Ina hereva “apocalypse” o kamonaimu neganai, dahaka o laloamu? Reana tanobada ibounai heḡeḡemadai ai baine vara dika badana ta, mauri ḡaudia iboudiai baine haoredia ḡauna, o laloamu. Haida na e abia daemu kahirakahira tanobada ai unu bamona dika ta be varamu, badina be nius ai ini ripoti e duahimu:

•   “Niuklia tuarina na baine vara diba. Una na taunimanima ese be havaraiamu, o be vara kavamu, eiava herevahereva namonamo karana na lasi dainai be varamu.”—Bulletin of the Atomic Scientists.

•   “Laḡani 10 gunadiai, tanobada ibounai lalonai lai gubadia badadia e vara, uda e aradia, medu lasi, davara e hamiroa, siahu bada herea, bona abata e vara.”—National Geographic.

•   “Africa ai kwadi oreadia ese dika bada herea e havaraia, dia laḡani momo gunadiai heḡereḡerena.”—The Associated Press.

 Tanobada ibounai be baine ore vaitani, a? Baibul be dahaka e gwaumu?

 Lasi. Dirava ena Hereva, Baibul, ese e hadibadamu tanobada na baine mia hanaihanai. (Kohelete 1:4) Dirava ese tanobada na e karaia dainai basine hadikaia, to Ia ese ‘tanobada ihadikana taudia baine hadikadia’ ore.—Apokalupo 11:18.

 Baibul ena hereva heḡereḡerena, baine ore “tanobadana” anina na Dirava e dadaraiamu bona sibodia edia ura e tahumu taudia. Noa ena negai e kara heḡereḡerena, Dirava ese ia “asie badinaiamu taudia” na baine haoredia.—2 Petro 2:5; 3:7.

 Ioane Ginigunana 2:17 na e gwaumu, “tanobada na baine lao bubuni, mai ena heḡahusi ida.” Ina siri ese e hahedinaraiamu Dirava ese dia ina tanobada korikorina baine haorea, to kara dikadia dounu e karamu taudia baine haoredia.

 Baibul ese dokona baine kau negana korikorina na se herevalaia. (Mataio 24:36) To, e hahedinaraiamu dokona na vada kahirakahira. Baibul ese e perovetalai ḡaudia haida bini:

•   “Gabu idau-idau ai” tuari, hitolo bada, daihanai goreredia, bona tano laga badadia bae vara.—Mataio 24:3, 7, 14; Luka 21:10, 11; Apokalupo 6:1-8.

•   Taunimanima na sibodia edia namo bae lalo. Heḡereḡere, “moni bae ura heni bada,” “tenkiu karana basie diba,” bona “sibodia basie hebiagu.”—2 Timoteo 3:1-5, NWT.

 Taunimanima momo na e abia daemu laḡani 1914 amo, tanobada ai e varamu ḡaudia na Baibul ena peroveta herevadia ida heheḡereḡere bona e hahedinaraiamu dokona na kahirakahira. Bema infomeisin ma haida o uramu ba diba, ini atikol “What Does Bible Chronology Indicate About the Year 1914?” bona “What Is the Sign of ‘the Last Days,’ or ‘End Times’?” ba itadia.

 Baibul haida ai Grik gado herevana “apocalypse” e hahanaia neganai, anina na “hahedinaraia.” Nega momo una hereva ese hereva hehunidia ihahedinaraidia karana e herevalaiamu. Baibul ese danu “Lohiabada Iesu” “baine hedinarai [o, apocalypse]” negana e herevalaia, e gwa Iesu na mai ena siahu ida baine hedinarai negana ai, tanobada ai kara dika iboudiai baine kokidia bona Dirava e tomadiho heniamu taudia na ahudia namodia baine henidia.—2 Tesalonika 1:6, 7; 1 Petro 1:7, 13.

 Baibul bukana ginigabena ladana na A·po·kaʹly·psis, eiava Apokalupo, badina ia na vairai bae vara ḡaudia e hahedinarai. (Apokalupo 1:1) Una buka ese sivarai namodia bona helaro sivaraina e herevalai. (Apokalupo 1:3) E hahedinaraiamu Dirava ese hahemaoro kereredia iboudiai baine haoredia vaitani bona tanobada na paradaiso ai baine halaoa. Una negai, taunimanima na basie hisihisi loumu, bona mase na be oremu.—Apokalupo 21:3, 4.

 Oi o uramu Baibul ai unu gwauhamata namodia ma haida ba diba, a? Iehova ena Witnes taudia na free Bible study e karaiamu, una ese oi be durumu dibamu. Ba ura neganai, idia ba hadibadia diba?