Laḡani 2023 e matamaia neganai, ita iboudai na ta lalo ita bona eda ruma bese edai na ḡau namodia be varamu. Dahaka dainai unu ta lalo tomamu?

 Baibul ese e herevalaiamu sivarai namona na ina: Ta davarimu hekwakwanaidia na basie mia daudaumu bona kahirakahira be oremu. Oibe, Baibul ai “e tore guna ḡaudia na ita ihadibalaida totona e tore, bena Buka Helaḡa ese . . . tauhalo bae havara, ela bona helaro baita davaria.”—Roma 15:4.

•   Baibul ena gwauhamata ai ḡau ma haida ba diba totona, atikol ladana “A Real Hope for a Better Tomorrow” ba duahia.

 Baibul ese e herevalaia helarona na “eda mauri dogona na heto.” (Heberu 6:19; NWT) Una helaro ese be hagoadadamu. Una helaro ese baine duruda eda mauri ai ta davarimu hekwakwanaidia baita haheaukalai, lalohadai maorona baita abia, bona moale korikorina baita davariamu. Heḡereḡere:

•   Baibul ai helarona ese e kekero momova tauna ta e durua dalana ba diba totona, vidio ladana Egu Mauri Lau Hesikulaia ba itaia.

•   Eda lalokau tauna ta e masemu neganai, Baibul ese baine duruda dalana ba diba totona, vidio ladana Idia Taitai Taudia Hagoadaia Totona ba itaia.

 Taunimanima momo na e uramu ḡau namodia bae vara, to asi dibadia bema una na be vara momokanimu. To Baibul ese e gwauhamatalai ḡaudia na dia unu bamona. Dahaka dainai? Badina Baibul ai e miamu gwauhamatadia na Iehova Dirava a amo, ia na “koikoi asi dibana Diravana.” (Tito 1:2) Iehova sibona na mai ena siahu ena gwauhamata iboudiai baine haḡuḡurudia; ia na “ena ura heḡereḡerena ai ḡau iboudiai e karamu.”—Salamo 135:5, 6; NWT.

 A vavemumu Baibul ai e miamu helarona amo namo ba davaria totona. Emu abidadama una helaro ai baine goada totona “Buka Helaḡa ba tahua namonamo.” (Apos. 17:11; NWT) Una ba diba totona, asi davana Baibul stadi kosina ba karaia. Laḡani 2023 ai una ba hamatamaia dalana amo vaira nega helarona ba diba!