Mataio bukana ese Iesu ena vara bona ena mauri ai e vara ḡaudia e sivarailai dalana na Luka bukana amo idau, badina unu Evanelia bukadia e tore taudia na e ita ḡaudia heḡereḡerediai sivarai e tore.

Mataio bukana ese Iosef enai e vara ḡaudia e sivarailai. Una buka ai e hahedinaraia, Iosef na Maria e rogorogo neganai e daradara, to ena nihi ai aneru ta ese e vara ḡauna na ienai e herevalaia, bona Iosef ese una na e abia dae. (Mat. 1:19-25) Mataio ese ma e hahedinaraia, Iosef na ena nihi ai aneru ta ese e hamaoroa ena ruma bese ida Aigupto baela, danu iena nihi ai aneru ese e hamaoroa Israel tanona baine lou lao, bona Iosef na abi hidi e kara ena ruma bese ida Nasaret ai bae noho. (Mat. 2:13, 14, 19-23) Mataio ena Evanelia ena karoa ginigunadia ai, Iosef ladana na nega 8 e hedinarai, to Maria ladana be nega 4 mo e hedinarai.

To, Luka bukana ese Maria e sivarailaia momo. Una buka ai, aneru Gabriel ese Maria e vadivadia, Maria ese varavarana Elisabeta e vadivadia, bona Iehova e imodaia karana e herevalai. (Luka 1:26-56) Danu, Simeon ese Maria enai Iesu baine davari hisihisidia e gwaurai herevadia na Luka ese e tore. Danu Maria bona ena ruma bese na Iesu laḡanina 12 neganai dubu helaḡa ela, bona Luka ese dia Iosef to Maria ena hereva e tore. Luka na ma e gwa, Maria na una negai e vara ḡaudia daidiai e lalohekwarahi. (Luka 2:19, 34, 35, 48, 51) Luka ena Evanelia ena karoa ginigunadia rua ai, Maria ladana na nega 12 e hedinarai, to Iosef ladana be nega toi mo e hedinarai. Una dainai, Mataio ese Iosef e lalova bona e karava ḡaudia e herevalai, to Luka ese Maria ena maduna bona enai e vara ḡaudia e herevalai.

Danu, unu Evanelia bukadia e tore taudia raruosi ese Iesu ena bese ladadia e herevalai daladia na i’idau. Mataio ese Iosef tubuna e herevalaia bona e hahedinaraia Iesu, Iosef ena heubu, na taravatu heḡereḡerena David ena king dagina baine abia. Dahaka dainai? Badina Iosef na King David tubuna ta, ia na David natuna Solomon ena iduhu amo e vara. (Mat. 1:6, 16) To, Luka ese Maria tubuna e herevalaia bona e hahedinaraia Iesu na mai ena maoro David ena king dagina baine abia badina ia na “David garana amo e vara.” (Roma 1:3) Dahaka dainai? Badina Maria na King David tubuna ta, ia na David natuna Natan ena iduhu amo e vara. (Luka 3:31) To dahaka dainai Luka ese bese ladadia e tore neganai, Maria na se gwauraia Heli natuna? Badina Baibul negadiai bese ladadia e toreva neganai tatau mo ladadia e toreva. Una dainai, Luka ese Iosef ladana e torea bona e gwauraia Heli natuna neganai, una anina na Iosef na Heli ravana.​—Luka 3:23.

Mataio bona Luka ese bese ladadia e toredia karana amo e hahedinaraia Iesu na e perovetalaia Mesiana. Danu, Baibul negadiai e nohova taudia ese Iesu ena bese na mai dibadia namonamo, Farisea bona Sadukea taudia danu mai dibadia. Mataio bona Luka ese Iesu ena bese ladadia e gwaurai sivaraidia ese hari ina negai eda abidadama e hagoadaiamu bona ta dibamu Dirava ena gwauhamata iboudiai na bae ḡuḡuru.