1. Edena dala ai Iehova e kara ḡaudia ese ena hariharibada karana e hahedinaraia?

ENA be Iehova na ḡau iboudiai do se karadia neganai sibona e nohova, to sibona ena namo na se laloa. To, ia ese aneru bona taunimanima na mauri e henidia. “Moale Diravana,” Iehova, na e uramu ḡau namodia baine heni. (1 Tim. 1:11, NWT; Iak. 1:17) Danu, ia na e uramu baita moale dainai, e hadibadamu hariharibada karana baita hahedinaraia.​—Roma 1:20.

2, 3. (a) Dahaka dainai hariharibada karana ese e hamoaledamu? (b) Dahaka baita herevalaimu?

² Dirava ese taunimanima na ia heida-idana e karadia. (Gen. 1:27) Anina na, ita e karada na ena kara namodia baita hahedinarai. Baita moale totona, namona na ma haida edia namo baita lalo bada bona hariharibada karana baita hahedinarai, unu amo Iehova ena haheitalai baita tohotohoa. (Fili. 2:3, 4; Iak. 1:5) Dahaka dainai? Badina Iehova ese ita e karada na unu kara baita hahedinarai. Ena be ita na dia ḡoevadae tauda, to Iehova ena hariharibada karana baita tohotohoa diba.

 ³ Baibul ese hariharibada karana baita hahedinaraia dalana e hadibadalaida. Mani e hadibada ḡaudia haida aita lalodia lou. Baita itaiamu edena dala ai hariharibada karana amo Dirava ena lalonamo baita abia, bona edena dala ai una kara ese baine duruda Dirava ese e henida ḡaukarana baita haḡuḡurua. Danu, baita itaiamu edena dala ai hariharibada karana ese moale e havaraiamu bona dahaka dainai hanaihanai una kara baita hahedinaraia na namo.

4, 5. Iehova bona Iesu ese hariharibada karana be ede e hahedinaraia toma?

⁴ Iehova na e uramu taunimanima ese ia bae tohotohoa, una dainai hariharibada karana ta hahedinaraiamu neganai, ia na e moalemu. (Efe. 5:1) Dirava ese e karada dalana bona tanobada bona lalona ḡaudia mai hairaidia ese e hahedinarai ḡoevaḡoevamu, ia na e uramu taunimanima na bae moale. (Sal. 104:24; 139:13-16) Una dainai, ma haida ihamoaledia totona ta ḡaukara goadamu neganai, Ia ta hanamoamu.

⁵ Kristen momokanidia ese Keriso e tohotohoamu, ia ese hariharibada karana baita hahedinaraia diba dalana e haheitalaia ḡoevaḡoeva. Iesu na eto: “Taunimanima Natuna ema na . . . dia haida ese ia isiaina bae lao heni totona, a ia hari idia isiaidia baine lao heni, bona ena mauri baine henia, hutuma baine hamauridia helaoreana.” (Mat. 20:28) Una dainai, aposetolo Paulo ese Kristen taudia e haḡanidia: “Keriso Iesu lalonai e miava darana umui lalomui ai danu baine mia. Ia ese sibona e hekaruhia hebubu, hesiai merona anitarana e abia.” (Fili. 2:5, 7) Siboda baita henanadai, ‘Keriso baina tohotohoa namonamo diba, a?’​—1 Petro 2:21 ba duahia.

6. Iesu ese Samaria tauna parabolena amo dahaka e hadibada? (Rau 18 ai laulau ba itaia.)

⁶ Iehova ena lalonamo na baita abia dibamu, bema Ia bona Iesu edia haheitalai namodia baita tohotohomu, ma haida edia namo baita lalo badamu, bona dala idauidau ai baita durudiamu. Momokani, Samaria tauna parabolena amo Iesu ese e hahedinaraia ia na e ura ena hahediba ese ma haida bae durudia, ena be edia mauri daladia na idauidau. (Luka 10:29-37 ba duahi.) Iesu na henanadai ta dainai Samaria tauna ena parabole e herevalaia. Iuda tauna ta ese e nanadaia: “Lau dekegu tauna be daika?” Iesu ena haere ese e hahedinaraia, bema ta uramu Dirava ena lalonamo baita abia, namona na mai eda ura ida hariharibada karana baita hahedinaraia, una Samaria tauna heḡereḡerena.

7. Edena dala ai baita hahedinaraia ita na ta abia daemu Dirava ena dala ibadinadia karana na dala hereadaena?

⁷ Badi momo daidiai Kristen taudia ese hariharibada karana bae hahedinaraia. Heḡereḡere, una kara na mai anina bada Satana ese Eden imeana ai e havaraia hepapahuahuna ai. Edena dala ai? Satana na eto bema Adam bona Heva​—bona taunimanima iboudiai​—⁠na sibodia edia ura bae lalo bada bona Dirava basie kamonai henia, bae moale diba. Heva na sibona ena namo e laloa bada dainai, e ura Dirava ida baine heḡereḡere. Adam danu sibona ena namo e laloa dainai e ura Heva baine hamoalea. (Gen. 3:4-6) E kara abi hididia ese dika e havaraia. Sibona ena namo e laloa badamu tauna na se moalemu. Hariharibada karana amo baita hahedinaraiamu, ita na ta abia daemu Dirava ena dala ibadinadia karana na dala hereadaena.

8. Dahaka dainai Adam bona Heva ese ma haida edia namo bema lalo bada?

⁸ Dirava ese Adam bona Heva na hahekau  herevadia haida e henidia, unu amo idia ese ma haida edia namo bae lalo bada, ena be Eden imeana ai sibodia e nohova. Iehova ese e hanamodia bona e hamaorodia besedia bae havara, tanobada bae hahonua, bona bae biagua. (Gen. 1:28) Ḡau iboudiai Ihavaradia Tauna ese taunimanima edia namo na e lalo badava, una heḡereḡerena, Adam bona Heva ese bae havaradia besedia edia namo bae lalo bada na namo. Tanobada ibounai na paradaiso ai bae halaoa Adam garana ese namo bae davaria totona. Una ḡaukara badana bae karaia totona bae ḡaukara hebou na namo.

⁹ Ḡoevadae taudia ese Paradaiso bae habadaia bona Iehova ena ura bae haḡuḡurua totona, Ia ida bae ḡaukara hebou na namo, unu amo ena laḡa-ani ai bae raka vareai. (Heb. 4:11) Una ḡaukara bae karaia ena moale bona hahenamo mani a laloa! Ma haida idurudia totona sibodia bae heni neganai, hahenamo momo bae davari bona bae moale.

10, 11. Edena dala ai haroro bona hahediba ihalaodia haheḡanina baita haḡuḡurua?

¹⁰ Hari ina negai, Iehova ese ena taunimanima na haroro bona hahediba ḡaukarana e henidia. Unu ḡaukara baita haḡuḡuru totona, mai momokanida ida ma haida edia namo baita lalo bada. Una ḡaukara ai baita haheauka diba bema lalohadai maorona baita abia​—⁠una na Dirava bona dekeda taudia baita lalokau henidia.

¹¹ Aposetolo edia negai, Paulo na eto ia bona Kristen taudia ma haida na ‘Dirava ida e ḡaukara hebouva,’ badina Basileia ena hereva momokani uhena ihadona bona idairina ḡaukarana e karaiava. (1 Kor. 3:6, 9) Hari ina negai, ita danu haroro ḡaukara iduruna totona eda nega, kohu, bona goada ta henimu karana amo ‘Dirava ida ta ḡaukara heboumu.’ Una na hahenamo badana!

12, 13. Hahediba taudia ihalaodia ḡaukarana ena hahenamo be ede bo gwaurai tomamu?

¹² Haroro bona hahediba ḡaukarana ai eda nega bona goada baita ḡaukaralai karana ese moale bada e havaraiamu. Baibul stadi namodia e karamu taudia momo na e gwaumu una ḡaukara na e moalelaiamu. Eda stadi taudia ese hereva momokani e lalopararalaiamu, edia abidadama e habadaiamu, edia mauri e haidaumu, bona ma haida ediai una hereva momokani e herevalaiamu karana ta itaiamu neganai ta moale dikadikamu. Iesu danu e moale dikadika badina e siaidia hahediba 70 na anina namona e havaraia dainai “mai moaledia ida” e lou.​—⁠Luka 10:17-21.

¹³ Tanobada heḡeḡemadai pablisa na e moalemu badina e itaiamu sivarai namona ese taunimanima edia mauri e hanamoamu. Mani Anna, singul taihuna ta, ena sivarai aita laloa, ia na ena hesiai ḡaukara ihabadana totona pablisa dia momo gabuna ta ela, Eastern Europe ai. * Anna na eto: “Iniseniai Baibul stadi momo herea na karadiamu,  bona una na ura henia dikadikamu. Egu hesiai ḡaukara na na moalelaia badamu. Na loumu ruma neganai, asi egu nega sibogu egu ura ḡaudia baina lalodia totona. To na stadi henidiamu taudia edia hekwakwanai bona lalometau ḡaudia na lalodiamu. Dala na tahumu idia baina hagoadadia bona baina durudia totona. Bona na diba momokanimu ‘ḡau ihenina ena moale be bada, ḡau iabina ena moale be maraḡi.’”​—Kara 20:35, NWT.

14. Edena dala ai emu haroro ḡaukara ba moalelaia, ena be haida sibodia mo sivarai namona e kamonaiamu?

¹⁴ Moale baita davaria dibamu bema taunimanima baita durudiamu sivarai namona bae abia dae totona, ena be asie uramu bae kamonai. Hari ta abia haheḡanina na peroveta tauna Esekiel ena heḡereḡerena, ia na Iehova ese e hamaoroa: “Egu hereva ba hamaorolaidia, bena bae kamonai eiava kamonai basie ura.” (Ese. 2:7; Isa. 43:10) Ena be haida ese ta harorolaiamu sivaraina na basie abia dae, to Iehova ese eda hekwarahi na e laloa badamu. (Heberu 6:10 ba duahia.) Pablisa ta ese lalohadai maorona e hahedinaraia. Ia ese ena hesiai ḡaukara na ini e herevalaia toma: “Ta hadoamu, ta dairiamu, bona ta ḡuriḡurimu Iehova ese anina baine havaraia totona.”​—1 Kor. 3:6.

15. Taunimanima momo ese hariharibada karana be ede e laloa tomamu, bona edia kara ese bae kouda be namo, a?

¹⁵ Iesu na e uramu eda hariharibada karana amo moale baita davaria. Taunimanima momo ese hariharibada karana na e laloa badamu. Ia na eto: “Ba heni lao, bena bae henimui; hahetoho ḡauna bae hahonua, bae taoa kunu, bae pataia kunu, ela bona baine hepurai dobi, bena emui ai bae seia. Badina be o heni laomu hahetohona heḡereḡerena ma bae henimui.” (Luka 6:38) Momokani, taunimanima iboudiai ese eda hariharibada karana na asie laloamu, to una kara bae laloa neganai, idia danu una kara bae hahedinaraia diba. Una dainai hariharibada karana na ba hahedinaraia hanaihanai, ena be taunimanima ese bae laloa bada eiava lasi. Hariharibada karana tamona ese nega ta anina namona baine havaraia diba.

16. Dahaka dainai hariharibada karana baita hahedinaraia?

¹⁶ Hariharibada taudia na se lalomu e  henimu ḡaudia heḡereḡeredia bae abi. Iesu na eto: “Aniani ba dabaraia negana ai, ogoḡami taudia bona anina-doko taudia bona ae-hedairike taudia bona mata-kepulu taudia ba vavedia; unu amo vada ba namo, badina be idia na asi edia kohu bena basie hadavaia.” (Luka 14:13, 14) Baibul na eto: “Ani gaga-isi tauna na bae hanamoa.” Ma eto: “Ogoḡami taudia e lalodiamu tauna na namo [“e moalemu,” NWT].” (Her. 22:9; Sal. 41:1) Momokani, namona na baita heni badina ma haida baita durudiamu neganai baita moalemu.

17. Ededia dala haida ai hariharibada karana amo moale baita davaria?

¹⁷ Paulo ese Iesu ena hereva, “ḡau ihenina ena moale be bada, ḡau iabina ena moale be maraḡi,” e gwauraia neganai, ia ese dia kohu bona moni ihenina karana mo e herevalaia, to ma haida ihagoadadia, ihakaudia, bona idurudia karana danu e herevalaia. (Kara 20:31-35) Aposetolo Paulo ese ena hereva bona kara amo e hadibadamu siboda baita heni na namo, anina na eda nega bona goada baita ḡaukaralai, ma haida baita lalodia bada, bona lalokau baita hahedinaraia.

18. Toretore taudia momo ese hariharibada karana be ede e herevalaia toma?

¹⁸ Hetahu ḡaukarana e karaia taudia haida ese danu e davaria harihari karana ese taunimanima e hamoalediamu. Atikol ta na ini e gwau toma, “taunimanima na e gwaumu ma haida e kara namo henidiamu neganai e moale dikadikamu.” Hetahu ḡaukarana e karaia taudia haida na etomu, ma haida idurudia karana ese e hahedinaraiamu mauri na “mai anina bada” “badina taunimanima edia dabu ḡaudia e henimu.” Una dainai, diba bada taudia haida na e gwaumu, taunimanima ese ma haida idurudia ḡaukaradia e karamu unu amo basie gorere momo bona bae moale. Momokani, edia hereva daidiai basita daradara, badina Ihavarada Tauna lalokauna, Iehova, na vada eto hariharibada karana ese moale e havaraiamu.​—⁠2 Tim. 3:16, 17.

19, 20. Dahaka badi haida daidiai o uramu hariharibada karana ba hahedinaraia?

¹⁹ Sibodia edia namo e lalo badamu bona ma haida asie lalodia badamu taudia bogaraḡidiai ta nohomu neganai, hariharibada karana baita hahedinaraia hanaihanai na auka. To, Iesu ese e gwaurai haheḡani hereadaedia rua bini: Iehova baita lalokau henia mai laloda, laumada, darada, bona goadada idoinai ida, danu dekeda taudia baita lalokau henidia siboda ta helalokaumu heḡereḡerena. (Mar. 12:28-31) Ina atikol ai tame itaia heḡereḡerena, Iehova e lalokau heniamu taudia ese ia e tohotohoamu. Iehova bona Iesu ese hariharibada karana e hahedinaraiamu. Bona e hagoadadamu unu baita kara toma, badina una kara amo moale korikorina baita davaria. Bema baita ḡaukara goadamu Dirava bona dekeda taudia daidiai hariharibada karana baita hahedinaraiamu, ita ese Iehova baita hanamoamu bona ita siboda bona ma haida ese namo baita davarimu.

²⁰ Momokani, oi na vada o ḡaukara goadamu ma haida, tadikakamu danu, ba durudia totona. (Gal. 6:10) Hanaihanai unu bo kara tomamu neganai, taunimanima ese be lalokau henimumu bona be lalomu badamu, bona una ese be hamoalemumu. Hereva Lada-isidia 11:25 na e gwaumu: “Harihari-bada tauna na ena taḡa ma e badamu, bona e dairi-dairimu tauna na bae dairia.” Momokani, eda Kristen maurina bona hesiai ḡaukarana ai, hariharibada karana bona kara namodia baita hahedinarai diba, unu na mai hahenamodia. Atikol gabena ese unu dala be herevalaimu.