Laḡani ta ta ai, tanobada heḡeḡemadai Iehova ena Witnes taudia bona e vavediamu taudia milion momo na Iesu ena mase ena Memorial hebouna e karaiamu, ena haheḡani heḡereḡerena. (Luka 22:19) Una hebou ese e durudamu Iesu na taunimanima daidiai ena mauri e henia karana baita laloa bada. Danu, ena boubou ḡauna ese hari bona vaira negai namo be havaraiamu dalana e hahedinaraiamu.​—⁠Ioane 3:16.

 Ena be ina laḡani ai Memorial hebouna ola eiava lasi, to Iesu ena boubou ḡauna amo namo be ede ba davaria toma? Iesu na eto mai anina bada ḡaudia rua baita karadia na namo:

1.  1. Dirava bona Iesu ba dibadia. Iesu na Tamana e ḡuriḡuri henia, eto: “Mauri hanaihanai binai: idia ese oi Dirava Korikori tamona bae dibamu, bona Iesu Keriso danu, oi ese o siaia tauna.”​—⁠Ioane 17:3.

2.  2. O dibamu ḡaudia ba badina. Iesu na e hahedinaraia ena hahediba herevadia na eda mauri ai baita badina. Heḡereḡere, Iesu ese ena Ororo Harorona ai “[ena] hereva baine kamonai, bona karana baine karaia” tauna e hanamoa. (Luka 6:46-48) Danu, nega ma ta ai e gwa: “Ina na boma diba bona boma kara, boma namo.”​—⁠Ioane 13:17.

 Oi o uramu Dirava bona Iesu ba dibadia namonamo, a? O dibamu ḡaudia ba badina totona heduru ma haida o uramu, a? Ini dala haida ese be durumumu.

 Asi davana Baibul stadi ese taunimanima momo e durudia Baibul bae dibaia bona edia mauri ai ena hereva bae badina.

•   Baibul stadi program ai diba ma haida bavabi totona, emai websait ai ina kahana Guided Bible Study Course ba itaia.

•   Iehova ena Witnes taudia ida Baibul stadi dalana ba dibaia totona, vidio ladana Emu Baibul Stadi Ba Moalelaia ba itaia.

 Wiki ta ta ai, Iehova ena Witnes taudia na nega rua tomadiho totona edia Kingdom Hall ai e heboumu. Unu heboudia ai, Baibul bona edia mauri ai Baibul ena hahediba herevadia be ede bae badina toma na e herevalaiamu.

 Hebou ini bamodia na ura taudia baema diba. Emui noho daladia heḡereḡerediai, Kingdom Hall baoma diba eiava videoconference amo ba join diba.

•   Ini heboudia ai e varamu ḡaudia ba diba totona, vidio ladana Kingdom Hall ai be Dahaka E Karamu? ba itaia.

•   Emu gabu ai emai hebou gabuna ba davaria totona, emai websait ai ina kaha Congregation Meetings of Jehovah’s Witnesses ba itaia.

 Ina websait ai atikol bona vidio momo ese be durumumu Iesu ena hahediba herevadia bona ena boubou ḡauna amo diba ma haida bavabi.

 Heḡereḡere, tau tamona ena mase ese taunimanima milion ediai namo e mailaia dalana ba dibaia totona, atikol ladadia “Iesu ese Ita Ia Hamauria​—Edena Dala Ai?” bona “Dahaka Dainai Iesu Ia Hisihisi Bona Mase?” ba duahi eiava vidio ladana Iesu E Mase Badina be Dahaka? ba itaia.