BA GIMA!
Dahaka Dainai Politikol Karadia ese Taunimanima E Hapararadiamu?—Baibul be Dahaka E Gwaumu?
Tanobada heḡeḡemadai politikol karadia ese bese momo e hapararadiamu. Laḡani 2022 ai Pew Research Center ese hetahu ḡaukarana e karaia neganai, e hahedinaraia “tano 19 ai taunimanima badadia momo e gwa edia tano ai politikol oreadia e durudiamu taudia na ḡau momo ai se lalotamonamu.”
Oi o nohomu gabuna ai taunimanima na politikol karadia daidiai e pararamu karana o itaiamu, a? Dahaka dainai unu e vara tomamu? Ihanamona dalana ta mia, a? Baibul ena hereva aita laloa.
Taunimanima e hapararadiamu karadia
Baibul na e peroveta iseda nega ai, una na “dina gabedia ai,” taunimanima momo edia kara daidia lalotamona ai na basie nohomu.
“Dina gabedia ai nega dikadia do bae vara. Badina be taunimanima na sibodia bae heura heni; . . . bae tudaga.”—2 Timoteo 3:1-3.
Ena be taunimanima momo na e ḡaukara goadamu gavamani bae durudia bae heau namonamo totona, to una na se varamu. Taunimanima edia lalohadai na idauidau daidiai, e aukamu bae ḡaukara hebou hekwakwanai bae hamaoromaorodia totona. Unu e varamu karadia na idaunegai Baibul ese e herevalai.
“Taunimanima haida ese bamodia e biagudiamu bona e hahisidiamu.”—Kohelete 8:9.
To, Baibul na e hahedinaraiamu tau ta ese gavamani ta amo hari taunimanima ese e davarimu hekwakwanaidia iboudiai na be haorediamu.
Hahekau tauna namona
Baibul ese e hahedinaraiamu hahekau tauna ta na heḡereḡere ini hekwakwanai baine haoredia: Iesu Keriso. Iesu na mai ena siahu bona e uramu taunimanima iboudiai na lalotamona bona maino ai bae noho.
“Ena dina iboudiai kara maoromaoro baine tubu, maino danu baine bada.”—Salamo 72:7.
“Bese iboudiai na ia isiaina bae lao heni.”—Salamo 72:11.
Iesu na hahekau tauna hereadaena, badina haida ese e hahisidiamu taudia na e lalodia badamu bona e uramu baine durudia.
“E dabumu tauna e boiboimu negana ai ia ese e hamauriamu, ogoḡami tauna bona asi iduruna tauna danu. Ia ese manoka-manoka taudia bona ogoḡami taudia e bogadia hisimu bona e dabumu taudia e hamauridiamu. Daḡedaḡe bona ala-ala amo ia ese edia mauri e rauadiamu.”—Salamo 72:12-14.
Iesu ese e gunalaiamu gavamanina, Dirava ena Basileia enai diba ma haida bavabi. Una gavamani ena lohia dalana amo namo bo davariamu bona bo duruamu dalana ba diba.
Vidio ladana Dirava Ena Basileia be Dahaka? ba itaia.
Atikol ladana “Dirava Ena Basileia—Korapsen ia Dadaraia Gavamanina” ba duahia.