Tanobada Ai Doe E Varamu, Baibul be Dahaka E Gwaumu?
“Hitolo be oremu.” Una hereva na tanobada lohiadia ese e ura bae haorea hekwakwanai badana ta—ededia dala ai taunimanima iboudiai ediai aniani bae heni. a To nega ta hitolo be oremu eiava? Baibul be dahaka e gwaumu?
Baibul ese hari e varamu doe e perovetalaia
Baibul na e peroveta iseda nega ai doe bae vara, una nega na e gwauraiamu “dina gabedia.” (2 Timoteo 3:1) Doe eiava hitolo bada hekwakwanaina na dia Dirava ena kerere, to e hadibadamu unu na bae vara. (Iakobo 1:13) Mani Baibul ena peroveta herevadia rua aita ita.
“Gabu idau-idau ai doe . . . bae vara.” (Mataio 24:7) Una peroveta herevana na e gwa hitolo na gabu idauidau ai baine vara. Danu, vanegai e halasia ripotina na ini e gwa toma: “Tanobada ai hitolo na e bada e laomu bona aniani na dia heḡereḡere dainai momo na e gorerediamu.” b Tano haida ai taunimanima milion na aniani bae abi totona e hekwarahimu. Una dainai momo na e mase.
“Bena hosi korema-koremana ta na itaia; e gui kau tauna na metau ihahetohona ḡauna e abia kau imana ai.” (Apokalupo 6:5) Una peroveta herevana ese e hahedinaraia, hosi bona e gui tauna ese ina nega dokonai e varamu hitolo e laulaulaia. c Hosi ai e gui tauna ese metau ihahetohona ḡauna na imana ai e dogoatao, una ese e hahedinaraiamu aniani na dia bada dainai e hahetohodiamu unu amo iboudiai na aniani bae abi diba. Una hosi e heamu lalonai, gado ta na ini e gwau tomamu aniani davadia na be bada hereamu bona e hadibadamu aniani na basita hadika. (Apokalupo 6:6) Una ese e hahedinaraiamu hari tanobada heḡeḡemadai ai doe eiava hitolo na bada herea, bona taunimanima bilion na aniani e tahumu, eiava edia moni na dia heḡereḡere aniani bae hoi totona.
Doe be ede be ore tomamu?
Diba bada tauna ta na e gwa, iseda tanobada ai aniani na momo herea e tubumu bona taunimanima iboudiai ese aniani bae abi diba. To dahaka dainai aniani na dia heḡereḡere? Bona Ihavarada Tauna, Iehova, d ese doe be ede be haorea tomamu?
Hekwakwanai: Gavamani na dia heḡereḡere aniani bona moni hekwakwanaidia bae haoredia.
Ihahanaina dalana: Dirava ena Gavamani ese tanobada gavamanidia gabudia baine abi. (Daniel 2:44; Mataio 6:10) Hari, ogoḡami taudia momo na e hekwarahimu aniani bae abi totona, to Dirava ena Gavamani henunai una na be idaumu. Dirava ena Gavamani ena King Iesu Keriso ese baine karaia ḡauna na Baibul ese e gwauraia, eto: “E dabumu tauna e boiboimu negana ai ia ese e hamauriamu, ogoḡami tauna bona asi iduruna tauna danu . . . Aniani reidia na tano ai bae vara momomomo, ororo doridia reidia bae helado.”—Salamo 72:12, 16.
Hekwakwanai: Tuari ese ḡau momo e hadikamu bona moni hekwakwanaina e havaraiamu dainai, taunimanima ediai na dia heḡereḡere aniani bae hoi totona.
Ihahanaina dalana: “[Iehova] ese tuari e hadokodiamu ela bona tanobada dokona, peva ia ese e bituamu, io ia ese e hakwaiduamu, kariota ia ese lahi ai e douamu.” (Salamo 46:9) Dirava ese tuari kohudia bona tuari e havaraiamu taudia baine haoredia. Una dala amo aniani hekwakwanaina na be oremu bona taunimanima iboudiai ediai aniani na be heḡereḡeremu. Baibul na e gwaumu: “Kara maoromaoro baine tubu, maino danu baine bada.”—Salamo 72:7.
Hekwakwanai: Weda bona disasta badadia ese tubutubu ḡaudia e hadikadiamu bona animal momo e hamasediamu.
Ihahanaina dalana: Dirava ese lai gubana bona hurehure baine biagudia, unu amo tubutubu ḡaudia basie hadikadia. Baibul na e gwaumu: “[Iehova] ese lai gubana e gwaua tao, bena e vea, bona davara hurehurena e gaima . . . Ma tano ḡaḡaena na gohu ai e halaoamu, bona tano kaukauna na ranu e lohilohimu gabuna ai. Unuseni ai ia ese hitolo taudia e hanohodiamu, . . . Idia ese uma e karamu, bona vine imeadia e hadomu, anidia badadia e abimu.”—Salamo 107:29, 35-37.
Hekwakwanai: Taunimanima na mataḡaniḡani bona koikoi dalana ai ḡau e karamu dainai aniani kereredia e karamu eiava aniani ese haida e hagorerediamu.
Ihahanaina dalana: Dirava ena Gavamani ese mataḡaniḡani taudia bona kara koikoi taudia iboudiai baine haoredia. (Salamo 37:10, 11; Isaia 61:8) Baibul ese Iehova Dirava na ini e gwauraia toma: “E hadikadiamu taudia na ia ese e kara maoro henidiamu, bona hitolo taudia na adia e henidiamu.”—Salamo 146:7.
Hekwakwanai: Laḡani ta ta ai, tanobada heḡeḡemadai lalonai aniani momo na gabu kereredia e laomu eiava e dikamu.
Ihahanaina dalana: Dirava ena Gavamani henunai, aniani na be momo hereamu. Iesu tanobada ai e nohova neganai, ia ese aniani na e ḡaukaralaia namonamova. Heḡereḡere, nega ta ia ese hoa dalana ai taunimanima 5,000 e ubudia. Bena gabeai ena hahediba taudia e hamaorodia: “Aniani bahudia na ba habou, sisina taina basine boio.”—Ioane 6:5-13.
Dirava ena Gavamani sibona ese doe eiava hitolo e havaramu ḡaudia be haorediamu, una nega ai taunimanima iboudiai ese aniani namodia momo herea be moalelaimu. (Isaia 25:6) Edena negai Dirava ena Gavamani ese una baine haḡuḡurua? Una ba diba totona atikol ladana, “When Will God’s Kingdom Rule the Earth?” ba itaia.
a The 2030 Agenda for Sustainable Development, adopted by all United Nations Member States in 2015.
b A joint report by the Food and Agriculture Organization of the United Nations, the International Fund for Agricultural Development, the United Nations Children’s Fund, the United Nations World Food Programme, and the World Health Organization.
c Apokalupo bukana ai hosi bona e gui tauna ba dibadia totona atikol ladana, “The Four Horsemen—Who Are They?” ba itaia.
d Iehova na Dirava ladana korikorina. (Salamo 83:18) Ina atikol “Who Is Jehovah?” ba itaia.
