1. Iehova ena taunimanima be ededia hahetoho e davarimu?

HAHETOHO aukana ta o davariamu, a? Reana kongrigeisin ai ta ese e hahisimu. (Iak. 3:2) O reana o ḡaukara heboumu eiava o skuli heboumu taudia ese e kirikirilaimumu badina Iehova o hesiai heniamu. (1 Pet. 4:3, 4) Eiava emu ruma bese taudia ese reana e koumumu basio ha hebou o emu abidadama basio herevalaia. (Mat. 10:35, 36) Bema hahetoho ta dainai o hisihisimu, reana bo uramu Iehova ihesiai henina karana ba hadokoa. To namona na bavabia dae herevana dahaka hahetoho o davarimu, Iehova ese aonega be henimumu dahaka ba kara bona be hagoadamumu ba haheaukalaia.

2. Roma 15:4 ena hereva heḡereḡerena, Dirava ena Hereva iduahina karana amo dahaka hahenamo baita abi diba?

² Iehova ena Hereva ai, ena hesiai taudia ese hahetoho aukadia e haheaukalai sivaraidia e herevalai. Dahaka dainai? Unu amo diba baita abi. Una dainai Iehova ese Paulo na e haḡania una badi baine torea. (Roma 15:4 ba duahia.) Unu sivarai baita duahi karana ese tauhalo bona helaro baine henida. Unu sivarai amo namo baita abi totona, dia Baibul mo baita duahia, to ḡau ma haida danu baita kara. Namona na Baibul ese eda lalohadai baine haidaua bona kudouda baine hamarere. Bema ta davariamu hekwakwanaina ta baita haheaukalaia totona heduru herevadia baita tahu, dahaka baita kara diba? Ini dala hani baita badina diba: (1) Baita ḡuriḡuri, (2) Lalodai baita piksaia, (3) Baita lalo dobu, bona (4) Ta dibamu ḡaudia baita badina. Mani unu dala ta ta ai baita kara ḡaudia aita herevalai. * Bena unu dala baita ḡaukaralaidia,  bena King David bona aposetolo Paulo ediai e vara ḡauna amo diba baita abi.

3. Baibul do so duahia neganai, dahaka ba kara bona dahaka dainai?

³ (1) Baita ḡuriḡuri. Baibul do so duahia neganai, Iehova ba noia, baine durumu ba duahia ḡauna ena namo ba itaia. Heḡereḡere, bema o uramu sisiba herevadia haida ba tahu emu hekwakwanai ba hanaia totona, Iehova ba noia baine durumu ena Hereva ai hahekau herevadia ba davari totona.​—Fili. 4:6, 7; Iak. 1:5.

4. Dahaka ese baine durumu diba, Baibul sivaraina na ba hamauria?

⁴ (2) Lalodai baita piksaia. Iehova ese ḡau baita lalo karana na e henida. Baibul sivaraina na ba hamauria totona, sivarai ai e vara ḡaudia na lalomu ai ba piksaia, bona sibomu na una sivarai ai e herevalaiamu tauna ena gabu ai ba heato. Ia ese e ita ḡaudia ba ita o ia ese e mami hemamidia bavabi.

5. Lalo dobu anina be dahaka, bona edena dalai ba lalo dobu diba?

⁵ (3) Baita lalo dobu. Lalo dobu anina na o duahiamu ḡauna ba lalohadailaia namonamo bona edena dalai emu mauri ai ba badinaia. Bona baine durumu lalohadai ba haheboudia bona o duahiamu ḡauna ba lalopararalaia namonamo. Baibul ba duahia to basio laloa dobu karana na vaitani jigsaw puzzle ta teibolo latanai ba itaia to basio haheboua. Lalo dobu karana na unu puzzle bavatodia hebou karana heḡereḡerena. Ba lalo dobu totona, ini henanadai ba haerelai: ‘E sivarailaiamu tauna be dahaka e kara ena hekwakwanai e hanaia? Iehova ese ia be ede e durua toma? Na diba ḡaudia be edena dalai baina ḡaukaralaidia, unu amo bae durugu hekwakwanai baina haheaukalaidia?’

6. Dahaka dainai baita diba ḡaudia baita badina?

⁶ (4) Ta dibamu ḡaudia baita badina. Iesu na e gwa, bema ta diba ḡaudia basita badina, ita na vaitani miri latanai ena ruma e haginia tauna heḡereḡerena. E ḡaukara goada, to ena hekwarahi na asi anina. Dahaka dainai? Badina lai baine toa bona medu baine diho neganai una ruma na be morumu. (Mat. 7:24-27) Una heḡereḡerena, bema baita ḡuriḡuri, sivarai baita lalohadailaia, bona baita lalo dobu, to ta diba ḡaudia basita badina, eda hekwarahi na asi anina. Bema eda abidadama na hahetoho bona daḡedaḡe ese be tohoamu, basine goadamu. Danu, bema baita stadi bona ta diba ḡaudia baita badina, abi hidi maorodia baita karamu, maino ai baita nohomu, bona eda abidadama na be goadamu. (Isa. 48:17, 18) Tame herevalai daladia hani baita ḡaukaralai, bona baita itaia King David enai e vara ḡauna amo dahaka baita dibamu.

7. Edena Baibul sivaraina baita herevalaiamu?

⁷ Turamu ta o emu bese tauna ta ese lalomu e hahisia, a? Bema oibe, King David sivaraina istadilaina karana amo heduru bavabi diba. Ia na natuna Absalom ese lalona e hahisia bona e ura King dagina baine abia.​—2 Sam. 15:4-14, 31; 18:4-14.

8. Dahaka ba kara diba Iehova ena heduru bavabia?

⁸ (1) Baita Ḡuriḡuri. Una sivarai ba laloa bona haida ese e kara auka henimu karana na Iehova ba hamaorolaia. (Sal. 6:6-9) E varamu ḡauna korikorina ba gwauraia. Bena Iehova ba noia, baine durumu emu hahetoho ba haheaukalaia hahekau herevadia ba lalopararalai.

9. David bona Absalom padadiai be dahaka e vara?

⁹ (2) Lalodai baita piksaia. Mani ina sivarai ai e vara ḡaudia a lalo, bena King David enai e vara ḡaudia ba lalohadailai. David natuna Absalom na laḡani momo ḡau idauidau e karava taunimanima ese bae lalokau  henia totona. (2 Sam. 15:7) Absalom na nega maorona e davaria neganai, tatau haida e siaidia hehuni Israel ibounai lalonai taunimanima bae haheḡaeḡaedia, ia bae abia edia pavapava. Ia ese danu David turana namona bona sisiba ihenina tauna, Ahitofel, lalona e ania David baine gwau-edeede henia. Absalom na sibona king ai e hahelao, bena e ura David baine dabaiatao bona baine hamasea, una negai David na e gorerea dikadika. (Sal. 41:1-9) David na una e diba neganai, Ierusalem e heautania. Gabeai, Absalom ena tuari taudia na David ena tuari taudia ida e tuari. Unu gwau-edeede tuari taudia bona David natuna Absalom na e aladia.

10. David na enai e vara hekwakwanai dainai dahaka bema kara?

¹⁰ Mani unu e vara neganai David ena hemami a laloa. Ia ese Absalom na e lalokau heniava bona Ahitofel na e abidadama heniava. To, ia mai dibana taudia raruosi ese e gwau-edeede henia. Idia ese lalona e hahisia bada bona e ura bae alaia. David ese turana ma haida na basinema abidadama henidia, bema lalo reana idia danu Absalom e badinaiamu. Reana sibona bema helalo bona hanua bema rakatania. Eiava ena metau dainai basinema ura kara ta baine karaia. To David na unu se kara toma. Ena hekwakwanai badana na e hanaia. Dahaka dainai?

11. David na enai e vara hekwakwanai dainai dahaka e kara?

¹¹ (3) Baita lalo dobu. Una sivarai amo ededia hahekau herevadia ome diba? Ina henanadai ba haerelaia, “David be dahaka e kara ena hekwakwanai e hanaia?” David na se taku, bona abi hidi kereredia bona kavakavadia se kara. Eiava se halahe, badina e gariva dainai. To, ḡuriḡuri amo Iehova ena heduru e noia. Danu turana e noidia ia bae durua. Bona e abia hidi ḡauna na e karaia haraḡa. Ena be lalona na e hisihisi bada, to haida na ma se lalodia kerere bona se badu. Ia ese Iehova bona bamona namodia na dounu e abidadama henidiava.

12. Iehova be dahaka e kara David baine durua?

¹² Iehova ese David be ede e durua toma? Bema hetahu taina bo karaiamu neganai, bo davariamu Iehova ese David na goada e henia ena hekwakwanai e haheaukalaia. (Sal. 3:1-8) Iehova ese David ena abi hidi na e hanamoa. Bona David e badinaiava taudia na edia pavapava igimana totona e tuariva neganai, Iehova ese e durudia.

13. Edena dalai David ba tohotohoa diba bema ta ese dala haida ai baine hahisimu? (Mataio 18:15-17)

¹³ (4) Ta dibamu ḡaudia baita badina. Sibomu ba henanadai: ‘Edena dalai David baina tohotohoa diba?’ Hekwakwanai ba hamaoromaoro haraḡa. Emu hekwakwanai heḡereḡerena, Mataio karoa 18 ai Iesu ena sisiba eiava ena hahekau herevana ba badinaia. (Mataio 18:15-17 ba duahi.) To, emu hemami ese basine dorimu abi hidi kereredia ba kara haraḡa. Iehova ba noia kudoumu baine hamainoa bona una hekwakwanai ba hanamoa totona aonega baine henimu. Emu abidadama turamu ediai basio haboioa. To, mai emu ura ida edia heduru bavabi dae. (Her. 17:17) Mai anina bada ḡauna na, Iehova ese ena Hereva amo e henimu sisibadia ba badina.​—Her. 3:5, 6.

14. Edena hekwakwanai o davariamu neganai, Timoteo Iharuana 1:12-16; 4:6-11, 17-22 ba lalodia?

¹⁴ Emu ruma taudia ese e inai henimumu, a? Eiava o nohomu hanuanai Iehova ena taunimanima edia ḡaukara be e taravatua o e koua, a? Bema oibe, Timoteo Iharuana 1:12-16; 4:6-11, 17-22 * bo  duahiamu ese be hagoadamumu. Paulo na dibura ai e nohova neganai, una revareva e torea.

15. Iehova enai be dahaka ba noi diba?

¹⁵ (1) Baita ḡuriḡuri. Unu sivarai do so duahi neganai, emu hekwakwanai bona emu hemami na Iehova ba hamaorolaia. E varamu ḡauna korikorina ba gwauraia. Bena Iehova ba noia, baine durumu Paulo enai e vara ḡauna amo hahekau herevadia ba dibadia, unu amo bo dibamu oi be dahaka ba kara o davariamu hahetohona ba hahanaia.

16. Paulo enai e vara ḡauna be ede bo herevalaia tomamu?

¹⁶ (2) Lalodai baita piksaia. Sibomu Paulo ena gabu ai ba heato. Ia na Roma diburana ta ai seini ai e ḡuia. Ena be guna dibura ai e noho, to hari ia na mai dibana be alaiamu. Bamona haida ese de rakatania, bona tauanina na manoka.​—2 Tim. 1:15.

17. Paulo be dahaka bema kara?

¹⁷ Paulo ese guna e vara ḡaudia bema lalodia, bema lalo abi hidi idaudia bema kara unu amo dibura ai basiema atoa. Asia ai ia e rakatania taudia bema badu henidia, bona turana gunadia bema lalodia kerere. To Paulo na unu na se kara toma. Dahaka dainai e abia dae turana ese ia na basie rakataniamu bona Iehova ese ia na be hanamoamu?

18. Paulo ese e davariva hahetohodia be ede e lalodia toma?

¹⁸ (3) Baita lalo dobu. Ina henanadai ba haerelaia, “Paulo be dahaka e kara ena hekwakwanai e hanaia?” Ena be mai dibana ia na be masemu, to ia ese se laloaboio ḡauna badana na, Iehova baine hanamoa. Bona hanaihanai haida ihagoadadia karadia e lalova. Iehova enai baine tabekau totona, hanaihanai e ḡuriḡuriva. (2 Tim. 1:3) Ia e rakatania taudia daidiai se lalohisihisiva, to e moale badina ia turana ese mai lalokaudia ida dala idauidau ai ia e duruava. Danu, Paulo na hanaihanai Dirava ena Hereva e stadilaiava. (2 Tim. 3:16, 17; 4:13) Mai anina bada ḡauna na, Paulo ese e abia dae momokani Iehova bona Iesu ese ia na e lalokau heniava. Idia ese ia na asie rakatania, bona ia na e diba momokani idia ese ia na be hanamoamu.

19. Iehova ese Paulo be ede e durua toma?

¹⁹ Iehova ese Paulo e hamaoroa Kristen tauna ai bainela neganai, daḡedaḡe na do baine davari. (Apos. 21:11-13) Iehova ese Paulo be ede e durua toma? Ia ese Paulo ena ḡuriḡuri na e haerelaidia bona gabeai goada e henia. (2 Tim. 4:17) E hadibaia ena hekwarahi ahuna na do baine abia. Iehova ese Paulo e badinaiava tura namodia kudoudia e hamarere dala haida ai Paulo e durua.

20. Roma 8:38, 39 ta laloamu neganai, edena dalai Paulo baita tohotohoa diba?

²⁰ (4) Ta dibamu ḡaudia baita badina. Sibomu ba henanadai, ‘Edena dalai Paulo baina tohotohoa diba?’ Paulo heḡereḡerena, namona na baita diba eda abidadama dainai do bae hahisida. (Mar. 10:29, 30) Hahetoho neganai eda abidadama baita hagoadaia totona, ḡuriḡuri amo Iehova enai baita tabekau bona stadi sediual namona baita badinaia. Bona namona na baita helalotao, baita karaia ḡauna badana ta na Iehova baita hanamoa. Baita abia dae Iehova ese ita na basine rakatanidamu bona ta ese iena lalokau ita edai basine hadikaia diba.​—Roma 8:38, 39 ba duahia; Heb. 13:5, 6.

21. Dahaka ese Aya bona Hector e durudia edia hekwakwanai e hahanaia?

²¹ Herevana eda mauri ai dahaka baine  vara, to Baibul sivaraidia ese bae hagoadada diba. Heḡereḡere, Aya, painia ta Japan ai, na e gwa Iona sivaraina ese e durua pablik gabudiai haroro ḡaukarana ai basine gari totona. Hector, Indonesia ai e nohomu matamata tauna ta, tamana bona sinana na Iehova asie hesiai heniamu, na Ruta ese Iehova e dibaia bona e hesiai henia sivaraina amo goada e abi.

22. Edena dalai Baibul drama eiava “Imitate Their Faith” ai Baibul sivaraidia amo heduru bavabi diba?

²² Edeseniai oi bae hagoadamu Baibul sivaraidia ba davari diba? Eda vidio, audio drama bona “Imitate Their Faith” ai Baibul sivaraidia na bae hamauridia diba. * Unu sivarai do so ita, so kamonai, o so duahi neganai, Iehova ba noia baine durumu oi ese ba badina poinidia ba davari totona. Sibomu e sivarailaiamu tauna ena gabu ai ba heato. Iehova e badinaia taudia ese e kara ḡaudia bona Iehova ese ede e durudia toma edia hekwakwanai e hahanaia daladia ba lalo dobu. Bena o diba ḡaudia ba badina. Iehova ba tenkiu henia, ia ese e henimu hedurudia dainai. Ena heduru ba lalodia bada totona, dala ba tahu ma haida ba hagoadadia bona ba durudia.

23. Isaia 41:10, 13 ai Iehova be e gwauhamata ita totoda dahaka baine kara?

²³ Satana ese e biaguamu tanobadana ai mauri na auka, bona nega haida baita hekwarahi badamu. (2 Tim. 3:1) To basita lalohekwarahi o basita gari. Iehova ese ta davarimu ḡaudia na mai dibana. Ta morumu negadiai, ia na e gwauhamata imana idibana goadana amo baine dogodatao. (Isaia 41:10, 13 ba duahi.) Bema iena heduru baita abia dae momokanimu, Dirava ena Hereva amo goada baita abimu bona herevana dahaka hekwakwanai bae vara, to baita hanaidia dibamu.