United Nations ese ina ripoti e gwauraia:

•   October 7 ela October 23, 2023 ai, Gaza-Israel ai e varamu tuarina dainai taunimanima 6,400 e mase bona 15,200 na dika bada e davari, idia momo na asi edia kerere taudia. Danu, idia momo na edia ruma e rakatani.

•   September 24, 2023 ai, Russia bona Ukraine e tuari neganai asi edia kerere taudia 9,701 e hamasedia bona taunimanima 17,748 bamona Ukraine ai be dika bada e davari.

 Tuari dainai dika e davari taudia ediai Baibul be dahaka e gwauhamatalai?

 Baibul na ini e gwa toma, Dirava ese ‘tuari baine hadokodiamu ela bona tanobada dokona.’ (Salamo 46:9) Dirava ena guba gavamani eiava basileia ese tanobada gavamanidia iboudiai edia gabu baine abi. (Daniel 2:44) Dirava ena Basileia ese taunimanima baine durudia.

 Dirava ena Basileia ena King Iesu Keriso, ese baine kara ḡaudia mani a lalo:

•   “E dabumu tauna e boiboimu negana ai ia ese e hamauriamu, ogoḡami tauna bona asi iduruna tauna danu. Ia ese manoka-manoka taudia bona ogoḡami taudia e bogadia hisimu bona e dabumu taudia e hamauridiamu. Daḡedaḡe bona ala-ala amo ia ese edia mauri e rauadiamu.”​—Salamo 72:12-14.

 Dirava ena Basileia ese tuari dainai e varamu lalohekwarahi, hisihisi bona daḡedaḡe karadia iboudiai baine haoredia.

•   “Ia ese iruru-matadia iboudiai matadia amo baine dahu oho. Mase bona dara-doko bona taitai bona hisihisi bae ore; badina be ḡau gunadia vada e puki.”​—Apokalupo 21:4.

 Kahirakahira Dirava ena Basileia ese tanobada baine hanamoa. Baibul ese e hahedinaraia “umui ese tuari haridia bona tuari iratana lavadia ba kamonai.” (Mataio 24:6) Unu sivarai bona e varamu ḡaudia ese e hahedinaraia ita na taunimanima edia lohia negadia dokodiai ta nohomu.​—2 Timoteo 3:1.