Sunday, November 20, 2022 ai, COP27 United Nations Climate Change Hebouna e ore. Una hebou ela taudia iboudiai na e gwaubou disasta e vara momomu tanodia na moni dalanai bae durudia, to momo na e gwaumu una ese una hekwakwanai na basine haoreamu.

•   November 19, 2022 ai, United Nations edia secretary-general António Guterres na e gwa, “Lau na moalemu badina a gwaubou climate ese e hadikamu gabudia na moni ai baia durudia. To una na dia heḡereḡere . . . Iseda tanobada na asi ihanamona dalana.”

•   November 20, 2022 ai, Ireland edia presiden gunana bona Human Rights edia UN High Commissioner gunana, Mary Robinson na e gwa, “Tanobada na climate ese e havaramu dika idauidau dainai, taunimanima momo na metau be davarimu.”

 Matamata taudia na vaira negai ina tanobada ai bae vara ḡaudia e lalohekwarahilaimu. To, bese idauidau bae ḡaukara hebou climate ese e havaramu dika idauidau bae hanamo diba, a? Baibul be dahaka e gwaumu?

 Baibul ese e hamaorodamu ena be gavamani na e ḡaukara goadamu climate ese e havaramu dika idauidau bae hanamo, to una hekwakwanai na basie haore vaitanimu. Ini badi rua aita ita:

•   “Ḡau gageva-gagevana na basie hamaoromaoroa diba.”​—Kohelete 1:15.

   Anina: Gavamani na dia heḡereḡere ḡau iboudiai bae hanamo badina taunimanima na sibodia basie hebiagu diba. (Ieremia 10:23) Ena be bese idauidau bae ḡaukara goada, to idia na dia heḡereḡere tanobada ena hekwakwanai iboudiai bae haore totona.

•   “Badina be taunimanima na sibodia bae heura heni; moni bae mata ḡaniḡani henia; . . . bae tudaga.”​—2 Timoteo 3:2, 3.

   Anina: Baibul ese e hahedinaraia ḡoevaḡoeva iseda negai taunimanima momo na sibodia edia namo be tahumu bona basie uramu ma haida edia namo bae tahu.

 To, vaira negai eda tanobada ena namo totona tanobada gavamanidia edia gwauhamata ai na basita tabekau. Dirava ese tanobada Lohiana, Iesu Keriso e abia hidi. Baibul ese ia na ini e herevalaia toma:

•   “Taunimanima ireḡudia na ia paḡana ai baine heato. bona ladana bae hatoa: Hahealo Tauna Herea-daena, Siahu-bada Diravana, Tamada hanaihanai, Maino Lohiana.”​—Isaia 9:6.

 Iesu na Dirava ena Basileia eiava guba gavamanina ena King. (Mataio 6:10) Ia na mai ena siahu, aonega, bona e uramu ina tanobada bona taunimanima baine reḡudia. (Salamo 72:12, 16) Iena lohia henunai, ina guba gavamanina ese tanobada e hadikaiamu taudia be koudiamu bona ina tanobada na be hanamoa loumu.​—Apokalupo 11:18; Isaia 35:1, 7.

 Climate ese e havaramu dika idauidau baine ore vaitani dalana ba diba totona ina atikol ba duahia, “Climate Change and Our Future​—What the Bible Says.”