Kristen taudia haida na hari e ḡaukaralaimu teknoloji amo edia ruma bese bona Witnes taudia ma haida ida e herevaherevamu. To, lo Kristen tauna ese ina sisiba baine laloa na namo: “Lalo-parara tauna ese hahedika e itaiamu, bena e komumu; a lalo-duhu na e raka laomu, unu amo e hisihisimu.”​—Her. 27:12.

Ta moalemu Iehova na e uramu baine gimada. Una dainai, heiriheiri e havaramu taudia, murimuri ai e atodia taudia, o hahediba koikoidia e gwauraimu taudia ida na basita hebamo. (Roma 16:17; 1 Kor. 5:11; 2 Ioa. 10:11) Kongrigeisin e bamoamu taudia haida edia kara na dia nanamo. (2 Tim. 2:20, 21) Bema ta uramu ta baita hetura henia, ina na baita laloatao. Hebamo namodia na messaging application amo baita abi hidi na auka.

Bema messaging grup taudia na hutuma, bamoda na baita abi hidi namonamo. Kristen taudia haida na messaging grup badadia lalodiai e vareai, bona hekwakwanai e davari. Edena dalai tadikaka o taihu ta na baine henahua toho bema e badinaiamu grup taudia na handred o tausen mai kahana? Grup badadia lalodiai taunimanima iboudiai bona edia gini lauma dalanai na basita dibamu. Salamo 26:4 na e gwaumu: “Koikoi taudia ida asina helaimu, bona boga-alaga taudia ida asina raka heboumu.” Una ese e hahedinaraiamu messaging application ta ḡaukaralaiamu neganai, namona na ita mai dibada taudia mo baita teks henidia.

Ena be messaging grup na maraḡi, to namona na Kristen tauna ese ena nega bona ena ura ḡaudia baine haerodia na namo. Anina na dia haida edia herevahereva lalonai ta uramu baita vareai, herevana idia na dahaka bae herevalai o hora hida e ḡaukaralaiamu bae herevahereva. Paulo ese Timoteo na e hadibaia “udu mauri” bona ‘gado kau gado kau’ taudia nahuadia baine toho. (1 Tim. 5:13) Hari, una na elekronik ḡaudia amo baine vara diba.

Lo Kristen tauna na tadikakana igwau-henina herevadia o ena hehuni herevadia basine gwaurai eiava haida ese e herevalaimu neganai, basine hereva kau. (Sal. 15:3; Her. 20:19) Bona ia ese sivarai idau hereadia bona se hamomokani ḡaudia baine dadarai. (Efe. 4:25) Ita na eda websait jw.org bona hua ta ta JW Broadcasting^® amo lauma aniani bada herea bona tadikakada ediai e varamu ḡaudia na ta itamu.

Witnes taudia haida na elektronik messaging amo ḡau e hoihoilaimu bona e hoimu, bae hoihoilai ḡaudia e herevalaimu bona ediai bae ḡaukara taudia e tahudiamu. Unu na bisines ḡaudia, dia tiokratik ḡaudia. Kristen taudia na “moni ihekisehekise henina” ena idoa ai basie moru totona, tadikaka oreana na basie ḡaukaralaia edia bisnes totona.​—Heb. 13:5.

To, bema messaging application bae heḡaukaralai e dabumu o dikadika badadia e davarimu tadikakadia idurudia monina bae noi be maoro, a? Ita na hanaihanai mai eda lalokau ida ta heduru hehenimu bona ta hahegoada hehenimu. (Iak. 2:15, 16) To bema messaging grup badadia amo unu baita kara tomamu neganai, hekwakwanai e varamu gabudiai edia brens ofesi o kongrigeisin ese e heḡaeḡaelai daladia baita hadikadia dibamu. (1 Tim. 5:3, 4, 9, 10, 16) Bona ita na asita uramu haida na bae laloa Dirava ena mamoe inaridia ḡaukaranai eda ḡaukara na hereadae.

Iseda ura na baita kara ḡaudia daidiai Dirava baita heatolaia. (1 Kor. 10:31) Una dainai messaging application o teknoloji ḡauna ta, ta uramu baita ḡaukaralaia neganai, namona na ena dika baita laloa, bona baita henahua toho.