Hereva momokani igwauraina na auka, ani? Taunimanima na edia hereva ihamomokanina totona hahemomokani ḡaudia na asie ḡaukaralaimu, to edia hemami bona lalohadai ai e tabekaumu. Una dainai, hari momo na e laloamu hereva momokani igwauraina na dia ḡau badana.

 Ina na dia lalohadai matamata. Laḡani 2,000 gunadiai, Roma ena Gavana Pontio Pilato ese Iesu e nanadaia, eto: “Hereva momokani be dahaka?” (Ioane 18:38) Ena be Pilato na se nari una henanadai haerena baine abia, to e gwauraia henanadaina na mai anina bada. To Baibul ai haerena bo davariamu neganai, una ese be durumumu hereva momokani bona hereva koikoi edia idau bo dibamu.

Hereva momokani igwauraina karana be mai anina bada, a?

 Oibe. Baibul ese ina hereva “hereva momokani” e ḡaukaralaia unu amo hahemomokani ḡaudia bona dahaka be maoro bona dahaka be kerere edia idau e hahedinaraidia. Danu Baibul ese e hadibadamu Iehova a Dirava na hereva momokani Badina, bona e gwauraiamu hereva momokani Diravana. (Salamo 31:5) Baibul ai Dirava ena hereva momokanidia bo davarimu, bona ina daradara tanobadana lalonai hereva momokani na diari ta bamona ita e hakaudamu.​—Salamo 43:3; Ioane 17:17.

Hereva momokani be ede baita dibaia toma?

 Dirava na se uramu Baibul ena hereva momokani baita abia dae kava. To, e uramu ḡau iboudiai baita haerodia namonamo bena baita hamomokania unu na hereva momokani. (Roma 12:1) Ia na e uramu mai ‘darada idoinai’ ida ia baita dibaia bona baita lalokau henia, bona e hagoadadamu namona na baita hamomokania Baibul amo ta dibamu herevadia na hereva momokanidia.​—Mataio 22:37, 38; Aposetolo Edia Kara 17:11.

Daika ese hereva koikoi e hamatamaia?

 Baibul na e gwa hereva koikoi na Dirava inaina, Satana Diabolo, ese e hamatamaia bona ia na e gwauraiamu “koikoi idoidiai tamadia.” (Ioane 8:44) Ia ese taunimanima ginigunadia ediai Dirava e gwauraia koikoi. (Genese 3:1-6, 13, 17-19; 5:5) Una nega amo ema bona hari Satana ese hereva koikoidia e halasimu, bona Dirava sivaraina momokanina e huniamu.​—Apokalupo 12:9.

Dahaka dainai hari koikoi karana na e badamu?

 Baibul ese ina nega na e gwauraia “dina gabedia” bona Satana ese momo e hakaudia kereremu. Una dainai, taunimanima ese hereva koikoidia amo ma haida e koidiamu bona e hakaudia kereremu. (2 Timoteo 3:1, 13) Danu tomadiho koikoi lalodiai koikoi karadia na bada herea. Baibul ese iseda negai e varamu ḡauna e herevalaia, eto taunimanima “taiadia do bae hemaihemai,” bona “taiadia ese hereva momokani enai bae kudima.”​—2 Timoteo 4:3, 4.

Dahaka dainai hereva momokani na mai anina bada?

 Hereva momokani igwauraina na mai ena namo, badina be durumumu ma haida ba hetura henidia diba. Dirava na e uramu ita na mai momokanida ida ia baita tomadiho henia. Baibul na e gwa: “[Dirava] bae toma henia diho taudia ese lauma ai bona momokani ai bae toma henia diho.” (Ioane 4:24) Baibul amo hereva momokani bo dibaiamu neganai, una ese be durumumu tomadiho koikoidia edia hahediba bo dadaraimu. Atikol ladana “Lies That Make God Seem Unlovable” ba duahia.

Dahaka dainai Dirava na e uramu hereva momokani baita dibaia?

 Dirava na e uramu baita mauri bona ia sivaraina momokanina baita dibaia na namo. (1 Timoteo 2:4) Dirava ena taravatu maoro bona kerere ai baita dibamu bona baita badinamu neganai, ia turana namona ai baita laomu. (Salamo 15:1, 2) Dirava ese Iesu e siaia tanobada ema, badina ia na e ura taunimanima ese hereva momokani bae dibaia. Dirava na e uramu ita ese Iesu ena hahediba herevadia baita kamonai.​—Mataio 17:5; Ioane 18:37.

Dirava ese koikoi karana baine haorea diba, a?

 Oibe. Taunimanima ese ma haida e koidiamu neganai Dirava na se moalemu. Ia na e gwauhamata koikoi taudia na baine habuadia tari. (Salamo 5:6) Danu Dirava ese ena gwauhamata na be haḡuḡuruamu, eto: “Momokani bibinadia na e mia hanaihanaimu.”​—Hereva Lada-Isidia 12:19.