1. Iesu ese ena hahediba be edena haheḡani e henidia? (Rau 1 laulauna ba itaia.)

IESU do se mase hanuaboina ai, ia ese ena hahediba taudia na haheḡani ta e henidia. E hamaorodia, eto: “Lau ese na lalokau henimuimu heḡereḡerena, umui danu ba helalokau heheni.” Bena ma eto: “Unu amo taunimanima iboudiai bae diba umui na lauegu hahediba: ba helalokau heheni dainai.”​—Ioa. 13:34, 35.

2. Dahaka dainai baita helalokau heheni na mai anina bada?

² Iesu na e gwa bema iena hahediba taudia na lalokau bae hahedinaraia ia ese e hahedinaraia heḡereḡerena, taunimanima na bae diba idia na iena hahediba taudia. Kristen ginigunadia edia negai una hereva na e momokani, bona hari iseda negai danu. Una dainai, ena be hekwakwanai ta davarimu, to baita helalokau heheni na mai anina bada.

3. Ina atikol ai dahaka baita herevalaimu?

³ Ita na dia ḡoḡoevadadae dainai, edai na be aukamu lalokau baita hahedinaraia totona. To, namona na Keriso baita tohotohoa. Ina atikol ai, baita itaiamu edena dalai lalokau ese baine duruda baita maino, taunimanima oromadia basita lalo, bona heabi-dae karana baita hahedinaraia. Ina atikol o stadilaiamu neganai, sibomu ba henanadai: ‘Tadikaka taihu haida na hekwakwanai e davarimu to dounu e helalokau hehenimu, idia edia haheitalai amo dahaka na dibamu?’

4. Mataio 5:23, 24 heḡereḡerena, dahaka dainai e badu henidamu tadikakana eiava taihuna ida baita maino?

⁴ Iesu ese e hadibadamu ita e badu henidamu tadikakana ida baita maino na mai anina bada. (Mataio 5:23, 24 ba duahi.) Iena hereva amo e hahedinaraia bema ta uramu Dirava baita hamoalea, ma haida ida eda hetura karadia baita hanamo.  Baita hekwarahimu tadikaka taihu ida baita mainomu neganai, Iehova na be moalemu. To, iseda tomadiho karana na basine abia daemu bema ta na dounu ta badu heniamu bona basita uramu ia ida baita maino.​—1 Ioa. 4:20.

5. Dahaka dainai tadikaka ta enai na e auka ta ida bae maino totona?

⁵ Reana edai na be aukamu baita maino totona. Dahaka dainai? Mani Mark enai e vara ḡauna a laloa. * Tadikaka ta ese kongrigeisin taudia haida vairadiai iena kerere e herevalai bona e gwauraia dika neganai, ia na e hahisia bada. Mark be dahaka e kara? Ia na e gwa: “Asina hebiagu bona na badu.” To, gabeai Mark na e lalo unu e kara toma na dia namo bona una tadikaka e sori henia, badina e ura ia ida ma bae maino. To, una tadikaka na se ura bae maino. Matamanai, Mark na e lalo, ‘Dahaka dainai baina hekwarahi ia ida baina maino bema ia na se uramu?’ To, Mark na sekit tauna ese e hagoadaia dounu baine hekwarahi na namo. Mark be dahaka e kara?

6. (a) Edena dalai Mark na e hekwarahiva ta ida baine maino totona? (b) Mark ese Kolose 3:13, 14 be ede e badinaia toma?

⁶ Mark na sibona ena kara e lalodia neganai, e laloparara ia na se manau bona e laloava ia ese ma haida na e hereadia. Ia na e diba ena kara baine haidaua na ḡau badana. (Kol. 3:8, 9, 12) Una tadikaka dekena ma ela lou bona ena kara dainai e sori. Dia una mo, to revareva amo danu ena sori herevadia e gwaurai bona e noia edia hebamo na baine namo lou. Mark na harihari ḡaudia maraḡidia danu e heni, e laloava una tadikaka ese na be ura henimu. To, una tadikaka na dounu ia e badu heniava. Ena be iena kara na unu bamona, to Mark na dounu Iesu ena haheḡani, tadikaka ba lalokau henidia bona dika ba gwautao haheḡanidia e badina. (Kolose 3:13, 14 ba duahi.) Ena be ta hekwarahimu ma haida ida baita maino to bema idia na asie uramu, Kristen  lalokauna ese be durudamu dounu edia dika baita gwautao bona baita ḡuriḡuri idia ida baita maino lou totona.​—Mat. 18:21, 22; Gal. 6:9.

7. (a) Iesu ese e hagoadadamu dahaka baita kara? (b) Taihu ta enai be dahaka e vara?

⁷ Iesu ese ita na e hagoadadamu ta uramu ma haida ese ita bae kara henida heḡereḡerena idia danu unu baita kara henidia toma. Bona e gwa danu, dia ita e lalokau henidamu taudia mo baita lalokau henidia. (Luka 6:31-33) To, bema kongrigeisin ai ta ese oi se hereva henimumu bona se hanamomumu, oi be ede bo kara tomamu? Una na Lara enai e vara. Ia na e gwa: “Taihu ta ese lau na se hereva heniguva bona asi dibagu dahaka dainai. Una na na lalohekwarahilaiava bona hebou lao karana na asina moalelaiava.” Matamanai Lara na e gwa: “Lau na kerere ta asina karaia. Bona kongrigeisin ai haida na e gwauva una taihu ena kara na unu bamona.”

8. Lara na maino ikarana totona dahaka e kara, bona ienai e vara ḡauna amo dahaka ta dibamu?

⁸ Lara na ḡau haida e kara una taihu ida baine maino totona. Ia ese Iehova e ḡuriḡuri henia bona lalona e hadaia una taihu baine hereva henia totona. Raruosi e herevahereva hebou, e haherahu, bona e maino. Vaitani una hekwakwanai na vada e hamaoromaoroa. Lara na e gwa: “To, gabeai una taihu na matamanai e kara heḡereḡerena ma e kara lou. Lau na na lalohisihisi bada.” Matamanai, Lara na e laloava ia baine moale dalana tamona na bema una taihu ese ena kara baine haidaua. To gabeai e laloparara ia ese baine karaia ḡauna badana na, mai lalokauna ida una taihu baine kara henia bona ena dika baine “gwau tao.” (Efe. 4:32–5:2) Lara na e helalotao Kristen lalokauna na “ihadikalaina karadia se lalo taomu; ḡaukara iboudiai e goadalaimu; ḡau iboudiai e abi daemu; iboudiai e laromu; dika iboudiai e haheauka henimu.” (1 Kor. 13:5, 7) Gabeai Lara ese una hekwakwanai na ma se lalohekwarahilaia lou. Una taihu na gabeai Lara ma e hereva henia lou. Tadikaka taihu ida bo mainomu bona bo lalokau henidiamu neganai, bo dibamu ‘ura  heni bona maino Diravana ese e bamomuimu.’​—2 Kor. 13:11.

9. Aposetolo Edia Kara 10:34, 35 heḡereḡerena, dahaka dainai taunimanima oromadia basita lalo?

⁹ Iehova ese taunimanima oromadia na se lalomu. (Aposetolo Edia Kara 10:34, 35 ba duahi.) Ita danu unu baita kara tomamu neganai, ta hahedinaraiamu ita na ia natuna. Bona ita ese dekeda taudia baita lalokau henidia haheḡanina na ta badinaiamu, bona tadikaka taihu padadiai maino ta havaraiamu.​—Roma 12:9, 10; Iak. 2:8, 9.

10-11. Edena dalai taihu ta na ena lalohadai kererena e hamaoromaoroa?

¹⁰ Haida ediai taunimanima oromadia basita lalo karana ihahedinaraina na auka. Mani taihu ta ladana Ruth enai e vara ḡauna aita laloa. Ia maraḡinai, idau tano tauna ta ena kara ese iena bese na e hahisia. Ia be ede e kara toma? Ruth na e gwa: “Una tano taudia edia kara o ḡau iboudiai na asina ura heniva. Bona na laloava una tano taudia bona tadikaka taihu danu edia kara na heḡereḡere.” Ruth be edena dalai una lalohadai kererena e hamaoromaoroa?

¹¹ Ruth na e laloparara una lalohadai kererena baine hamaoromaoroa na namo. Ia na Yearbook ai una tano ena ekspiriens bona ripoti e duahi. Ia na e gwa: “Na hekwarahi una tano taudia ediai lalohadai maorona baina abia. Bena na laloparara una tano ai e nohomu tadikaka taihu na Iehova e hesiai henia goadagoadava. Bona na diba idia danu tanobada heḡeḡemadai tadikaka oreana lalonai.” Gabeai, Ruth na e diba ena lalokau baine hahedinaraia na namo. Ia na eto: “Una tano amo ema tadikaka taihu na hedavari henidiava neganai, na hekwarahiva baina kara namo henidia totona. Na hereva henidiava unu amo baina dibadia namonamo.” Bena dahaka e vara? Ruth na e gwa: “Gabeai, na abiava lalohadai kererena na ma asina abia lou.”

12. Taihu ta ladana Sara ena hekwakwanai be dahaka?

¹² Reana haida na basie dibamu, to edia kara amo be hahedinaraiamu idia na taunimanima oromadia e lalomu. Heḡereḡere, Sara na e laloava ia na taunimanima oromadia na se lalova badina orea lalonai tadikaka taihu na edia bese, edia kohu bona moni, bona maduna daidiai se hahemaoro henidiava. To, ia na e gwa: “Na laloparara lau na taunimanima oromadia na lalo badava.” Edena dalai? Sara ena ruma bese na e sikuli namonamo taudia bona ia na e urava taunimanima unu bamodia ida baine hebamo. Nega ta ia na bamona ta e hamaoroa, eto: “Lau na e sikuli namonamo Witnes taudia ida na hebamomu. To, se sikuli namonamo taudia na asina bamodiamu.” Una ese e hahedinaraiamu, Sara na ena kara baine haidaua na namo. Edena dalai?

13. Sara ese ena kara e haidaua amo dahaka ta dibamu?

¹³ Sekit tauna ta ese Sara e durua ena kara baine haeroa namonamo totona. Sara na e gwa: “Ia ese egu hesiai ḡaukarana, haere namodia, bona egu diba Baibul ai dainai e hanamogu. To, e hamaorogu danu eda diba e bada e laomu neganai, namona na Kristen kara namodia heḡereḡere manau, bona hebogahisi danu baita hahedinarai.” Sara ese sekit tauna ena hereva na e badinaia. Ia na e gwa: “Lau na na diba ḡau badana na, ma haida baina kara namo henidia bona baina lalokau henidia.” Una dainai, ena lalohadai tadikaka taihu ediai na e haidaua. Ia na e gwa: “Na urava baina laloparara ededia kara daidiai Iehova ese idia na e lalodia badava.” Ita be dahaka ta dibamu? Basita laloa ita na ta sikuli namonamo dainai ita ese ma haida na ta  hereadiamu. Bema ‘iseda orea taudia baita lalokau henidiamu,’ unu na basita lalo tomamu.​—1 Pet. 2:17.

14. Heberu 13:16 heḡereḡerena, haida ta abidia daemu neganai, Iehova ena hemami be ede bamona?

¹⁴ Iehova na e moalemu bema ita ese heabi-dae karana ta hahedinaraiamu. (Heberu 13:16 ba duahia.) Iehova matanai dabu taudia idurudia karana na iseda tomadiho karana ta. (Iak. 1:27; 2:14-17) Una dainai, Baibul ese ita na e hagodadamu ‘heabi-dae karadia baita kara.’ (Roma 12:13) Heabi-dae karadia ta karamu neganai, ta hahedinaraiamu haida na ta lalodia badamu, ta lalokau henidiamu, bona ta uramu turada ai baita halaodia. (1 Pet. 4:8-10) To, ḡau haida ese heabi-dae karana na baine koua diba.

15-16. (a) Dahaka dainai haida ediai na e aukamu heabi-dae karana bae hahedinaraia? (b) Edit be dahaka ese e durua heabi-dae karana baine hahedinaraia totona?

¹⁵ Reana eda noho daladia daidiai heabi-dae karana ihahedinaraina na be aukamu. Vabu ta ladana Edit enai e vara ḡauna mani a laloa. Witnes ta ai do sela neganai, se urava taunimanima momo ida baine hebamo. Edit na e laloava ma haida hari heḡereḡere heabi-dae karana bae hahedinaraia.

¹⁶ To, Edit na Witnes ta ai ela murinai, ena lalohadai na e haidaua. Ḡau haida e kara heabi-dae karana baine hahedinaraia totona. E gwa: “Emai Kingdom Hall matamatana e haginiava neganai, elda ta ese e hamaorogu tadikaka ta bona adavana na una ḡaukara iduruna totona be maimu, bona e noigu bema namo wiki rua lalodiai egu ruma ai bae noho. Bena lau na Iehova ese Sarefata ai e nohova vabu e hanamoa dalana na laloa.” (1 Han. 17:12-16) Edit na lalona e hadaia una tadikaka mai adavana ida baine abidia dae. Iehova ese ia e hanamoa, a? Ia na eto: “Idia na dia wiki rua to hua rua e noho egu ruma ai. Una neganai emai hetura karana na e namo.” Kongrigeisin ai danu Edit na tura namodia momo e davari. Hari ia na painia ḡaukarana e karaiamu bona  ia ida e haroro heboumu taudia na iena ruma e laomu neganai ia na e moalemu. Ia na e gwaumu: “Ḡau ihenina karana na na moalelaiamu. Bona momokani unu na kara tomamu neganai, hahenamo momo na davarimu.”​—Heb. 13:1, 2.

17. Luke ese e lalopararalaia ḡauna be dahaka?

¹⁷ Reana ita na heabi-dae karana ta hahedinaraiamu, to ede baita habadaia toma? Heḡereḡere, Luke bona adavana na heabi-dae taudia. Idia na tamadia sinadia, varavaradia, turadia namodia, bona sekit tauna mai adavana ida e abidia daeva. To, Luke na e gwa: “Ai na a laloparara ai na a manadadia taudia mo abidia daeva.” Luke bona adavana be edena dalai edia heabi-dae karana e habadaia?

18. Luke bona adavana be edena dalai edia heabi-dae karana e habadaia?

¹⁸ Luke bona adavana ese edia lalohadai na e haidaua badina idia ese Iesu ena hereva e lalopararalaia, eto: “Badina be e lalokau henimuimu taudia mo ba lalokau henidia, davamui be dahaka bavabia?” (Mat. 5:45-47) Idia na e diba namona na Iehova bae tohotohoa, ia na taunimanima iboudiai e harihari henidiamu. Una dainai lalodia e hadai do se vavedia tadikaka taihu bae vavedia totona. Luke na e gwa: “Hari ai iboumai ese emai hebamo na a moalelaiamu. A hahegoada hehenimu bona emai hetura karana Iehova ida na e goadamu.”

19. Edena dalai baita hamomokania ita na Iesu ena hahediba taudia, bona lalomu ba hadaia dahaka ba kara?

¹⁹ Tame itaia edena dalai baita helalokau hehenimu karana ese be durudamu baita maino, taunimanima oromadia basita lalo, bona heabi-dae karana baita hahedinaraia. Bona namona na lalohadai kereredia baita dadarai bona mai kudouda idoinai ida tadikaka taihu baita lalokau henidia. Bema unu baita kara tomamu, baita moalemu bona baita hamomokaniamu ita na Iesu ena hahediba taudia.​—Ioa. 13:17, 35.