hahemaoro komiti ese bae hahemaoro henia.) Ena be una headava matamatana taudia na basita gwauraidiamu e heuda-hanaimu, una tau na laḡani momo lalodiai kongrigeisin ai hesiai ḡaukara ena hahenamo na basine abia ela bona ia harina ma baine namo lou. Anina na elda ese hahine ginigunana bona natuna maraḡidia edia noho dalana bae haeroa guna, una murinai hesiai ḡaukara ena hahenamo na e kerere tauna bae henia diba.​—Mal. 2:14-16.

Headava baine doko bona headava lou karana basie laloa maraḡi totona, namona na Kristen taudia ese headava karana na Iehova ese e laloamu heḡereḡerena bae laloa, ia na ḡau helaḡana.​—Koh. 5:4, 5; Heb. 13:4.