•   “China edia ripot ta ai na e gwa ina laḡani ai dina siahu na bada herea.”​—The Guardian, September 7, 2022.

•   “Laḡani faiv lalodiai, Africa ena kaha haida ai dina siahu dainai gabu na be kaukaumu.”​—UN News, August 26, 2022.

•   “Europe kahana ta ai dina siahu na bada herea dainai tano e kaukau, dia laḡani 500 gunanai bamona.”​—BBC News, August 23, 2022.

 Weda e stadilaiamu taudia momo na e gwaumu vaira nega ai drought momo be varamu. Vaira nega be mai helarona eiava? Baibul be dahaka e gwaumu?

 Baibul ese iseda nega e perovetalaia:

•   “Gabu idau-idau ai doe . . . bae vara.”​—Mataio 24:7.

 Drought ese nega momo doe e havaraiamu. Doe dainai hisihisi bona mase e varamu, una ese Baibul ena peroveta herevana e haḡuḡuruamu.​—Apokalupo 6:6, 8.

 Baibul ese drought e bada hereamu badina e herevalaiamu. Eto:

•   “Taunimanima ena raka na ia sibona ese basine gwauraia hidi.”​—Ieremia 10:23.

 Una anina na taunimanima na dia heḡereḡere sibodia edia raka dalana bae abia hidi eiava sibodia bae hebiagu. Edia abi hidi kereredia dainai drought e varamu bona ranu e kororomu.

•   Saiens taudia momo ese e abia daemu taunimanima edia kara dainai global warming e havaraiamu, una dainai tanobada heḡeḡemadai drought e varamu.

•   Mata ḡaniḡani taudia bona vaira negana se laloamu taudia ese e atomu taravatudia dainai uda badadia e hadikamu, hodahoda e hamiroamu, bona tano ai e miamu ḡaudia iboudiai e hadikadiamu. Una dainai ranu e kororomu.

 To, Baibul ese helaro e henimu.

 Baibul na e gwauhamata Dirava ese ranu hekwakwanaina baine haorea. Edena dalai?

1.  1. Dirava ese ‘tanobada ihadikana taudia be hadikadiamu.’ (Apokalupo 11:18) Oibe, ia ese kara dika bona mata ḡaniḡani taudia, ranu hekwakwanaina e havaraiamu taudia na be kokidiamu.​—2 Timoteo 3:1, 2.

2.  2. “Miri tanona mai siahuna na gohu ai bainela.” (Isaia 35:1, 6, 7) Drought ese e hadikamu gabudia na Dirava ese be hanamodiamu bona ina tanobada na ranu gabunai be laomu.

3.  3. “Tanobada o vadivadi heniamu, o haparipariamu, uma tanodia o hanamodiamu.” (Salamo 65:9) Dirava ese tanobada be hanamoamu dainai, aniani be momo hereamu bona ranu ḡoevana baita inuamu.